Les pruebes oficiales d’asturianu van ponese en marcha en 2019

El conseyeru d’Educación y Cultura, Genaro Alonso, anunció esti martes que los primeros examenes oficiales d’asturianu van ponese en marcha en 2019 y que son un “oxetivu irrenunciable” del Executivu autonómicu.

Asina lo indicó Alonso na Comisión d’Educación y Cultura de la Xunta Xeneral, onde presentó les cuentes de la so cartera recoyíes nel proyectu de Llei de Presupuestos pa 2019 y onde faló del procesu que ta faciendo la Conseyería d’Educación y Cultura pa poder acreitar el nivel d’asturianu de les persones adultes d’una manera oficial.

Read Full Post »

La lliteratura infantil y el gallego-asturianu protagonicen l’actu institucional de la Selmana de les Lletres

Mediu centenar de neños y neñes participaron xunto a diputaos y representantes institucionales nel actu institucional de la Selmana de les Lletres, celebráu esti miércoles na Xunta Xeneral. Nél, la lliteratura infantil y xuvenil en llingua asturiana foi la protagonista, anque tamién el gallego-asturianu.

Esti foi l’idioma de dalgún de los testos lleíos polos diputaos, pero tamién el qu’usó’l presidente del Parllamentu, Pedro Sanjurjo, que se dirixó a tolos presentes y mentes tol actu nel idioma faláu nel Occidente asturianu, ente los ríos Navia y Eo.

Read Full Post »

Comparecientes na Comisión sobre l’asturianu piden a los diputaos qu’entamen por emplear la ‘llingua’ na Xunta

Dos de los comparecientes na sesión d’esti miércoles de la Comisión d’Estudiu del Réxime de Protección de la Llingua Asturiana pidieron a los diputaos de la Xunta Xeneral qu’entamen “dando exemplu” y utilizando la llingua asturiana nes sos intervenciones nel parlamentu autonómicu.

Fueron el llingüista y miembru del Seminariu de Filoloxía Asturiana de la Universidá d’Uviéu, Ramón d’Andrés, y la periodista, Pilar Rubiera, exresponsable de la estaya de Cultura. Xunto con ellos comparecieron l’escritor Xuan Bello y l’escultor Adolfo Manzano.

“Si un númberu apreciable de diputaos falara tolos díes n’asturianu na Xunta Xeneral les coses cayeríen pol so pesu”, esplicó d’Andrés, pa quien sicasí “la realidá ye la que ye y non la que nos prestaría”.

Read Full Post »

PSOE, Podemos, IX, Foro y C’s apauten una Proposición de Llei pa iguar la situación llegal de l’ALLA

En feches prósimes va ser presentada con calter urxente una Proposición de Llei con oxetu de modificar l’artículu 2 de la Llei 5/1997 d’Academies del Principáu d’Asturies que permita la inclusión de l’Academia de la Llingua Asturiana como institución de Derechu Públicu del Principáu d’Asturies.

Esta reforma de la Llei va ser presentada por cinco de los seis grupos de la Xunta, por tanto la so tramitación y aprobación va ser segura. El Partíu Popular nun figura entre los firmanes de la proposición. Esta ausencia “nun ye d’estrañar viendo les últimes declaraciones de los populares al rodiu de la llingua asturiana”, afirma la diputada de Podemos Lucía Montejo.

Read Full Post »

El Principáu quier promover l’asturianu como llingua vehicular na enseñanza y nos informativos de la TPA

El puxu del asturianu como llingua vehicular na enseñanza, a traviés d’un programa que se pondrá en práctica’l cursu qu’entra, y la so utilización nos informativos de la Radio Televisión del Principáu d’Asturies son dos de les cuestiones que’l conseyeru d’Educación, Genaro Alonso. Fízolo na so intervención na Comisión d’Estudiu del Réxime de Protección de la LLingua, celebrada na Xunta Xeneral.

Según desarrolló dempués el director xeneral de Política Llingüística, Fernando Vallina, tamién presente na Comisión, ocho centros d’enseñanza tomarán parte nesti programa pilotu de magar el próximu cursu. Nél impartiránse dalgunes asignatures d’enseñanza primaria n’asturianu.

Matizó tamién que na mayor parte de los casos nun va suponer gastu adicional, pero n’algunos de los centros pue necesitase media xornada n’educación primaria.

Read Full Post »

El conseyeru de Cultura critica l’usu folclóricu de la llingua na TPA

El conseyeru d’Educación y Cultural del Gobiernu asturianu, Genaro Alonso, criticó esti xueves l’usu “folclóricu” que se da a la llingua asturiana na Televisión del Principáu d’Asturies.

Nel plenu de la Xunta Xeneral, Alonso anunció también que la Conseyería d’Educación del Principáu d’Asturies envió una carta a la editorial Edelvives na que-y solicita’l cambiu del tratamientu que se-y da a la llingua asturiana n’unu de los sos llibros escolares, nel que se refier a la ‘llingua’ como dialectu.

A preguntes sobre esti asuntu pola diputada de Podemos Lucía Montejo nel plenu de la Xunta Xeneral del Principáu d’Asturies, el conseyeru de la materia del Gobiernu asturianu dixo que’l so departamentu siempre va actuar pa que los llibros esixíos a los alumnos asturianos tengan el debíu “rigor científico”.

Read Full Post »

El Conseyeru d’Educación falará nes llingües del país y habrá asturianu n’infantil

El Conseyeru d’Educación dexó bien a les clares nuna comparecencia que llevó tol miércoles 16 de setiembre que va falar davezu nes llingües del país y que l’asturianu va estendese a la educación infantil.

Genaro Alonso foi firme y claru. La diputada de Podemos, Lucía Montejo, foi la que quixo saber si Genaro Alonso diba emplegar l’asturianu nes sos intervenciones públiques. Y el Conseyeru fizo alcordanza de que yá lo ficiera nes dos inauguraciones de cursu escolar, en Cabanaquinta y en Tapia de Casariego. Y entá dixo más: Les dos intervenciones foron billingües porque Alonso va cambiar de rexistru cuando-y pruya.

Read Full Post »

La Xunta aprueba una Comisión especial pa la promoción de la llingua asturiana

La Xunta de Voceros aprobó esti llunes, a propuesta d’IX, la creación d’una Comisión especial pa la normalización, protección y promoción de la llingua asturiana. La comisión foi sofitada por PSOE, Podemos y Foru amás del grupu proponente d’IX.

Según esplicó la diputada d’IX, Concha Masa, en declaraciones a los medios, esta comisión sedría complementaria al nuevu organigrama de la conseyería al traviés del cual quier sofitase la llingua asturiana.

Read Full Post »

Cano plantega a les fuercies polítiques un procesu d’oficialización “axustáu a les necesidaes d’Asturies” nel que l’ALLA actuaría de moderador

“¿Daquién con xacíu pue dexar pasar esta oportunidá y refugar esta ufierta?” entrugóse Ana María Cano, presidenta de l’ALLA, nel actu académicu del XXXVI Día de les Lletres Asturianes depués d’ufrir a los partíos moderar un procesu d’oficialización de l’asturianu “axustáu a les necesidaes d’Asturies”. Enantes, alredor de 3.000 persones pidieron la oficialidá peles cais d’Uviéu.

La coincidencia de la xornada col entamu de la campaña eleutoral pa les Nacionales y municipales del 24 de mayu condicionó’l discursu institucional de Cano que, tres emponderar el llabor de la Xunta pola Defensa de la Llingua Asturiana (XDLA) –coleutivu que recibió un reconocimientu por parte de l’Academia de la Llingua Asturiana (ALLA)– y facer un repás al llabor académicu nestos doce meses últimos, refirióse a esta cita coles urnes como “una oportunidá pa la llingua asturiana”. “En 15 díes, el 24 de mayu, celébrense les eleiciones pa escoyer la composición de la Xunta Xeneral del Principáu y, darréu d’ello, el Gobiernu d’Asturies. Y ye equí onde se xuega’l futuru del asturianu porque, a lo cabero y práuticamente, ye’l parllamentu asturianu, y non otres instancies europees o estatales, el que decide qué facer cola llingua hestórica d’Asturies”, señaló.

Read Full Post »