La Conceyalía de Cultura del Ayuntamientu de Mieres, que preside Diana González, informó que’l fallu del xuráu del XVIII Premiu de Poesía Teodoro Cuesta de poesía, escueye como ganador d’esta edición al escritor Xosé Ánxelu Gutiérrez Morán. Doctor en Bioloxía, esti autor avilesín compaxina’l cultivu de la poesía cola carrera d’investigación científica nel Centru Oceanográficu de Xixón, anque actualmente reside nos USA.
Escritor mui poco prolíficu, nel añu 2002 Xosé Ánxelu Gutiérrez Morán algamó’l segundu premiu nel Concurso de Cuentos pola Oficialidá de Bimenes y nel 2004 ganó, ex aequo con Marta Mori, el Premiu Teodoro Cuesta de Poesía con Países, recorríu lliterariu per dellos llugares que conformen la biografía del autor. El poemariu ganador de la presente edición del Teodoro Cuesta, la númberu XVIII, titúlase Diversa memoria. Formaron el Xuráu D. Miguel Allende, como ganador exaequo de la pasada edición d’esti Premiu, D. Luis Casteleiro por parte de la Oficina de Política Llingüística del Principáu, Dña. Esther Prieto por parte de la Editorial Trabe, D. Vicente García Oliva por parte de l’Academia de la Llingua Asturiana y D. Ismael González Arias pola Casa de la Cultura del Ayuntamientu de Mieres, actuando como presidenta Dña. Diana González, Conceyala de Cultura del Ayuntamientu de Mieres y como secretaria Dña. Laura Marcos, técnica del Serviciu de Normalización Llingüística.
(d’Asturies.com, 05-01-2008)
Read Full Post »
Tierra alantre, la mesma fala 