Ramón d’Andrés: “Una frontera llingüística pue midise”

PABLO R. GUARDADO

Les teunoloxíes informátiques, al permitir el tratamientu masivu de datos, fai posible midir una frontera llingüística “llevándolo a les máximes consecuencies”. Asina lo confirma Ramón d’Andrés (Madrid, 1959), coordinador del equipu responsable del Estudiu de la Transición Llingüística na Zona Eo-Navia (ETLEN) del Seminariu de Filoloxía Asturiana.

ETLEN supón una investigación única y novedosa nel so campu.
Hai trés novedaes nesta obra. La primera vien dada pol fechu de ser un atles llingüísticu. Un atles llingüísticu ye siempre’l resultáu d’años de trabayu d’investigación, y polo tanto esti atles de nuestro aporta un volume considerable d’información llingüística nuevo. Siempre ye un acontecimientu que s’espublice un atles llingüísticu.

Read Full Post »

La Revista de Filoloxía Asturiana va camudar de títulu y configuración

Acaba d’apaecer el númberu 17 de la «Revista de Filoloxía Asturiana» col que se zarra una etapa qu’entamó nel añu 2001.

D’agora en delantre, la revista acoyeráse a una nueva orientación qu’implicará un cambiu de títulu y de configuración y d’ello daráse anuncia a lo llargo de los próximos meses.

Read Full Post »

Asoléyase’l númberu 16 de la Revista de Filoloxía Asturiana

PABLO R. GUARDADO

El Seminariu de Filoloxía Asturiana ta acabante d’asoleyar un númberu nuevu de la Revista de Filoloxía Asturiana, el 16, correspondiente al 2016. Editáu por Trabe, tamién se pue consultar al traviés de la plataforma Reunido de la Universidá d’Uviéu.

Esta espublización añal recueye artículos d’investigación nuevos, notes, cróniques y otros conteníos nes so páxines. Na primer estaya, atopamos cinco estudios, sobre la ‘Caracterización funcional de la interxección: a propósitu de delles interxecciones del asturianu’, d’Alfredo Álvarez Menéndez; ‘El neutro de materia en asturiano: Un acercamiento sintáctico al fenómeno en cuanto a la especificidad, genericidad y la posición del adjetivo’, de Matthew J. Burner; ‘El paisaxe solidariu: léxicu y toponimia comuñera’, de Xulio Concepción; ‘{Tener/llevar} + participio en el castellano de los Siglos de Oro y algunas notas interlingüísticas’, de Patricia Fernández Martín; y ‘Diálogos políticos de los años trenta’, de Rafael Rodríguez Valdés.

Read Full Post »

Menéndez Blanco critica la falta de criteriu de munchos arqueólogos nel tratamientu de la toponimia tradicional

L’investigador de la Universidá d’Uviéu Andrés Menéndez Blanco cuestiona’l tratamientu de la toponimia tradicional que fáen bona parte de los arqueólogos qu’estudien xacimientos nel occidente d’Asturies, y que la so práctica trai, al so xuiciu, importantes erros y imprecisiones, tanto no que se refier a nomes como a allugamientos xeográficos.

Menéndez Blanco coméntalo nun detalláu artículu sobre ‘Toponimia y Arqueoloxía: dellos apuntes sobre’l so usu complementariu a partir d’esperiencies investigadores na Asturies occidental’, publicáu n’asturianu occidental nel llibru ‘Manuel Menéndez y l’Asturies Occidental’, editáu pol Seminariu de Filoloxía Asturiana de la Universidá d’Uviéu.

Read Full Post »

El Seminariu de Filoloxía presenta’l llibru ‘Manuel Menéndez y l’Asturies Occidental’

El Grupu d’Investigación del Seminariu de Filoloxía Asturiana presentó esti emiércoles el llibru ‘Manuel Menéndez y l’Asturies occidental’, acabante publicar pola editorial Trabe, y dedicáu al dialectólogu, etnógrafu y arqueólogu Manuel Menéndez García (1909-1962), autor de la célebre tesis doctoral ‘El Cuartu de los Valles, un habla del occidente asturiano’ (1963, 1965).

L’actu presidiólu’l rector de la Universidá d’Uviéu, Santiago García Granda, el decanu de la Facultá de Filosofía y Lletres, José Antonio Gómez Rodríguez, y el profesor ya investigador Xulio Viejo Fernández.

Read Full Post »

Nuevu llibru: «Manuel Menéndez y l’Asturies occidental»

El Seminariu de Filoloxía Asturiana, xunto con Ediciones Trabe, vien d’espublizar el llibru «Manuel Menéndez y l’Asturies occidental», dedicáu al dialectólogu, etnógrafu y arqueólogu Manuel Menéndez García (1909-1962), autor de la célebre tesis doctoral «El Cuarto de los Valles, un habla del occidente asturiano» (1963, 1965). Complétase asina l’homenaxe que’l SFA y el Real Instituto de Estudios Asturianos-y fixeron n’ochobre del 2014 al recordáu estudiosu de Tinéu.

Conteníu del llibru

* Prefaciu
* Xulio Viejo Fernández: «¿Esiste l’asturianu occidental?».
* Ramón d’Andrés: «La frontera ente l’asturianu y el gallegu: elementos pa un análisis horiométricu».
* Andrés Menéndez Blanco: «Toponimia ya arqueoloxía: dalgunos apuntes sobre’l sou usu complementariu a partir d’experiencias investigadoras na Asturias occidental».
* José Avelino Gutiérrez González, Patricia Suárez Manjón & Jesús Ignacio Jiménez Chaparro: «Arqueología del valle del Esva en los trabajos de Manuel Menéndez: la fortificación de El Castiel.lu de Ovienes / Ubienes y su entorno».
* María Josefa Sanz Fuentes: «El monasterio de Obona: la recuperación de su fondo documental».
* Adolfo García Martínez: «La familia del Cuarto de los Valles: troncalidad, patrilocalidad y mayorazgo».
* Resúmenes / Abstracts

Read Full Post »

La Revista de Filoloxía Asturiana llega al númberu 15

El Seminariu de Filoloxía Asturiana ta acabante d’espublizar el númberu 15 de la Revista de Filoloxía Asturiana. Esti anuariu universitariu d’estudios llingüísticos y lliterarios asturianos y románicos pue consultase al traviés de la plataforma Reunido.

Correspondiente al añu 2015, el númberu 15 de la Revista de Filoloxía Asturiana inclúi los estudios ‘La influyencia de la “concordancia continua” del asturianu nel castellanu faláu n’Asturies’, por Andie Faber (University of Massachussets); ‘Un volume de testos de poesía asturiana de reciente apaición’, obra de Xuan Carlos Busto Cortina (Universidá d’Uviéu; ‘The influence of the focus structure on the placement of pronominal clitics in Asturian’, escrito por Avelino Corral Esteban (Universidad Autónoma de Madrid); ‘Necesitatea unui studiu sociolingvistic în Pola de Siero’, firmao por Cristina Bleorţu (Universidá d’Uviéu / Universität Zürich); ‘Una de derechos lingüísticos: varios conceptos sociolingüísticos aplicables a la situación del asturiano’, de Benat Garaio Mendizabal (SOAS University of London).

Read Full Post »

La toponimia ye la parte más llamativa de la nuesa actividá

El Teixu, Rede pal Estudiu y Defensa de la Llingua Asturllionesa, celebró estos díes, cola colaboración del Ayuntamientu d’Oseya de Sayambre, la V Xornada de Patrimoniu Llingüísticu y Cultural. El programa cuntó con conferencies, presentaciones de llibros, un conciertu y un recital poéticu y musical. Falamos col coordinador del eventu, Iván Cuevas.

¿Cómo decidieron entamar estos alcuentros alrodiu de la llingua Asturllionesa?
Les Xornaes de Patrimoniu Llingüísticu organícense dende 2011 pa contribuir al estudiu y conocimientu de les variedaes llingüístiques de Llión. La primer edición foi convocada pola Plataforma d’Asociaciones en Defensa del Llionés y el Gallegu y les siguientes, más centraes nel asturllionés, convocáronles alternativamente El Teixu y Faceira. La idea ye dotar d’una cita añal a un territoriu onde los actos alredor de la llingua son tovía más escasos qu’en Miranda o n’Asturies.

Esti añu cellebráronse n’Oseya…
Les primeres ediciones tuvieron llugar n’Estorga y Llión, dos ciudaes que, si bien yá tan castellanizaes, son un foco d’atracción pa la población de les zones falantes. Les siguientes lleváronse yá a llugares onde ta vivu l’asturllionés: Villablinu, en Llaciana, y Villamejil, na Cepeda. Esti añu decidimos llevala a Sayambre pa visibilizar la variedá oriental que tovía se fala nesti conceyu.

Read Full Post »

Homenaxe a Manuel Menéndez en Grau

El viernes 13 de marzu, a les 19:30 hores, celébrase na Casa la Cultura de Grau (Sala Polivalente), un homenaxe al llingüista Manuel Menéndez García onde va intervenir Xulio Viejo Fernández, profesor de la Universidá d’Uviéu, con una conferencia titulada “La llingua y la lliteratura asturianes nel Occidente d’Asturies”. L’actu va acabar con un recital de poesía a cargu de Xuan Bello, Antón García y Miguel Rojo.

Esti eventu entámalu’l Seminariu de Filoloxía Asturiana de la Universidá d’Uviéu y tien l’apoyu de la Fundación Aula de les Metáfores, la Fundación Valdés-Salas, l’Aula Valdés-Salas d’estensión universitaria de la Universidá d’Uviéu y el Conceyu de Grau.

Read Full Post »

El Teixu presenta un mapa cola toponimia tradicional del conceyu de Tinéu

El Teixu, Rede pal Estudiu y Defensa de la Llingua Asturllionesa presenta un mapa de Tinéu que representa los nomes tradicionales de tódolos ḷḷugares del conceyu, recoíos directamente n’encuestas a los vecinos. Esti mapa, qu’inclúi tamién datos d’oronimia ya hidronimia, vei ser presentáu dientro del programa del homenaxe a Manuel Menéndez García que se celebra esti vienres 27 de febreiru, a partir de las 17:00 horas, na Casa de Cultura de Navelgas.

Ḷḷugares ya brañas cumo Xinestaza, Buḷḷacente, Xera, Silvayyana ou Caeras; cursos d’augua cumo El Ríu Mirayu, El Ríu Faxeirúa ou L’Esva; picos cumo Muḷḷeirosu, Penafilera ou Capieḷḷamartín… Alredor de setecientos topónimos, recoíos íntegramente n’encuestas orales feitas en tódalas parroquias del conceyu, xúntanse nesti trabayu a todu color publicáu por El Teixu, qu’incorpora tamién un mapa parroquial del conceyu, amás de territorios supralocales, casas sueltas, sierras ya puertos de montaña.

Read Full Post »