Riaño (ALLA) llama a los políticos a falar “ensin perda de tiempu” sobre “la oficialidá qu’Asturies demanda y necesita”

El presidente de l’Academia de la Llingua Asturiana (ALLA), Xosé Antón González Riaño, llamó a los grupos parllamentarios a que, “en nome del pueblu asturianu”, falen “ensin más perda de tiempu” sobre la oficialidá “qu’Asturies constitucionalmente demanda y necesita”.

Asina lo indica nel so discursu pola Xunta Estraordinaria de l’ALLA pol Día de les Lletres nel Teatru Campoamor, onde la institución acoyó a los miembros nuevos: l’escritor Xandru Martino como académicu correspondiente y a la periodista Pilar Rubiera Alonso como miembru d’honor.

Un actu al qu’asistieron el presidente del Principáu, Adrián Barbón; la conseyera de Cultura, Política Llingüística y Turismu, Berta Piñán; la conseyera d’Educación, Carmen Suárez; el presidente de la Xunta Xeneral, Marcelino Marcos; el rector Ignacio Villaverde; representantes de tolos grupos parllamentarios menos Vox y de sindicatos y asociaciones, amás d’alcaldes de 13 conceyos, ente los que nun taba Uviéu, qu’acueye l’actu.

Read Full Post »

“Ye urxente protexer el patrimoniu llingüísticu”, diz Sánchez Vicente

El II Premiu Nacional de Lliteratura Asturiana, Xuan Xosé Sánchez Vicente, afirmó esti vienres que dientro del patrimoniu llingüísticu mundial “nun hai nengún idioma pequeñu” y que, polo tanto, “ye urxente protexer el patrimoniu llingüísticu, por mui pequeña que sía esta llingua”.

Asina lo indicó na Xunta Estraordinaria de l’Academia de la Llingua Asturiana pol Día de les Lletres Asturianes, onde-y entregaron el II Premiu Nacional de Lliteratura Asturiana.

Read Full Post »

Riaño (ALLA) pon a Galicia como exemplu d’oficialidá y reclama a les fuercies polítiques “facelo agora”

El presidente de l’Academia de la Llingua Asturiana (ALLA), Xosé Antón González Riaño, punxo esti vienres a Galicia como “muestra d’un billingüismu social harmónicu” y señaló la necesidá de qu’Asturies entame un procesu asemeyáu “y necesitamos entamar a facelo agora”.

Amás, reclamó a les fuercies polítiques que busquen “con intelixencia y xenerosidá” un alcuerdu de mínimos sobre’l modelu xurídicu d’oficialización del asturianu y del gallego-asturianu.

Read Full Post »

“Esiste una campaña de persecución de los falantes d’asturianu que tien na Xunta Xeneral l’epicentru”, asegura Sánchez Vicente

PABLO R. GUARDADO

La Xunta Xeneral acoyó esti xueves les comparecencies informatives de la Comisión de Reglamentu pa modificar la norma de la Cámara pal usu del asturianu. Énte l’ausencia de VOX, Ciudadanos garró’l testigu pa desviar l’alderique d’un mou “perversu”, como afirmó’l caderalgu de Derechu Constitucional, Francisco Bastida.

El motivu de la sesión yera conocer la opinión d’espertos sobre la propuesta d’Asturies pela Izquierda de modificación del artículu 11 del Reglamentu de la Xunta Xeneral pa qu’ésti esprese “nel marcu de lo dispuesto pol Estatutu d’Autonomía y, nel so casu, pola llexislación que lo desendolque, tanto los diputaos nel exerciciu de les sos funciones parllamentaries como cualquier otra persona que compareza énte la Cámara podrán utilizar el bable/asturianu”, cola fin d’evitar asina que se-y pueda torgar a naide l’emplegu de la llingua asturiana nel Parllamentu, como asocedió esta llexislatura en delles ocasiones tres la intervención de la conseyera Berta Piñán na Comisión de Cultura, Política Llingüística y Turismu pa dar a conocer los planes del so departamentu. La coalición presentó como comperenciantes al propiu Bastida, a Xosé Antón González Riaño, presidente de l’Academia de la Llingua Asturiana; al escritor y ex diputáu Xuan Xosé Sánchez Vicente; y al historiador Faustino Zapico, mentes que’l Partido Popular (PP) llamó a Alejandro Huergo, caderalgu de Derechu Alministrativu.

Read Full Post »

Podemos y Izquierda Xunida alcuerden abrir el procesu pa la reforma del Estatutu pa declarar la oficialidá del asturianu nesta llexislatura

FERNANDO DE LA FUENTE

Nel alcuentru celebráu esta tarde del martes na Xunta Xeneral ente Podemos Asturies y Izquierda Xunida, alcordaron entamar aína los trámites pal rexistru na Xunta Xeneral d’una iniciativa qu’abrá’l procesu de reforma del Estatutu d’Autonomía y asina pa poder aprobar la so reforma na qu’incluya la oficialidá de la llingua asturiana primero que remate esta llexislatura. Una vegada rexistrada, quieren falar col restu de les fuercies parlamentaries, yá que los sos votos nun son abondos pa poder aprobar la reforma estatutaria plantegada.

Dende Podemos, el responsable de Derechos Llingüísticos, Lluismi Orviz, esplicó que les dos formaciones lleven un añu trabayando sobro esti tema “con total cordialidá y alcuerdu”. Agora, dempués de ‘un tiempu de reflexón pa buscar más sofitos, apuesten por nun perder la oportunidá’ nesta llexislatura “una vegada que la FSA incorporó la oficialidá, esto ye, reconocer los drechos de los asturianos y asturianes falantes cola cooficialidá del asturianu nel Estatutu”. Dexando una reforma más amplia del actual Estatutu pa la siguiente llexislatura.

Read Full Post »