El cantautor Haim Álvarez musicaliza’l poema ‘Esconsueñu’ d’Esther García Lopez pal so trabayu nuevu

PABLO R. GUARDADO

‘Esconsueñu’, a partir d’un poema homónimu de María Esther García López, ye’l tema d’adelantu del trabayu nuevu d’Haim Álvarez, ‘Por un puñado de versos’. El cantautor, qu’asoleya un videoclip del mesmu, escoyó esti testu n’asturianu occidental qu’apaez nel llibru ‘El color de los días’ pol “impautu que me causó al lleelu y tol tema míticu que tien”.

Too entamó con un regalu. “Yá conocía a Esther de coincidir en recitales y un día entregóme esta obra. Al lleelu, foi’l poema que más me llamó l’atención pola figura del trasgu”, esplica Álvarez, qu’afirma que “nun tardé más d’un día en musicalizalu”.

Read Full Post »

Pravia acueye un recital de poesía pol 25P

L’Ayuntamientu de Pravia anunció que, con motivu del 25 de payares, Día internacional de la elminicación de la violencia contra la muyer, el auditoriu José Barrera va acoyer un recital de poesía contra la violencia machista.

L’actu, que va entamar a les 20:00 hores, va tar conducíu por Alma Hidalgo y van participar autores como Yedra Riesgo, Sara Areces, Natalia Campo, o Mª Esther García López, presidenta de l’Asociación d’Escritores d’Asturies.

(de Formientu, 22-11-2022)

Read Full Post »

Quince empreses qu’usen l’asturianu participen nel Reguerada Fest, espaciu d’alcuentru de la cultura nel idioma

Candás va acoyer del xueves al domingu’l I Reguerada Fest, iniciativa del Gobiernu pa crear un espaciu d’alcuentru de la cultura en llingua asturiana. Van entamase más d’una docena d’actividaes estos cuatro díes y la Fábrica d’Ortiz va agospiar un Mercáu y Feria d’Empreses na que participen un total de quince firmes qu’empleguen l’asturianu.

“Carreño ye una zona mui vinculada a la cultura n’asturianu”, aseguró na presentación Antón García, direutor xeneral de Politica Llingüístca, Antón García, qu’apuntó qu’anque en Candás “suelen dicir que ye’l ñero de la lliteratura asturiana, yo creo que ye un poco más que’l ñero, ye l’aniciu, l’orixe de la lliteratura n’asturianu y paecíanos un bon sitiu pa rindir homenaxe a Antón de Marirreguera”, autor del autor del primer testu conserváu de la historia de les nueses lletres, el ‘Pleitu entre Oviedo y Mérida: Sobre la posesión de las cenizas de Santa Eulalia’, del 1639. Asina, escoyóse’l nome de Reguerada Fest pa esta iniciativa.

Read Full Post »

“‘Amor y deséu en tiempos virales’ son poemes escritos nun momentu d’esaltación emocional”, rellata García López

‘Apurémonos a querenos’ ye’l versu que, cuenta María Esther García López, meyor resume ‘Amor y deséu en tiempos virales’. Tratáse del nuevu poemariu de la escritora valdesana, compuestu por nueve “poemes escritos nun momentu d’esaltación emocional”, que presenta esti xueves en Piedrasblancas.

Pata Negra edita esti llibru, que cuenta con dos formatos: ún artísticu y otru, billingüe, estándar. El primeru, con una tirada de namái 30 exemplares numberaos, ta fechu a mano con papel especial y cuenta con seis grabaos orixinales d’arte abstractu obra d’Enrique Tirador qu’acompañen a los poemes y un prólogu d’Aurelio González Ovies de títulu ‘Tres de la ventana’.

Read Full Post »

L’Asociación d’Escritores d’Asturies entama les XXI Xornaes Lliteraries en Pravia

Los prósimos díes 5,6 y 7 de payares van desarrollase les XXI Xornaes Lliteraries na villa de Pravia, organizaes pola Asociación d’Escritores d’Asturies.

Estes xornaes tienen a lo llargo d’estos trés díes una montonera d’actividaes culturales enfotaes na lliteratura infantil y xuvenil. Nel so programa podemos alcontrar actividaes pa los escolares, ponencies, conciertos, meses redondes, esposiciones y hasta un micru abiertu, amás de visites a llugares esenciales na hestoria praviana.

Read Full Post »

Homenaxe del mundu lliterariu asturianu a Xosé Bolado

Esti sábadu, 3 de xunetu, l’Academia de la Llingua Asturiana fixo homenaxe a Xosé Bolado García, académicu de Númberu fináu’l 20 de mayu pasáu. Nel actu, que tuvo llugar na Biblioteca d’Asturies «Ramón Pérez de Ayala», presentóse’l llibru homenaxe al autor, N’harmonía, Agora que sigues con nós…, nel que se recueyen les sos composiciones poétiques asoleyaes nes revistes de la Institución (Lletres Asturianes, Lletres Lliterariu y Lliteratura).

Na presentación d’esti llibru contóse coles pallabres iniciales del presidente de la
Institución, Xosé Antón González Riaño, que faló a los asistentes de la figura de Xosé Bolado y la so importancia ya implicación cola ALLA y la lliteratura asturiana. Darréu d’ello, Aurelio González Ovies, profesor de la Universidá d’Uviéu fixo un repás curtiu de la poética del autor homenaxáu, afondando nel so llinguaxe poéticu y les sos característiques más señalaes.

Read Full Post »

“Sentímonos arguyosos de premiar a los nuesos autores, pa que n’Asturies se sepa qu’equí hai escritores escelentes”, diz Esther García

Adolfo Camilo Díaz, Aida Escudero y José Ángel Gayol recibieron la escultura Apolo de los XX Premios de la Crítica y XV de les Lletres d’Asturies nes estayes d’asturianu. “Sentímonos arguyosos de premiar a los nuesos autores, pa que n’Asturies se sepa qu’equí hai escritores escelentes”, apuntó María Esther García López nun actu nel que rector Ignacio Villaverde dixo les sos primeres pallabres en llingua asturiana.

La conseyera de Cultura, Política Llingüística y Turismu, Berta Piñán, presidió xunto a ellos un eventu que taba programáu pa xineru, pero que se tuvo qu’aplazar pola situación sanitaria del momentu. Ente’l públicu, el secretariu de l’Academia de la Llingua Asturiana, Xosé Ramón Iglesias Cueva y les alcaldeses de Candás y Castrillón, Amelia Fernández López y Yasmina Triguero, de manera respeutiva, ente otres autoridaes.

Read Full Post »

Cultures algama’l númberu 24 con un monográficu sobre lleendes y ayalgues

Tres del monográficu de la música (qu’ocupare los númberos 22 y 23), Cultures. Revista Asturiana de Cultura, editada pola Academia de la Llingua, vuelve a la cai con otru volume temáticu, nesta ocasión dedicáu al campu d’investigación de les lleendes y les ayalgues. Tres del entamu, iguáu pol direutor de la revista, Roberto González-Quevedo, nueve contribuciones más dan cuerpu a la parte principal de la edición, toes elles con un formatu anováu qu’agora inxerta resúmenes y pallabres clave n’inglés.

El primeru d’ellos, d’Alberto Álvarez Peña, fai un percorríu per dalgunes ayalgues asturianes al traviés del testimoniu oral recoyíu alredor de dalgunos ayalgueros y gacetes. Antonio Alonso de la Torre García y Francisca Iglesias Álvarez escriben de les tradiciones nesti ámbitu atropaes nos valles d’El Ríu de Trubia. Dende esa mesma dedicación a los espacios culturales concretos hai otres cuatro contribuciones. María Esther García López fala de los tesoros en La Montaña (Valdés) y n’Oneta (Villayón). Martin de Villar axunta delles ayalgues nel territoriu eonaviegu. Y, p’acabu nesti bloque de miraes de cercanía, Xosé Antón Fernández Martínez «Ambás» apurre un rellatu autoetnográficu asitiáu nel so escenariu familiar, en Salcéu, Grau.

Read Full Post »

Un caligrama n’asturianu ganó ex aequo’l concursu pa escolinos na categoría de 11 a 13 años

PABLO R. GUARDADO

L’Asociación d’Escritores d’Asturies entamó nel marcu de les XIX Xornaes Lliteraries en Pravia, en collaboración col Conceyu de Pravia, el IV Concursu de Caligrames pa escolinos. La ribeseyana Marina Fernández Cueto, de 13 años, llevó’l primer premiu na categoría de 11 a 13 años ex aequo con un trabayu feminista n’asturianu.

Escolina de l’IES Avelina Cerra, entituló’l so caligrama como ‘El gritu de les que non tienen voz’, incorporando mensaxes contra la violencia machista formando una persona que da un glayíu. Pal xuráu foi’l merecedor del primer premiu xunto con Paula del Rivero, del avilesín Colegio San Fernando, na estaya de 11 a 13 años.

Read Full Post »

Les Xornaes Lliteraries en Pravia céntrense na tradición y la oralidá

Xosé Ambás, Héctor Braga, Dani García de la Cuesta, Berto Álvarez Peña y Marta López participen nuna cita con una actividá sobre añaes protagonizaes por lletristres asturianes.

Esti martes echen a andar les XIX Xornaes Lliteraries en Pravia baxo’l títulu ‘Lliteratura: tradición y oralidá’. Hasta’l domingu hai programaes actividaes dientro de l’amplia programación entamada pola Asociación d’Escritores d’Asturies.

Read Full Post »