Carlos Rubiera espubliza “30 Asturianaes”, una triloxía enciclopédica de l’Asturianada

El cantante y compositor xixonés Carlos Rubiera presenta estos díes 30 Asturianaes, una obra en formatu llibru más tres CDs col que pon el ramu a más de 20 años d’estudiu, revisión y composición nel ámbetu la canción asturiana.

Esti trabayu representa’l cumal de la so carrera comu cantante y compositor d’asturianaes, un estudiu que tien el so aniciu nes obres de los compositores y cantaores “clásicos” d’a entamos del Sieglu XX (Rodríguez Lavandera, Baldomero Fernández, Manuel del Fresno y otros) que supieron day a la tonada asturiana un calter cultu.

Read Full Post »

El Principáu publica un discu colos 40 meyores cantares de la historia de la música asturiana

La Conseyería d’Educación y Cultura publicó’l doble discu conmemorativu ’40 años al son de la nuestra música/40 anos al son da nosa música’, pa celebrar la Selmana de les Lletres Asturianes, que nesta edición ta dedicada a la música fecha n’asturianu y gallego-asturianu.

El discu, onde se recueyen cuarenta temes que repasen les últimes cuatro décades, presentólu esti xueves nel Muséu de Belles el director xeneral de Planificación Llingüística del Gobiernu asturianu, Fernando Padilla, acompañáu de la filóloga del Serviciu de Normalización de la Conseyería, Lourdes Álvarez, y la escritora Marta Mori y la técnica de normalización María Xosé Rodríguez, que xunto al escritor Inaciu Llope y el periodista Damián Barreiro formaron la comisión qu’escoyó los cuarenta cantares.

Read Full Post »

El cantar ‘Los fayeos de mayo’, de Felpeyu, ye’l meyor de la música asturiana, según un ranking de RPA

El tema del grupu Felpeyu ‘Los fayeos de mayo’ ye’l meyor de la historia de la música asturiana, según la encuesta fecha pola Radio del Principáu d’Asturies (RPA) ente una trentena de personalidaes del mundu de la cultura asturiana.

La emisora pública emitió a lo llargo d’esta Selmana l’espaciu ‘Top 25 n’ast’, onde se dieron a conocer los 25 temes más votaos por xuráu de más de 30 personalidaes del mundu de la cultura asturiana –académicos, filólogos, músicos, escritores, actores, promotores, xestores culturales y profesores universitarios–. D’una primer esbilla salieron 200 cantares de la que les 25 que se sintieron en RPA foron los más votaos.

Read Full Post »

Cano emponderó’l “papel que la muyer xuega nel procesu hestóricu de caltenimientu y recuperación de la llingua”

PABLO R. GUARDADO

Ana María Cano nun quixo entrar en temes políticos nel so discursu institucional pol Día de les Lletres Asturianes –anque dexó cayer delles crítiques– pa centrase nel Premiu Nacional de Lliteratura Asturiana, que recibió Xuan Bello, y l’homenaxe que l’ALLA fixo a la muyer pol so llabor na recuperación y caltenimientu del idioma.

Estos dos fechos centraron tamién l’actu d’esti añu nel Teatru Campoamor de l’Academia de la Llingua Asturiana (ALLA), nel que nun hebo nomamientos d’académicos nuevos. Con un patiu de butaques práuticamente enllenu nesta ocasión y cola presencia d’autoridaes del mundu políticu, cultural y social del país –finalmente, como s’esperaba, el presidente Javier Fernández nun acudió–, los miembros de l’ALLA xubieron al escenariu pel pasiellu central al son d’una gaita tres un entamu musical a cargu de Mariluz Cristóbal y la violinista Bárbara González-Quevedo.

Read Full Post »

“N’otres comunidaes sería impensable que nun asistiera’l so presidente al Día de les Lletres”, diz Cano

Esti miércoles na sede de l’Academia de la Llingua Asturiana (ALLA) presentóse’l XXXVIII Día de les Lletres Asturianes, que se va celebrar el prósimu 5 de mayu a les 20.30 hores y nel que, como ye vezu, ta convidáu’l presidente Javier Fernández. Xuan Bello va recibir el Premiu Nacional de Lliteratura Asturiana.

Ésta ye la principal novedá de la Xunta estraordinaria de l’ALLA, que nesta ocasión nun va acoyer el nomamientu d’académicos nuevos. D’esta manera, prémiase una trayeutoria d’un escritor o escritora, cola fin de dar visibilidá a la lliteratura fecha en llingua asturiana.

Read Full Post »

La música en llingua asturiana, presente en cuatro categoríes de los AMAS

La música asturiana ta presente en cuatro de les categoríes de los Premios AMAS, que tán celebrando nestos díes les sos votaciones pa la edición 2015, al traviés de la so páxina web d’internet.

Concretamente, la cantante de tonada Mariluz Cristóbal concurre na categoría a la meyor voz. Héctor Braga y Spanta la Xente son dos de los escoyíos na categoría de meyor discu folk.

El tema ‘La Foguera’ de Skontra compite ente los cuatro meyores cantares rock, y a lo último, el cantar billingüe de Nacho Vegas ‘Vinu, Cantares y Amor’ aspira a ser la meyor nes categoríes d’otres escenes.

Read Full Post »

Novedaes na tradición

ANTÓN GARCÍA

Necesité vencer dellos prexuicios personales pa meteme dientro d’un discu que se titula asina, (Nuevos) cantares de chigre. A mediaos de los noventa yá saliera Cantares de sidra y chigre, onde la tonada (Jorge Tuya, Mariluz Cristóbal, Ismael Tomás, Luis Estrada…) cruciaba garrada de la mano de gaiteros y coros pela tradición, yá fuera popular, yá de Sergio Domingo o de Torroba, compositores que supieron interpretar l’alma d’Asturies fecha música. Pero, anque’l títulu pareza indicar lo contrario, los (Nuevos) cantares de chigre que saca Algamar, la casa que lu produz, tienen mui poco que ver cola vieya propuesta de Fono Astur. Eso sí, coinciden en repetir dalgunos temes, como “La romería de San Andrés” (qu’arregla equí Cilvrnigans), “Chalaneru” (na versión de Fe de Ratas) o “Soi de Verdiciu” (a cuenta de Skama la Rede).

Foi precisamente la variedá de grupos y voces que visiten estos temes “de siempre” la que me fexo vencer los prexuicios iniciales y meteme no que ye una verdadera y feliz propuesta d’editor: quince grupos o solistes que van del rock al cantautor pasando pela música pop y el folk, reinterpretando otros tantos temes de la tradición asturiana, faciéndolos sonar como propios. Asina, Pablo Moro da una vuelta al popular “Inés, Inés” dexándonos una pieza intimista y doliente; Crudo, el grupu de rock puru de Xixón que punxo na cai Cicatrices hai un par d’años, fai una versión novedosa de “Baxaben cuatro ayeranos”, ensin que’l cantar pierda la so esencia nin el grupu la etiqueta rockera.

Read Full Post »

12 años/12 discos: lo meyor de la canción asturiana moderna

Malapenes lleven pasaos 13 años d’esti nuevu sieglu. Suficientes pa que nos tocara asistir a un relevu xeneracional impresionante. Estos son, nuna mirada rápida, 12 discos pa entender esti tiempu. Ensín mencionar, intencionadamente, nengún de los publicaos nel añu pasáu y nésti.

Dellos van ser imprescindibles pa falar d’esti tiempu dientro d’otros cien años. Dalguién va echar a faltar dalgún discu, más que nada de folk y d’otres músiques averaes. Posiblemente. Al meyor de xente como Liliana Castañón, Sergio Agüeros, Héctor Braga o Fernando Valle Roso. Por citar a xente bien moza que ta y que sigue faciendo coses diferentes. La distancia de tiempu de la que tamos falando ye tan curtia y la nuestra propia mirada dende la necesaria distancia tan curtia, que puen ser suficientes esta docena de discos. Y, tamién, pue echase a faltar dalgún más.

Read Full Post »

“Igor y Carlos foron fundamentales na música asturiana de los años últimos”, afirma Boni Pérez

PABLO R. GUARDADO

La música asturiana va homenaxar a Igor Medio y Carlos Redondo esta fin de selmana. Más de venti grupos van actuar n’once llocales xixoneses nesta edición de N’Alcordanza pa recordar a dos persones “fundamentales” na escena.

Asina definió a los dos ‘felpeyos’ Boni Pérez nel actu de presentación del eventu que tuvo llugar ayeri nel Café Trisquel y nel que’l músicu tuvo acompañáu polos otros dos organizadores d’esta iniciativa que yá cumple siete años, Rubén Ardura y Ruma Barbero. Los trés decidieron dar un pasu alantre na edición nueva de ‘N’Alcordanza d’Igor y Carlos’ y convertila nuna cita reivindicativa y nun homenaxe a los llocales que programen música en direuto. “Pensamos que yera mui interesante xuntar les dos variables nes que los dos músicos movíense tradicionalmente, el folk y el rock, pero non separtaos, como otros años, sinón amestaos, porque la xente tien munchos gustos diferentes”, esplicó Ardura, qu’añadio que tanto a Igor como a Carlos “prestaría-yos muncho qu’esta cita sirviera pa reivindicar la música asturiana dende’l puntu de vista llaboral y como seña d’identidá; como industria cultural”. Pa ello, enantes de cada actuación, va lleese un manifiestu nel que se demanden trés puntos básicos, que resumió Barbero en que “tien qu’acabase que les y los trabayadores de la música coticen el día que toquen; “que los músicos tienen que tener un sitiu onde espresase y onde tocar”; y “que ye necesario un circuitu profesional n’Asturies y que les instituciones cuenten cola música asturiana como una industria asturiana más”.

Read Full Post »

Xune Elipe: “Preparo un programa musical pa la TPA”

INACIU GALÁN

Ye conocíu como músicu, pol so llabor al frente de Dixebra, pero diz que nunca nun se definió como talu. Prefier llamase “activista musical” y como talu lleva 25 años col so grupu y con otres iniciatives como la so discografíca, va un añu convertida en productora audiovisual Goxe. De los proyectos d’esta aventura empresarial y de la so actividá cultural, falamos con Xune Elipe, estrenando asina un nueva etapa de la Entrevista de la selmana n’Asturnews.

Dempués d’un añu d’actividá de Goxe Producciones, ¿qué balance fai?
Tamos, como quien diz, asitiándonos tovía; definiendo’l nuestru proyectu nun momentu tan gafu como ésti onde hai que conocer bien l’escenariu nel que te vas mover, diversificase y ser competitivos, col aquel añadíu amás de ser una empresa «militante». De toes maneres nesti tiempu espublicemos trés referencies discográfiques nueves (Toli Morilla, Mariluz Cristóbal Caunedo y Soncai System), recuperemos la cabecera del Anuariu de la Música Asturiana y saquemos el volume correspondiente al añu 2012 o producimos la Gala del Premiu al Meyor Cantar, ente otres coses. Y yá tenemos en mente poder llevar alantre otros proyectos nuevos.

Read Full Post »