L’autor de Corvera ta acabante salir al mercáu editorial con un llibru nuevu, el poemariu «Ítaca», editáu por Impronta. El llibru lleva prólogu del escritor y miembru de númberu de l’Academia de la Llingua Asturiana Inaciu Galán y epílogu de la música y escritora Marisa López Diz. La editorial ufre de baldre una amuesa dixital del llibru.
Sobre la obra del aturo comenta l’escritor Ricardo Candás: «La poesía equí sangrada, del escelente poeta Berto García, ye de versu curtiu pero afiláu como la mirada punzante de l’alborada, de poemes breves pero voluminosos como un corazón qu’ama, de llectura reposada pero cargada de la pólvora incendiario del aforismu. Un home abiertu a lo que-y ufre’l llinguaxe (silenciu, entrugues, verdá…) pa falar de la carnosa sede de les vivencies mesmes y la mancadura que fai’l tiempu cuando se tienen les manes vacíes d’amor y los güeyos na memoria. Quien llea esti viaxe hasta Ítaca atropará pallabres presentaes nel orde alfabéticu del misteriu que tien lo que brega contra’l desencantu y qu’afilvana’l tiempu. Porque la voz poliédrica de Berto García caltria pa xorrecer contra’l vacíu, p’amirar lo qu’espera acullá de l’acabación, pa deprender que tres la sudorípara falta d’aliendu siempre hai daqué valoratible que vence al escaezu y qu’acolumbra’l nuestru destín».
(de Formientu, 01-06-2022)
Tierra alantre, la mesma fala 