MARTA MORI
L’añu 2021 dexónos poca poesía n’asturianu. Sicasí, les dos antoloxíes de Xosé Bolado que se publicaron -“Un pájaro tan ligero” y “N’harmonía”- y esta de Pablo Antón Marín Estrada de la que voi falar darréu, “Pozu sin fondu”, valieron bien pa cubrir la falta, supliendo la novedá con calidá. Pablo Antón Marín Estrada ye un poeta enorme, a l’altura d’otros y otres que, por escribir en llingües que gocen de más apreciu que l’asturiana, tienen la posibilidá de recibir reconocimientos y gallardones que los escritores nesta llingua tienen vedaos. Esta circunstancia y la falta d’atención que’l públicu d’Asturies dedica a les lletres asturianes ye algo que Marín Estrada nun inora y que tiñe de tristura los versos más cercanos nel tiempu, nos que, con too, reivindica’l sentíu d’un viaxe “noble y necesariu… […] inda termine en fracasu”.
El viaxe de Marín Estrada comienza con “El blues del llaberintu” (1989), un llibru escluyíu, por decisión de l’autor, d’esta antoloxía. Ye nel poemariu “Les hores” (1990) onde’l poeta s’espresa per primera vez cola voz que-y conocemos, clara y reflexiva, y aborda’l tema que caracteriza, con matices distintos, la so poesía: el pasu del tiempu. Van tomando cuerpu los escenarios de la infancia, símbolu del tiempu perdíu, al llau d’evocaciones qu’anuncien una preocupación cierta pola memoria histórica y meditaciones onde la elexía de raigañu grecollatinu enraiza nel terrén contemporaneu del sentimientu d’estrañedá. Esta voz, qu’enllaza cola d’otros compañeros de viaxe como Xuan Bello, termina de modulase nel tercer poemariu, “Díes d’inocencia” (1992), onde l’autor usa la prosa poética p’acabar de construyir el so universu lliterariu.
(more…) Read Full Post »
Tierra alantre, la mesma fala 