Galán destaca la “disposición bona” de los diputaos en Madrid pa colos problemes del asturianu

PABLO R. GUARDADO

El presidente d’Iniciativa pol Asturianu, Inaciu Galán, aconceyó en Madrid con tolos partíos políticos con representación por Asturies. L’escritor y periodista destacó la “disposición bona” de toos ellos pa colos problemes del idioma.

La tarde d’ayeri pa Galán foi intensa, con cuatro conceyos con diputaos asturianos en Madrid. La ronda d’entrevistes inauguróla’l socialista Antonio Trevín, que se comprometió a facer un siguimientu de la situación del idioma cola Llei Wert y del usu de la toponimia oficial asturiana por parte de Fomentu. Darréu, el presidente d’Iniciativa pol Asturianu reunióse coles populares Carmen Maniega y Ángeles Fernández-Ahuja, que tamién se mostraron receptives. Galán algamó de les dos diputaes del partíu nel Gobiernu’l compromisu de falar colos ministerios de Fomentu y d’Educación, Cultura y Deporte, pa tratar sobre los dos problemes principales qu’atopa anguaño la llingua asturiana, y a usar l’idioma n’actos públicos. Tamién vieron con bonos güeyos la posibilidá de buscar víes de financiación dende los Presupuestos del Estáu pa l’Academia de la Llingua Asturiana y pa la promoción del idioma, una demanda vieya d’Iniciativa pol Asturianu que paez tener consensu nos cuatro partíos que representen a Asturies en Madrid.

Read Full Post »

A vueltes, otra vez, cola toponimia

MARÍA CUETO / IVÁN CUEVAS

Nestes últimes selmanes fonon delles les noticies que recibimos sobre l’incumplimientu de la toponimia que foi oficializao n’Asturies nestos años. De primeres, ye importante reparar en que nun son poques les instituciones públiques –les que precisamente tienen la obligación d’utilizar les formes toponímiques oficiales– les que, nun siendo en casos anecdóticos, nun utilicen la toponimia oficial. Nesti sen, ye bien ilustrativu el casu d’incumplimientu de la toponimia nos indicadores colocaos pol Ministeriu de Fomento nos enllaces de la minera nel Berrón, casu denunciáu a los medios.

Y nun son sólo les instituciones centrales les qu’incumplen l’uso de la toponimia oficial. De la mano de la Conseyería d’Agroganadería y Recursos Autóctonos llegónos, a lo primero d’esti mes, la edición d’un mapa de les mares de la costa asturiana onde nun aparecen na forma oficial dellos nomes de llugar como Llastres o Lluanco. Ye importante señalar, amás, que los topónimos marinos nun son los patrimoniales, polo qu’esti mapa ayuda a perpetuar na cartografía una toponimia deturpada tanto nel ámbitu asturllionés, como nel gallegoportugués. Más tovía: los nomes de les mares presentes nesti mapa entren en contradicción colos que taben n’otra publicación oficial, el Mapa d’Asturies a escala 1:200.000, publicáu apocayá pola Dirección Xeneral d’Ordenación del Territoriu y Urbanismo y respectuosu, con mui poques excepciones, cola toponimia patrimonial.

Read Full Post »