La Manifestación del Día Les Lletres exixirá esti añu que la ‘Llei Wert’ nun saque a la llingua del sistema educativu

La manifestación del Día Les Lletres, que como tolos años dende 1987, reivindica peles cais d’Uviéu la oficialidá de la llingua asturiana, va calcar esti añu na necesidá de defender la continuidá d’esta asignatura nel sistema educativu, tres la próxima entrada en vixencia de la nueva llei d’educación, conocida como Llei Wert.

Asina lo esplicaron Carlos Pulgar y Llucía Menéndez, de la convocante Xunta Pola Defensa de la Llingua Asturiana, nuna rueda prensa na que presentaron oficialmente la convocatoria de la manifestación, que va tener llugar esti vienres, a partir de les 19.30 hores, dende la Estación de Renfe d’Uviéu.

Read Full Post »

Mortera comprométese con Iniciativa pol Asturianu n’asuntos de toponimia, educación y presupuestos

PABLO R. GUARDADO

El xefe de Gabinete de la Delegación de Gobiernu n’Asturies, Alberto Mortera, aconceyó per dos hores con Iniciativa pol Asturianu. Comprometióse con esti coleutivu n’asuntos de toponimia, educación y presupuestos.

Inaciu Galán y Vítor Suárez acudieron en representación del coleutivu que trabaya pola normalización del idioma al conceyu, que se xestó con rapidez, yá qu’Iniciativa pol Asturianu solicitólu’l martes. La imposibilidá de reunise con Gabino de Lorenzo por motivos d’axenda –el delegáu nun podría recibilos hasta dientro d’unos meses– llevó a l’asociación a conformase con Mortera, manu derecha del ex alcalde nel Conceyu d’Uviéu y agora na Delegación, pola necesidá de solucionar con urxencia dalgunos de los problemes qu’atopa anguaño l’asturianu.

Read Full Post »

La tercer versión de la LOMCE garantiza la continuidá del asturianu nes escueles y dexa en manes d’Asturies el cómo

Según informaciones unviaes pol sindicatu SUATEA la nueva versión de la LOMCE, la Llei Wert, tien en cuenta la esistencia de la Llingua Asturiana. Les llingües non oficiales pero con reconocimientu xurídicu y presencia nel sistema educativu van poder siguir ufiertándose al alumnáu. Sicasi, dende SUATEA espliquen que “la nueva versión del anteproyectu de la llei d’educación nun especifica la forma en qu’esta ufierta pue llevase a cabo” y camienten que “agora ye competencia de la Conseyería asturiana configurar una presencia digna de la llingua en toles etapes educatives”. Reclamen otra vegada la oficialidá del asturianu y camientes que ye’l momentu “de llevar a cabu una promoción real del asturianu aplicando la llei d’usu, una llei que, por cierto, apenas establez un mínimu dignu pa un patrimoniu d’esta importancia”.

Read Full Post »

Galán destaca la “disposición bona” de los diputaos en Madrid pa colos problemes del asturianu

PABLO R. GUARDADO

El presidente d’Iniciativa pol Asturianu, Inaciu Galán, aconceyó en Madrid con tolos partíos políticos con representación por Asturies. L’escritor y periodista destacó la “disposición bona” de toos ellos pa colos problemes del idioma.

La tarde d’ayeri pa Galán foi intensa, con cuatro conceyos con diputaos asturianos en Madrid. La ronda d’entrevistes inauguróla’l socialista Antonio Trevín, que se comprometió a facer un siguimientu de la situación del idioma cola Llei Wert y del usu de la toponimia oficial asturiana por parte de Fomentu. Darréu, el presidente d’Iniciativa pol Asturianu reunióse coles populares Carmen Maniega y Ángeles Fernández-Ahuja, que tamién se mostraron receptives. Galán algamó de les dos diputaes del partíu nel Gobiernu’l compromisu de falar colos ministerios de Fomentu y d’Educación, Cultura y Deporte, pa tratar sobre los dos problemes principales qu’atopa anguaño la llingua asturiana, y a usar l’idioma n’actos públicos. Tamién vieron con bonos güeyos la posibilidá de buscar víes de financiación dende los Presupuestos del Estáu pa l’Academia de la Llingua Asturiana y pa la promoción del idioma, una demanda vieya d’Iniciativa pol Asturianu que paez tener consensu nos cuatro partíos que representen a Asturies en Madrid.

Read Full Post »