Vicente García Oliva gana’l Premiu Montesín

L’escritor xixonés Vicente García Oliva, cola obra Fontenebrosa II: la rebelión de los homosaurios, resultó ser el ganador del Premiu Montesín de Narrativa Xuvenil, que convoca Ediciones Trabe en colaboración cola Conseyería de Cultura y Turismu. Resultaron finalistes les obres Repuelgos y La maldición de Llucescuria.

El xuráu tuvo presidíu pol maestru Severino Antuña y formáu por María Antonia Pedregal Montes, xefa del Serviciu de Política Llingüística; María Xosé Rodríguez, xefa de la Oficina Municipal de la Llingua de Xixón; Alejandro Vega, alcalde del Conceyu de Cabranes –d’onde yera la filóloga y escritora María Josefa Canellada, autora de Montesín, títulu de la obra xuvenil que da nome al premiu de Trabe–, y la escritora Esther Prieto Alonso. Fixo de secretariu l’editor Inaciu Iglesias Fernández.

Read Full Post »

Ediciones Trabe tien abiertu’l plazu pa presentase al Premiu Montesín 2008

La editorial Trabe tien abiertu’l plazu pa presentase a la convocatoria del Premiu Montesín, al que han presentase llibros escritos n’asturianu ensin qu’importe’l xéneru(narrativa, poesía, teatru…) pero empobinaes pa rapazos. La dotación económica del premiu ye de 3.000 euros y amás, la editorial comprométese a la publicación de la obra ganadora.

Nel premiu puen participar toles persones interesaes, soles o en grupu, ensin llímite d’edá, con obres de lliteratura xuvenil en llingua asturiana, yá seyan noveles, recopilaciones de cuentos, poemes o obres de teatru. Los trabayos presentaos, a escepción de la poesía, nun tendrán menos de trenta páxines DIN A-4 o foliu mecanografiaes a doble espaciu per una sola llana (1.800 caracteres). Han ser inéditos y han tar ensin premiu n’otros concursos como conxuntu, quier dicise, puen presentase obres de les qu’apaecieren fragmentos publicaos.

Read Full Post »