Gonzalo González Barreñada algama’l Premiu Teodoro Cuesta de Poesía

L’escritor Gonzalo González Barreñada, cola obra ‘Cartes de treslluz’, ye’l ganador del XXXI Premiu Teodoro Cuesta de Poesía qu’entama’l Conceyu de Mieres.

El xuráu tuvo integráu por Pilar Fidalgo, Montserrat Garnacho, Milio Ureta Soto, Pablo Rodríguez Medina y Esther Prieto, actuando como presidenta la conceyala d’Educación Ana Belén Losa y como secretariu’l responsable del Serviciu de Normalización, Luis Suárez.

A esta edición presentáronse doce poemarios y el premiu pa González Barreñada foi por mayoría. El Premiu Teodoro Cuesta ta dotáu con 4.000 euros.

(de La Nueva España, 06-12-2022)

Read Full Post »

Montserrat Garnacho faise col Premiu Fernández Lema de rellatos na categoría d’asturianu

La Fundación Fernández Lema, asitiada en L.luarca, dio anuncia yá de los sos premios de rellatu, qu’inclúin una categoría pa obres n’asturianu, con un premiu de 1.000 euros.

La escritora mierense Montserrat Garnacho resultó ganadora esti añu col rellatu «La Párkinson», que presentó embaxo’l nomatu de Nieves Rodríguez. A la categoría n’asturianu presentáronse 18 testos.

Read Full Post »

L’ALLA presenta’l númberu 35 de Lliteratura na Feria del Llibru de Xixón

Esti domingu 16 de xunu a les 12:00 hores, va presentase na Feria’l llibru de Xixón el númberu 35 de la revista Lliteratura, editada pola Academia de la Llingua Asturiana en collaboración col Conceyu d’Uviéu.

Nel actu que presentará Marta Mori, participarán persones destacaes del mundu del teatru como Sergio Buelga, Xurde Fernández, Antón Caamaño o Lluis Antón González.

Ente los autores presentes na presentación van tar tamién collaboradores nesti númberu de la revista, como Diego Solís o Inaciu Galán. Ente los autores que participen nesti númberu tán tamién Ramón Lluís Bande o Montserrat Garnacho.

(de Formientu, 14-06-2019)

Read Full Post »

‘Cúntame un cuentu’, dieciocho histories que sirven de “ferramientes educatives pa centros y biblioteques”

Esti xueves inauguróse n’Avilés la VI Feria del Libru y el Discu n’Asturianu cola presentación de ‘Cúntame un cuentu’ y ‘Cúntame un conto’, llibros conmemorativos de la XXXIX Selmana de les Lletres Asturianes. Éstos recueyen dieciocho histories pa poder emplegar como “ferramientes educatives” pa la reciella.

Otros tantos escritores y dibuxantes participen de manera desinteresada nesta iniciativa que busca ser “un termómetru del estáu de la nuesa lliteratura dedicada a la xente mozo; un llibru qu’amosare la cantidá y la calidá de los nuesos autores y de los y les ilustradores d’Asturies”, esplicó Chechu García Fernández, xefe de serviciu de Planificación Llingüística y Normalización. Ésti divídise en dos partes, una dedicada a los más neños y otra a los más mozos, yá que la edición d’esti añu de la Selmana tien como exa central la lliteratura infantil y xuvenil.

Read Full Post »

Paco Álvarez gana’l XIX Concursu de Cuentos Pola Oficialidá

L’escritor y periodista Paco Álvarez ganó’l XIX Concursu de Cuentos pola Oficialidá qu’organizó, como tolos años, el Conceyu de Bimenes. Presentóse cola obra ‘El Fotógrafu de la lluna’.

Álvarez faise asina poro con los 600 euros colos que ta dotáu esti primer premiu. El segundu foi pa Montserrat Garnacho, pola obra ‘Perda’, y el terceru pa Laura Marcos. Llevaráse 450 y 300 euros respectivamente caúna.

El ganador del concursu precisamente tará esti martes n’Uviéu presentando la so novela ‘Lluvia d’Agostu’, obra cola que ganó la última edición de premiu Xosefa Xovellanos de narrativa. El llibru ta basáu na vida del líder anarquista Buenaventura Durruti.

(d’Europa Press, 14-06-2016)

Read Full Post »

El tonu asturianu

ANTÓN GARCÍA

Nel 2002 Ediciones Trabe echaba a andar la so aventura de publicar lliteratura n’asturianu pa quioscos cola colección “Maestros del humor”, una iniciativa que quería recuperar los textos que los siguidores de los monologuistes llevaben años pidiendo. Delestal, Anxelu, Fabricio, Quevedo, Ago, Cuesta, Burgos, Campo, Ciaño, Torniello, Sarandeses… fueron dalgunos de los autores “clásicos” rescataos, xunto a otros actuales, como Adolfo Camilo Díaz, Pin de la Cotolla, Cellero, El Maestru, Tino’l Rufo, Xuan d’Amandi, Albalá o Lado. Foi una aventura comercial de manual: a midida que se poníen a la venta los nuevos númberos de la colección, diben menguando les ventes esactamente na proporción prevista pol distribuidor pa esti tipu de llanzamientos. Anque nun resultara un éxitu mercantil, permitió reconciliar al públicu tradicional de la lliteratura nesta llingua col procesu de recuperación cultural, al tiempu que se rindía homenaxe al más popular de los subxéneros lliterarios asturianos con ediciones acuriosaes, en tapa, nes que se procuró evitar los textos que denigraben a les muyeres (los que fain apoloxía de los malos tratos, por exemplu).

Read Full Post »

Trabe ufre una entrega nueva de monólogu modernu cola segunda parte de ¡Pa echar unes rises!

La editorial Trabe acaba de poner nes llibreríes “Más monólogos…¡Pa echar unes rises! II Antoloxía de monólogu modernu”, un llibru que vien a ser la segunda parte de l’antoloxía del mesmu tipu asoleyada en 2008 pola mesma editorial. Nel volume preséntase al públicu llector lo más nuevo del monólogu asturianu. Unos pocos años dempués d’aquella primer antoloxía el monólogu modernu ye un xéneru con una llarga esperiencia, a lo qu’ayudaron iniciatives como’l Premiu Pepe Campo de monólogos, los circuitos d’actuaciones nos teatros y chigres del país y la presencia nos medios, como’l programa “La risión”, na TPA.

Read Full Post »

Samartín entama pela primer vez n’asturianu les Xornaes de Lliteratura Infantil y Xuvenil

El Conceyu de Samartín del Rei Aurelio presentó esta selmana les X Xornaes de Lliteratura Infantil y Xuvenil, entamaes dende la Conceyalía de Cultura, al traviés de la Oficina de Normalización Llingüística. La novedá esti añu ye l’usu, pela primer vez, de la llingua asturiana en toles actividaes d’estes xornaes. Tol programa va desendolcase na Casona del Bravial, en Blimea, a les 19:00 hores.

Los actos van empecipiar el martes 22 de payares, cola presentación del llibru A pespunte, de Montserrat Garnacho, obra ganadora del premiu María Xosefa Canellada 2010 concedíu pola Conseyería de Cultura y Turismu del Principáu d’Asturies y editáu por Trabe.

Read Full Post »

Paquita Suárez Coalla gana’l Mª Josefa Canellada de Lliteratura Infantil y Xuvenil

La escritora de Candamu Paquita Suárez Coalla resultó ganadora de la cuarta edición del premiu de Lliteratura Infantil y Xuvenil n’asturianu “MªJosefa Canellada” que concede la Conseyería de Cultura d’Asturies.

El xuráu, qu’aconceyó esti vienres 4 de payares na Casa de Cultura “Mª Josefa Canellada” de Santolaya de Cabranes, decidió por unanimidá concedé-y el premiu a la obra de Suárez Coalla titulada “Camín de lletres: d’Asturies a Nueva York” al valorar la so orixinalidá na construcción narrativa y na temática, qu’aborda la realidá de la emigración asturiana d’anguaño. Asina mesmo’l xuráu sorraya la posibilidá de llectura per parte de diferentes edaes y estayes educatives y la naturalidá nel usu del asturianu del testu.

Read Full Post »

Trabe espubliza l’últimu premiu MªXosefa Canellada

La editorial Trabe ta acabante d’asoleyar “A pespunte”, llibru col que la escritora Montserrat Garnacho algamara l’últimu premiu MªXosefa Canellada de Lliteratura Infantil y Xuvenil.

“A pespunte” ye una obra que recueye una riestra de cuentos tradicionales que se tresformen en pequeñes obres de teatru cencielles y enllenes d’humor. Montserrat Garnacho (Mieres del Camín, 1952) ye bona conocedora d’esti xéneru pues na mesma llinia tien espublizaos yá los llibros “Maruxes y Xuanes”, “La sal y el formientu” y “El formientu y la sal”. Asina mesmo, na lliteratura infantil rescamplen títulos como “Avisónos una estrella” o “Coles tripes na garganta”, que vienen a sumase a les publicaciones de calter más etnográficu de l’autora de Mieres: “Caleyes con oficiu” o “Hombres y carbón, mujeres mineras”.

Read Full Post »