La segunda promoción del Surdimientu

ANTÓN GARCÍA

A mediaos de los ochenta del pasáu sieglu XX aparez na escena cultural asturiana un grupu d’escritores que vien recibiendo’l nome de Segunda Promoción del Surdimientu, anque nun falten otres propuestes, como Xeneración del Conflictu. Ye un grupu que dexa claro dende mui ceo que quier marcar diferencies colos sos hermanos mayores promoviendo la idea de que formen una nueva xeneración en marcha. Estos autores van facer una revisión crítica de la lliteratura inmediatamente anterior poniendo de manifiestu les diferencies existentes ente lo qu’ellos entendíen qu’había ser el camín de la nueva lliteratura y lo que se taba faciendo. Enuncien l’aparición d’esa nueva xeneración lliteraria, que ye la d’ellos; refuguen l’asturianu tapecío que veníen defendiendo Conceyu Bable y l’Academia de la Llingua Asturiana y proponen como modelu de llingua lliteraria otra distinta, basada, primero, na fala cotidiana y, segundo, na tradición lliteraria principalmente del sieglu XIX y del primer terciu del XX.

Read Full Post »

García Oliva: «Los cuentos de los políticos son mui malos: namás valen pa engañanos»

DAMIÁN BARREIRO

Vicente García Oliva ye ún de los nomes más destacaos de la primer xeneración del Surdimientu. Esti xixonés foi ún de los fundadores de Conceyu Bable na so ciudá natal y ta consideráu’l pá de la lliteratura xuvenil n’asturianu gracies a títulos como Fontenebrosa o Les aventures de Xicu y Ventolín. Esti académicu tamién ye autor de L’aire de les castañes, novela negra que ye una de les poques que toca la homosexualidá dientro la nuestra lliteratura. Agora, Vicente García Oliva vuelve a les llibreríes con El síndrome de Sherezade, obra que ganó’l Premiu Máximo Fuertes Acevedo nel 2010.

¿Qué ye’l síndrome de Sherezade?
A esti personaxe –que nun entiendo cómo les feministes nun lu garren con más interés– los cuentos valiéron-y pa salvar la vida. Otra manera, a la humanidá los cuentos valiéron-y pa esplicar la existencia. Por eso faigo una simboloxía ente estes dos partes. Los cuentos nacen nel mesmu momentu que naz el ser humanu. Ésti invéntalos porque nun tien una esplicación científica de lo que ta pasando. Al nun conocer la so realidá inmediata tien qu’inventar una realidá acordies cola mentalidá de la época. A partir d’equí nacen histories realmente guapes. Por exemplu, la xente na cueva preguntábase qué yera’l truenu y al nun tener una esplicación científica dicíen que yera un dios que taba ehí enriba enfadáu porque se fixera dalgo mal. Lo mesmo pasó con otros enigmes de la humanidá, como’l día y la nueche o la muerte, que tovía ye güei’l gran misteriu de la existencia. Por eso nacieron les relixones: pa dar una esplicación y que les persones tuvieren la esperanza de que cola muerte nun acababa too.

Read Full Post »

Cangas entama la so VIII Selmana Cultural

El conceyu de Cangas entama la so VIII Selmana Cultural ente’l 23 y el 28 de marzu. Esta edición va dedicase al escritor autodidacta de Mieldes, Basilio Garrido, que cunta con obres escrites n’asturianu occidental y castellán, poles que foi yá homenaxeáu nel II Alcuentru d’escritores n’asturianu occidental nel añu 2006. Recitales, presentaciones de llibros, teatru y conciertos conformen la programación d’esti eventu.

Col títulu “Basilio Garrido. Del l.labiegu a la pluma” emprincipia esta VIII Selmana Cultural entamada pol Conceyu de Cangas del Narcea. El llunes a les 19.30 va presentase na Llibrería Treito’l poemariu d’Inaciu Llope “El combate melancólicu” y a les 20:30 va proyectase nel teatru Toreno “Filandón en Xedré” de Naciu i Riguilón. El martes tamién nel Toreno a les 20:30 va representase “La trastienda de los enredos”. El miércoles nel mesmu escenariu y a la mesma hora va haber un recital con llectura de testos de Basilio Garrido a cargu de Xuan Bello, Antón García, Inaciu Llope, Chema Rodríguez, Esther García, Roberto González-Quevedo y Ernesto G. del Castillo “Neto”. Darréu va haber un conciertu de los cantautores Rafa Lorenzo y Pedro Pereiro y van entregase los premios del VI Concursu de Cuentos n’asturianu occidental.

Read Full Post »