Les XII Xornaes de Lliteratura Infantil y Xuvenil de Samartín del Rei Aurelio entamen en Payares con talleres y teatru

Les XII Xornaes de Lliteratura Infantil y Xuvenil de Samartín del Rei Aurelio dirixíes a escolinos de toles edaes entamen el próximu llunes 4 de payares cola principal novedá d’esti añu de los talleres de llectura entamaos dende la Oficina de Normalización Llingüística de Samartín del Rei Aurelio en collaboración cola asociación Bocina Nalón y la Oficina d’Información Xuvenil del conceyu.

La Conceyalía de Cultura, Educación, Igualdá y Deportes de Samartín del Rei Aurelio va celebrar esti mes de payares la décimosegunda edición de les sos Xornaes de Lliteratura Infantil y Xuvenil. La programación inclúi espectáculos teatrales, talleres infantiles y esposiciones dirixíes a los escolinos del conceyu colos que se pretende fomentar los vezos llectores y foi presentada esta selmana nel Ayuntamientu de SMRA.

Read Full Post »

Samartín entama una campaña pa reforzar l’usu de los topónimos tradicionales ente la población

‘Los nomes de llugar nun tienen preciu’ ye’l nome de la campaña qu’entama Samartín del Rei Aurelio pa reforzar l’usu de los topónimos tradicionales, agora oficiales, ente la población. L’alcalde Fernández participa de forma activa.

La Oficina de Normalización Llingüística de Samartín del Rei Aurelio editó un total de 2.000 chapes metáliques colos nomes de los 52 topónimos mayores del conceyu que se van repartir ente la población, a lo qu’hai que sumar pegatines col nome del conceyu y cartelos promocionales de la campaña que van distribuyise n’edificios públicos como biblioteques, polideportivos o telecentros. L’oxetivu ye “reforzar l’usu de la toponimia oficial del conceyu, aprobada por decretu nel añu 2008”, señalen dende’l SNL que dirixe Hugo Fanjul. Completa esta iniciativa un videu de Pablo A. Quiroga nel qu’apaecen l’alcalde Enrique Fernández, l’ilustrador Alfonso Zapico, el cantante Chus Pedro y Aurora Suárez, direutora de Refaxu, comentando la so rellación con dalguna de les poblaciones del conceyu utilizando la forma asturiana.

Read Full Post »

La llingua tará presente na Feria FEMEX de Samartín del Rei Aureliu

La Feria de Muestres y Esposiciones que se celebra esti fin de selmana en Samartín va dedicar un espaciu a informar sobre les actividaes d’esti serviciu y pa esponer parte del trabayu que lleva faciendo a lo llargo de los sos 8 años d’esistencia. Amás d’esto, quier ser un puntu d’información pa toes aquelles persones (empresarios, miembros d’asociaciones, personal docente…) a les que-yos pudiera resultar útil el trabayu que se desendolca dende esti serviciu.

Esti próximu fin de selmana, dende’l vienres 6 al llunes 9 de setiembre celébrase en Samartín la 23 edición de la Feria de Muestres y Esposiciones FEMEX nel recintu del parque d’El Florán. Esta actividá ta entamada pol Ayuntamientu de Samartín del Rei Aurelio, la Conseyería d’Economía y Emplegu, la Cámara de Comerciu d’Uviéu y Cajastur. El recintu ferial va tar formáu por 52 espositores nos que van tar representaos diversos sectores como l’alimentación, los servicios, la moda, el calzáu, los complementos, los muebles, la decoración o l’automoción. Tamién va haber espaciu pa otros stands institucionales del propiu Ayuntamientu de Samartín, de l’asociación de comerciantes Ecosam, de Cogersa, de Radio Samartín o de la Asociación de Discapacitaos Rei Aurelio, ente otros.

Read Full Post »

Antón García y Esther Prieto recordaron en Blimea los 21 años de trayeutoria d’Ediciones Trabe

El fundador d’Ediciones Trabe, Antón García, y la codireutora de la editorial anguaño, Esther Prieto, protagonizaron esti miércoles un actu na Casona del Bravial. Nél repasaron la trayeutoria de la empresa uviedina nos sos 21 años de vida.

El que fora direutor de Trabe hasta 2007 recordó na so intervención el primer llibru qu’espublizó, ‘Ventiún poemes’ de Pepín de Pría, y fixo referencia a otros títulos importante na historia de la editorial, como la torna al asturianu de ‘La odisea’, d’Homero, fecha por Xosé Gago, o’l diccionariu d’asturianu de Xuan Xosé Sánchez Vicente. Pela so parte, Prieto, direutora de la empresa xunto con Samuel Castro dende ochobre, centróse más nos llibros editaos nos años últimos, como la traducción al asturianu de ‘Harry Potter y la piedra filosofal’, ente otros. Amás, tanto García como Prieto recordaron anéudotes d’estos años y punxeron de manifiestu les dificultaes que tien el mercáu editorial anguaño.

Read Full Post »

Samartín del Rei Aurelio lleva la lliteratura asturiana a los escaparates del conceyu

El comerciu de Samartín pon “La llingua nel escaparate”. La Conceyalía de Cultura y la Oficina de Normalización Llingüística de Samartín del Rei Aurelio acaben d’entamar una nueva campaña pa fomentar la lliteratura n’asturianu con motivu de la XXXIV Selmana de les Lletres Asturianes. Baxo l’eslogan “La llingua nel escaparate” y dende’l 29 d’abril al 3 de mayu 85 comercios de L’Entregu, Sotrondio y Blimea van tener espuestos nos sos escaparates un mínimu de dos llibros n’asturianu.

A tolos establecimientos participantes va entregáse-yos un cartel col eslogan de la campaña, cartel nel que tamién s’incluyen instrucciones pa que la xente interesao pueda participar nella, yá que van poder ganar un llote de llibros n’asturianu si durante esa selmana respuenden d’un mou correutu a les entrugues que se van facer dende la páxina de facebook de la Oficina de Normalización Llingüística del conceyu rellacionaes con toos esos llibros.

Read Full Post »

L’Entregu va acoyer una esposición sobre escritores n’asturianu del conceyu

L’Institutu d’Enseñanza Secundaria Virxe de Cuadonga de L’Entregu va acoyer dende’l 29 d’abril al 3 de mayu una esposición sobre los escritores de Samartín del Rei Aurelio. Na muestra incluyénse 10 paneles onde se fai un repasu de la biografía, obra y testos de distintos autores del conceyu como Xulio Arbesú, Pablo Rodríguez Medina, Chechu García o Manuel Asur, ente otros.

Amás, a lo llargo de la selmana l’alumnáu del centru va trabayar cuestiones rellacionaes colos conteníos d’esta esposición, y van ser ellos mesmos los que busquen y ellaboren información complementaria a la qu’ufierten los paneles. Asina, cartelos ellaboraos por ellos mesmos sobre estos autores van sirvir de complementu a la propia esposición.
Esta muestra forma parte del programa d’actividaes entamáu dende la Conceyalía de Cultura de Samartín del Rei Aurelio y la Oficina de Normalización Llingüística en collaboración con distintos centros educativos pa celebrar la XXXIV Selmana de les Lletres Asturianes.

(d’Asturnews, 23-04-2013)

Read Full Post »

La piscina de Sotrondio yá fala n’asturianu

Dende va unes selmanes la piscina pública de Samartín, asitiada en Sotrondio, presenta nueva rotulación informativa en cauna de les sos dependencies, de mou qu’a partir d’agora, amás d’ufiertar la información en castellán, failo tamién n’asturianu. Sigue asina un procesu que’l Conceyu de Samartín yá entamó fai varios años y col que yá se llevó a cabu la rotulación billingüe d’otros edificios públicos como la Casa Conceyu o los polideportivos de Blimea y L’Entregu.

Read Full Post »

El Conceyu de Samartín diz que nun va tolerar «que se critique’l nuestru respaldu a la llingua»

Gema Suárez, conceyala de Cultura de Samartín del Rei Aurelio, afirmó que nun van tolerar que se critique’l respaldu de la institución que dirixe hacia la llingua «con acusaciones infundaes». Asina, la Conceyalía respuende a les crítiques de la formación Conceyu Abiertu por que la páxina web del Conceyu nun tuviera disponible tamién en llingua asturiana, dalgo que pa los nacionalistes yera «una actitú de despresciu y marxinación pa cola llingua asturiana y pa cola cultura que representa».

La edil de Cultura, que defende’l compromisu «firme» del Conceyu de Samarín pa cola llingua, califica de «ofenses» al trabayu «responsable y eficiente» de la Oficina de Normalización Llingüística Municipal les declaraciones de Conceyu Abiertu. Nes mesmes, la formación afirmaba que Samartín tien un serviciu de normalización llinguística que debería encargase de xestionar esti tema y actualizar la web «de mou que quede una versión n’asturianu normativu».

Read Full Post »

Samartín del Rei Aurelio usa l’asturianu nes Rebaxes

La Oficina de Normalización Llingüística de Samartín del Rei Aurelio en collaboración cola asociación d’Empresarios y Comerciantes de Samartín del Rei Aurelio ECOSAM entama’l repartu de la cartelería pa la campaña de REBAXES d’esti branu. Los comerciantes que nun pertenezan a esta asociación pueden solicitar estos materiales ensin nengún costu nel teléfonu 985656110 o al traviés del corréu lletrónicu llingua@smra.org.

(d’Asturnews, 03-07-2012)

Read Full Post »

Samartín presenta les actividaes del Día de les Lletres cola mocedá como protagonista

El Conceyu de Samartín del Rei Aurelio presentó les actividaes que tien entamaes pal Día del Llibru y aprovechó tamién p’avanzar el programa que tien iguáu pa la Selmana de les Lletres Asturianes. Búscase nesos díes que les xeneraciones más moces s’aficionen a la lliteratura n’asturianu y conozan toles cuestiones qu’arrodien la llingua y el so procesu de normalización. Del 30 d’abril al 4 de mayu na Casona del Bravial van facese dellos actos nos que l’alumnáu de secundaria va participar activamente.

Read Full Post »