Padilla acudió a València pa falar de la situación llegal del asturianu

El 9 y el 10 de xunu, la Rede Europea pola Igualdá Llingüística / European Language Equaility Network (ELEN), a la que pertenece esti coleutivu, celebró un conceyu en València nel que tamién s’entamó un actu de presentación del ‘Protocolu pa la Garantía de los Drechos Llingüísticos’ robláu n’avientu en Donostia. Pablo Arce representó a Iniciativa pol Asturianu nestes xornaes, na qu’acudió como convidáu Fernando Padilla.

El direutor xeneral de Planificación Llingüística y Normalización esplicó nuna conferencia la situación llegal del asturianu y gallego-asturiano, mentes qu’Arce faló del momentu que vive l’idioma dende’l puntu de vista cívicu y reinvindicativu. Otros de los participantes destacaos foron Sixto Molina, secretariu xeneral de la Carta Europea de les Llingües; la eurodiputada d’Esquerra Unida, Marina Albiol, que s’amosó crítica col tratamientu de les llingues minoritaries dende Bruseles; y Rafael Castelló, profesor de la Universitat de València que dio una visión del espoxigue del valencianu na universidá.

(d’Asturies.com, 20-07-2017)

Read Full Post »

“Ye la llexislatura con más diputaos a favor de la oficialidá, 17 de 45”

PABLO R. GUARDADO

Segunda y cabera parte de la entrevista a Inaciu Galán y González (Xixón, 1986), presidente d’Iniciativa pol Asturianu, que va viaxar esta selmana a Suiza pa intervenir na ONX.

Nestos trés años, dende que nació Iniciativa pol Asturianu, ¿la situación del idioma vivió avances o retrocesos?
La situación ye mala y va peor, no que cinca a la vitalidá de la llingua y a que les autoridaes siguen ensin garantizar la llibertá de los ciudadanos pa qu’al terminar el sistema educativu puedan escoyer qué llingua falen, porque salgan bien formaos n’asturianu y castellán, y porque esista una oficialidá que garantice’l drechu a usala en tolos ámbitos.

Por embargu, el sofitu de cada vegada más partíos de tol espectru políticu y l’enorme consensu social a favor del asturianu, más d’un 60% de partidarios de la oficialidá según les encuestes, faenmos ser positivos al respective del futuru. Tamos a tiempu de cambiar la tendencia que lleva l’asturianu hacia la desapaición en poques décades y tamos enfotaos en que vamos consiguilo.

Nel ámbitu de la reivindicación ta faciéndose cada vegada un meyor trabayu. L’importante llabor reivindicativu de la Xunta pola Defensa de la Llingua Asturiana impulsando la manifestación cada añu; el llabor sectorial de Softastur, nel campu de la informática; de Reciella, families pol asturianu, cola tresmisión del idioma a los neños; y otres organizaciones d’otru tipu como El Ronchel, Ástura, El Teixu, N’Ast, Faceira y Furmientu en Lleón, grupos de trabayu dientro de los partíos, asociaciones, llocales sociales…

Hai un movimientu plural, ampliu y que ye exemplu de convivencia. Tovía mos queda, sí me paez, un pasu más, una mayor coordinación de tol movimientu.

Read Full Post »

Galán: “Ye necesario implicar a la sociedá si queremos que l’idioma tenga futuru” (I)

PABLO R. GUARDADO

Inaciu Galán y González (Xixón, 1986) entama con ilusión un mandatu nuevu de trés años al frente d’Iniciativa pol Asturianu. Asturies.com ufre la primer parte de la entrevista col escritor, que va tener continuidá’l llunes.

¿Cómo afronta esta etapa nueva na presidencia d’Iniciativa pol Asturianu?
Con ganes, sabiendo que ye pa min la segunda y última parte d’un camín qu’entamaba en 2011 cola fundación d’Iniciativa pol Asturianu. Entós tuvimos que construyir una organización de cero, dala a conocer, crear un estilu propiu y caltener esi llabor a lo llargo de trés años. Agora l’oxetivu ye dir afitando la organización, creciendo y sobre manera faciendo medrar la nuesa implantación social y capacidá d’influencia. Siguimos teniendo nidio que ye necesario implicar a la sociedá na reivindicación llingüística si queremos que l’idioma tenga futuru.

Read Full Post »