Ana Esther Martínez Sierra gana’l concursu de cuentos pola Oficialidá de Bimenes na so decimoctava edición

Ana Esther Martínez Sierra (Nava, 1970) foi la ganadora del Concursu de Cuentos pola Oficialidá del Asturianu, que convoca’l Conceyu Bimenes y qu’esti añu llegó a la so decimoctava edición. El primer premiu, dotáu con 600 euros, foi pa la so obra “Ensin fades, ensin perdices”. El segundu premiu, dotáu con 450 euros, foi pal cuentu “Stylommantophora”, de Laura Marcos Domínguez (Mieres, 1982), y Héctor Pérez Iglesias (Llanera, 1978) algamó’l tercer premiu, al que se-y apurren 300 euros, con “Si verde”.

Nesta edición el xuráu tuvo compuestu polos escritores Xulio Vixil Castañón, Isabel Gutiérrez Novo y Pablo Rodríguez Alonso, amás de pol Alcalde Bimenes, Alejandro Canteli Rozada, y el técnicu responsable de la Estaya de Cultura, Daniel Cueli Canto, que ficieren les funciones de Presidente y Secretariu respeutivamente. Nos prósimos díes daráse anuncia de la fecha y del llugar d’entrega premios.

(d’Asturnews, 10-06-2015)

Read Full Post »

¡Hablad en cristiano! Procesos de nacionalización llingüística na construcción de los estaos-nación

Pablo Rodríguez Alonso
Batura, 23
ISBN: 978-84-8053-753-7
14 x 21,5 cm || 244 páxs. || PVP: 12 €

Tocante a la diversidá llingüística de la humanidá, l’autor d’esti ensayu parte de dos premises básiques. D’una parte, la esistencia d’infinidá de llingües ye una característica del ser humanu: la glotodiversidá ye lo natural. D’otra, el panorama llingüísticu nunca foi estable, sinón dinámicu: a lo llargo de la historia nacieron y morrieron idiomes. Sicasí, l’actual ritmu de desaniciu ye enforma altu (por exemplu, según dellos llingüistes, el 50 % de les 6.000 llingües del mundu van desapaecer nun sieglu).

Partiendo d’estes dos premises, l’autor tenta nesta obra d’analizar el porqué de la desapaición de les llingües anguaño, qué procesos históricos y sociales tán detrás de la sustitución llingüística y pa ello va exemplificar el procesu de cambiu idiomáticu nos procesos de nacionalización llingüística desarrollaos nel Reinu Xuníu, Francia y España (con especial dedicación al casu del asturianu y ensin escaecer los procesos de castellanización d’América y de les otres colonies). Amás d’ello, descríbese en qué consiste’l procesu de «nacionalización llingüística» y el rol del idioma na construcción de los discursos nacionales o nacionalistes.

Read Full Post »

El 27 de xunu entregaránse los premios del Concursu de Cuentos pola Oficialidá

El prósimu vienres, 27 de xunu, entregaránse los premios del XVII Concursu de Cuentos pola Oficialidá del Asturianu, que convoca’l Conceyu Bimenes. L’actu, abiertu al públicu, va tener llugar na Sala de Conceyos del Ayuntamientu yerbatu, en Martimporra, de magar les 18’00 hores, y nel trescursu del mesmu fadráse una llectura pública del cuentu ganador na voz del so autor, Pablo Rodríguez Alonso (Xixón, 1979).

Rodríguez Alonso, ye’l primer premiáu, y participó nel certame cola obra “L’invitáu” que va llevar los 600 euros empobinaos pa esti primer premiu. El segundu premiu, dotáu con 450 euros, foi pal cuentu “El foriatu”, d’Elisabet Felgueroso López (Llangréu, 1980), y Francisco Álvarez González (Xixón, 1970) algamó’l tercer premiu, al que se-y apurren 300 euros, con “Una nueche en La Belle Alliance”.

(d’Infoasturies, 20-06-2014)

Read Full Post »

Pablo Rodríguez Alonso gana’l Concursu de Cuentos pola Oficialidá

Pablo Rodríguez Alonso (Xixón, 1979) foi’l ganador del Concursu de Cuentos pola Oficialidá del Asturianu, que convoca’l Conceyu Bimenes y qu’esti añu llegó a la so decimoséptima edición. El primer premiu, dotáu con 600 euros, foi pa la so obra “L’invitáu”. El segundu premiu, dotáu con 450 euros, foi pal cuentu “El foriatu”, d’Elisabet Felgueroso López (Llangréu, 1980), y Francisco Álvarez González (Xixón, 1970) algamó’l tercer premiu, al que se-y apurren 300 euros, con “Una nueche en La Belle Alliance”.

Nesta edición el xuráu tuvo compuestu polos escritores Xulio Vixil Castañón, Héctor Pérez Iglesias ya Isabel Gutiérrez Novo, amás de pol Alcalde Bimenes, Alejandro Canteli Rozada, y el técnicu responsable de la Estaya de Cultura, Daniel Cueli Canto, que ficieren les funciones de Presidente y Secretariu respeutivamente. Nos prósimos díes daráse anuncia de la fecha d’entrega premios, que tendrá llugar na Casa Conceyu de Martimporra.

(d’Infoasturies, 11-06-2014)

Read Full Post »

Berto García: “Escribo porque necesito dexar constancia de tolo que m’arrodia”

INACIU GALÁN

Berto García ñaz en Les Vegues (Corvera), en 1975. “Inercia” ye’l quintu poemariu que da a imprenta l’autor. Premiu Fernán-Coronas 2007 y Premiu Llorienzu Novo Mier 2009, tien amás bien d’obra espardío peles revistes lliteraries del país, como El Canciu’l Cuélebre, Lletres Asturianes, Lliteratura, Formientu… Autor de tornes na estaya de la lliteratura infantil, ye amás maestru d’Educación Infantil, amás d’espertu en Llingua Asturiana. Aprovechamos la salida a les llibreríes d’“Inercia”, pa falar con él de poesía y d’otres cuestiones na Entrevista de la selmana.

Con “Inercia” llega al so quintu poemariu, ¿qué balance fai?
Faigo un balance mui positivu. Llego, como bien dices, al quintu llibru, a un puntu na mio carrera lliteraria que nun imaxinaba cuando entamé a escribir los primeros poemes y a publicar dellos d’esos poemes nes distintes revistes: El canciu’l cuélebre, Entellunu, Lletres Asturianes. Depués llegó’l primer llibru con Trabe nel 2005, Ensin otra sida; dos años depués Treslallende con Carlos Suari: un llibru mui especial por munches razones; el Premiu Fernán Coronas nel 2007, Manual contra’l vacíu, y la so edición; nel 2009 el Premiu de l’Academia, el Llorienzu Novo Mier, con Cuando’l mundu debala, cola so edición nel 2011, que facía yá’l cuartu na llista de los mios llibros, un númberu importante d’obres. Y agora, Inercia, el quintu, un pasín más, non l´últimu, anque entá nun sé de cuántos nesti camín poéticu qu’entamé fai yá dellos años.

Read Full Post »

Unos premios pa homenaxar a una lliteratura de lleendes urbanes

DAMIÁN BARREIRO

Berta Piñán (La mio hermana ye una mofeta, premiu infantil), Pablo Rodríguez Alonso (De totalitarios a demócrates, ensayu) y Xabiero Cayarga (El sol negru de Wewelsbur, narrativa, y La ñeve del cuquiellu, poesía) foron los escritores gallardonaos colos Premios Críticos de les Lletres Asturianes, que convocó la Xunta pola Defensa de la Llingua Asturiana (XDLA). Trátase de cuatro obres que, según la organización, tienen en común una visión universal, «exemplu de cómo al traviés de lo nuestro podemos llegar a onde queramos del mundu, porque les llendes nun son llingüísitiques, sinón mentales».

Los premios, presentaos por Miguel Rodríguez Monteavaro y Llucía Menéndez, entregáronse esti 30 de payares na Galería Texu d’Uviéu y consistieron nun gallardón obra de Mónica Álvarez Viña, que creó’l diseñu artesanalmente. Los premios quieren ser el puntu de partida pa que nun futuru los escritores n’asturianu y les editoriales s’asocien y puxen por facer ente toos «daqué meyor de lo que nós, humildemente, podamos organizar».

Read Full Post »

Pablo Rodríguez Alonso gana’l Premiu Críticu de les Lletres Asturianes na estaya d’ensayu

L’historiador xixonés Pablo Rodríguez Alonso algamó’l Premiu Críticu de les Lletres Asturianes na categoría d’ensayu pola obra «De totalitarios a demócrates. Franquismu, fascismu y nazismu na II Guerra Mundial al traviés del diariu xixonés Voluntad» qu’espublizara nel 2011 Zahorí Ediciones. Esta obra, que yá algamara’l XII Premiu d’ investigación y divulgación «Rosario de Acuña», estudia cómo’l diariu xixonés Voluntad, creáu en 1937 como mediu d’espresión de Falanxe, empondera’l totalitarismu nazi y fascista y, per otra parte, denuncia les democracies y les llibertaes. Sicasí, el periódicu xixonés va dir cambiando esti discursu al empar que cambia l’escenariu internacional, marcáu pola derrota d’Alemaña, Italia y Xapón na Segunda Guerra Mundial. Asina, Pablo Rodríguez Alonso fai un analís pormenorizáu del posicionamientu ideolóxicu de Voluntad ente los años 1938 y 1946 y de cómo quixeron pasar de «totalitarios» a «demócrates».

El xuráu del Premiu, formáu por Rafael R. Valdés, Antón García y Xuan Xosé Sánchez Vicente, decidió por unanimidá conceder el premiu a esta obra pola so contribución a los estudios históricos, de la que destacaron el rigor nel tratamientu de la información y el so bon facer metodolóxicu, abordando cuestiones históriques internacionales al traviés del estudiu de lo local.

Read Full Post »

«Podría arrenunciase a subvenciones si tuvieren garantizaos los derechos llingüísticos y se crearen falantes»

HENRIQUE FACURIELLA

L’escritor Pablo Rodríguez Alonso (Xixón, 1979) acaba de publicar con Trabe’l so segundu poemariu, Palabres d’un tiempu, col que ganó’l Premiu Nené Losada Rico na so convocatoria del 2010. Ye esti’l poemariu d’una persona adulta, d’una persona a la que-y tocó pasar per delles d’eses barreres non solo cronolóxiques –los trenta años– sinón, sobre manera, vitales –la muerte de la madre– que faen echar la llave al cuartu de la mocedá. La mirada a esi presente y a esi pasáu ye dacuando ácida, dacuando asosegada, pero siempre reflexiva y mirando a la realidá a la cara. Pero la mirada de Rodríguez Alonso ye, amás de la del poeta, la del articulista y historiador qu’analiza en perspectiva la cultura y la llingua asturianes, asitiándoles onde-yos correspuende énte argumentos tan falaces como interesaos. Bonos exemplos d’esti trabayu puen atopase nel so blog Memoria d’un silenciu.

El tiempu del que fala’l títulu y les sos palabres, ¿son el presente nel qu’escribe’l yo poéticu o un pasáu indetermináu?
Ye’l presente d’esi yo qu’escribe. Visto agora en perspectiva, ye lo que pensaba o lo que sentía esi yo nesi momentu pero, evidentemente, col pasu del tiempu pue cambiar. Son fotografíes d’un momentu, d’un estáu d’ánimu y d’una forma de contar esi estáu d’ánimu.

Read Full Post »

Trabe edita’l poemariu ganador del Nené Losada

Ediciones Trabe acaba de publicar el segundu poemariu de Pablo Rodríguez Alonso, Palabres d’un tiempu. Trátase d’una obra de madurez, de palabra pausada, pero inquietante. Abren el llibru versos precisos de quien s’enfrenta a la vida adulta sabedor de que les palabres d’esti tiempu son palabres mayores, lloñe de les rises y l’esfrute de la neñez: palabres d’un tiempu «fatigáu d’esperances». La desolación de la vida adulta, de la muerte de la madre o del amor como pasáu o como presente esgarrador, andolien los versos apotaos y firmes d’esti poemariu col que l’autor foi a facese col Premiu Nené Losada Rico na so convocatoria del añu 2010.

Read Full Post »

Denis Soria gana’l primer premiu del XX Concursu de cuentos curtios El Garrapiellu

Esta selmana aconceyó’l xuráu del XX Concursu de Cuentos Curtios El Garrapiellu pa fallar los gallardonaos d’esta edición. Dempués d’aldericar en Xixón, llegóse al alcuerdu de declarar ganador al rellatu “La vengación”, que resultó ser de Denis Soria Fernández, un autor mozu ñacíu en Xixón en 1989. El primer premiu ta dotáu con 900 euros. El xuráu decidió, amás, dar un accésit de 300 euros al rellatu “Vae victis”, de Pablo Rodríguez Alonso, autor ñacíu en Xixón en 1979 y con delles publicaciones yá nel mercáu lliterariu.

El xuráu d’esta XX edición taba formáu pol académicu de la llingua Vicente García Oliva, pol escritor y ganador de la cabera edición Sergio Manuel Buelga Casas, pol escritor y editor Milio Rodríguez Cueto y pol escritor José Luis Rendueles.

Read Full Post »