L’amor sanxuanín

XOSÉ LLUÍS CAMPAL FERNÁNDEZ

El resclavu amorosiegu domina la mayor parte de les composiciones de los nuesos poetes bables. Pachu’l Péritu failo nun fargatáu d’ocasiones, como na pieza entitulada ‘La verbena de San Xuan’, qu’enxerta’l selmanariu llaniscu ‘El Pueblo’ nel so númberu del primer día de xunu de 1929. Depués de presentamos a los protagonistes, l’autor pasa, ensin que rinche, al megollu argumental: l’acoricamientu d’un amor aldeganu añáu dende la neñez y un involuntariu enquívocu que tará nun tris d’abrir la puerte de los celos y les prebes d’amor. L’aciertu del vate xixonés afítase en desarmar el desengañu que la moza maxina col arranque sinceru del galán nun contestu enforma favoratible pal bonal resultáu de la pidida como ye’l de la foguera de San Xuan, purificadora de pensamientos foínos. A la cenciellez espositiva amesta’l versificador una carga etnográfica que s’evidencia de muncha utilidá pa los siguidores de les costumes tradicionales, agora perdíes pero en víes de recuperación a poco que lo deseyemos.

Read Full Post »

L’arribada del fonógrafu

XOSÉ LLUIS CAMPAL FERNÁNDEZ

Tamién los pas de la poesía festiva en bable tovieron sollertes a los inventos que la cencia apurriere nel pasu del sieglu XIX al XX, a los avances que diben aportando a España. Daben preba de nun tar atascaos nunes concretes temátiques de costumismu rural. Asina, Francisco González Prieto fálamos en 1902, nuna composición dialogada de 57 versos d’arte menor, del fonógrafu que fabricare’l físicu norteamericanu Thomas Alva Edison. Nun ye asuntu raru pa un poeta que, ente otres coses, diría a polemizar depués, nel so particular estilu, cola teoría de la relatividá d’Einstein.

Read Full Post »

Una moyadura nes fiestes de Granda

XOSÉ LLUIS CAMPAL FERNÁNDEZ

Aficionáu al romance asonante de llargu recorríu, l’escritor xixonés Francisco González Prieto remembró na poesía entitulada ‘La fiesta de Sant’Ana’ (espublizada’l 6 de xunetu de 1929 en ‘El Pueblo’, de Llanes) los intríngulis d’una romería tradicional, nesti casu la de Granda. L’esquema ye asemeyáu al d’otres composiciones del autor: un personaxe pon a otru al corriente d’un casu que-y asocediera, polo qu’el diálogu que s’establez ente ambos ye namái’l pretestu pa qu’un de los intervinientes facilite que l’auténticu protagonista -equí Pachín, acompañáu de dos collacios- cunte la hestoria y faiga una descripción ocurrente de les cellebraciones lúdiques que se daben nel mediu rural (baille, xinta y bebida) y de les táutiques de cortexu (con enclín nel significáu floral), pero ensin dexar de tocar, de pasada, asuntos graves como la murnia que produz el directoriu o dictadura de Primo de Rivera.

Read Full Post »

Mercar de baldre na feria

XOSÉ LLUÍS CAMPAL FERNÁNDEZ

Francisco González Prieto dató en Xixón na primavera de 1929 un diálogu representable (lleva acotaciones) ente dos personaxes, Ruperto y Perico, rotulándolu ‘La feria de San Antón’. Asoleyólu’l selmanariu de Llanes ‘El Pueblo’, nel númberu correspondiente al 18 de mayu d’aquel añu. Recueye, con della axilidá, un rellatu versificáu nel que s’espeya’l calter inxeniosu del tratante vocacional: Ruperto, tres referimos l’ambiente festivu d’una de les munches feries consagraes n’Asturies al patrón los animales, espellica l’apañu que fexo pa que la compra d’un burru saliéra-y de baldre.

Read Full Post »

Consello da Cultura Galega

* BABARRO GONZÁLEZ, Xoán (2004): “A fronteira do galego en Asturias” in A Lingua Galega: historia e actualidade : actas do I Congreso Internacional, Santiago de Compostela, 16-20 de setembro de 1996, vol IV. p. 317-330.
* GONZÁLEZ PÉREZ, Clodio (2002): “Aspectos lingüísticos e tecnolóxicos do val de Fornela” in GONZÁLEZ REBOREDO, Xosé Manuel; COSTA VÁZQUEZ-MARIÑO, Luis; GONZÁLEZ PÉREZ, Clodio: Nos lindeiros da galeguidade : estudio antropolóxico do val de Fornela: (etnohistoria, etnomusicoloxía, etnografía). Santiago de Compostela: Consello da Cultura Galega, Sección de Antropoloxía Cultural, p. 435-694.
* MARIÑO DAVILA, Esperanza (2004): “Un fillo bastardo de O divino sainete: o poema asturiano El Cuintu la Xana (1895)” in ALONSO MONTERO, Xosé; MONTEAGUDO, Henrique e TAJES MARCOTE, Begoña (Ed.): Actas do I Congreso Internacional “Curros Enríquez e o seu tempo” (Celanova, 13-15 de setembro do 2001), Tomo II. Santiago de Compostela: Consello da Cultura Galega, p.329-360.
* MONTERO CARTELLE, Emilio (2007): “La emergencia escrita medieval de los romances centrales (leonés y castellano)” in BOULLÓN AGRELO, Ana Isabel (editora)Na nosa lyngoage galega : a emerxencia do galego como lingua escrita na Idade Media.- Santiago de Compostela : Consello da Cultura Galega / Instituto da Lingua Galega, p. 205-226.
* SECO OROSA, Ana (2004): “O trazado da fronteira oriental do galego en León e Zamora” in A Lingua Galega: historia e actualidade : actas do I Congreso Internacional, Santiago de Compostela, 16-20 de setembro de 1996, vol IV. Santiago de Compostela : Consello da Cultura Galega / Instituto da Lingua Galega, p. 415-463.

(De l Consello da Cultura Galega)

Read Full Post »

Fuelga de barberos

XOSÉ LLUÍS CAMPAL FERNÁNDEZ

Corría l’añu 1920 cuando Pachu’l Péritu abordó, nel romance ‘El pleitu de los barberos’ -viera la lluz nel exemplar del 14 de marzu de la revista ‘Asturias’, de L’Habana- un problema llaboral rellacionáu con un gremiu nel que tenía muncho que dicir l’autor xixonés, pos trabayó de peluqueru. Too ello desplica’l descursu qu’ocupa la mayor parte de la poesía -y pal qu’emplega’l recursu del suañu- y que xira alredor de les ventaxes y entorgos d’actualizar sueldos ente los oficiales de barbería pa vivir con desfuegu, y onde echa unes cuentes nes que de xuro’l versificador punxo a referver el so calletre.

Read Full Post »

De fiestes per Llaviana

XOSÉ LLUÍS CAMPAL FERNÁNDEZ

Nel branu de 1919, Francisco González Prieto diose una revolada pel conceyu llaviniegu y depués romanciólu nun testu entituláu ‘Un viaje a Laviana’, que s’inxertó nel númberu del 21 d’avientu d’esi añu de ‘Asturias’, revista fecha na ciudá de L’Habana pa la bayurosa colonia rexonal. Nél, recueye Pachu’l Péritu les sos andances amorosiegues y les atenciones que recibiera nel Círculu Católicu y nes aldegues de Tiraña y Llorío demientres les sos fiestes añales.

Read Full Post »

El viciu’l tabacu

XOSÉ LLUÍS CAMPAL FERNÁNDEZ

Antaño, los creadores bables enriestraben tiraes de versos colo que teníen más a mano, nun poníen focicos petulantes nin dixebraben ente motivos d’altor y motivos de forgaxa. L’actualidá marcába-yos munches vegaes el camín y tiraben p’alantre, ensin velu como una ‘güestia escontra natura’. P’autores d’entamos del XX -güei desacreditaos pola ventolera esteticista y por una montonera de prexuicios pimpanudos- como Francisco González Prieto (Xixón, ¿1859, 1860?- La Pola Sieru, 1937), qu’emplegare l’alcuñu, ente dellos más, de Pachu’l Péritu, la poesía yera un conductu pa empobinase, dende los periódicos y revistes, al barcaláu de llectores (lo que-yos falta a munchos ‘lliteratos vernáculos’ d’anguaño) qu’esperaben secañosos polos sos inxeniosos comentarios rimaos en llingua asturiana, de la que yeren propagandistes altruistes enllenos de pasión polo propio.

Read Full Post »