Les XL Xornaes Internacionales d’Estudiu yá tienen abierta la inscripción

Les Xornaes Internacionales d’Estudiu de l’Academia de la Llingua Asturiana algamen les cuarenta ediciones esti mes de payares de 2022. La Facultá de Filosofía y Lletres de la Universidá d’Uviéu acueye tres xornaes d’actividaes académiques, ente los díes 8 y 10, con ponencies, comunicaciones y presentaciones que, en xunto, ufierten una güeyada amplia de l’asturianística que se fai dende fuera d’Asturies.

De les ocho ponencies programaes, siete son obra de profesores n’universidaes norteamericanes y una vien dende una universidá británica: Sonia Barnes (Marquette University), María Turrero y Andie Faber (Drew University), Miriam Villazón (University of California), Eduardo García (University of Massachusetts Amherst), Julio Villa (University of Manchester), Francisco Fernández Rubiera (University of Central California), Covadonga Lamar (University of California) y Paquita Suárez Coalla (City University of New York). Los temes, de la lliteratura a la sociollingüística y de la pragmática a la emigración asturiana, abarquen un panorama bayurosu en perspeutives d’investigación.

Read Full Post »

Sal a la venta la 2ª edición de «La mio vida ye una novela», de Paquita Suárez Coalla

La mio vida ye una novela da voz a un colectivu que aínda permanez al marxe de la hestoria: les muyeres campesines asturianes del sieglu XX. Espublizada per primer vez en 2001, foi una obra pionera nel so tiempu y anguaño, 20 años más tarde y en pleno sieglu XXI, sigue resultando sorprendente, interesante y, en delles ocasiones, estremecedora. Los testimonios qu’equí se recueyen pertenecen a la esperiencia vital de diecisiete muyeres ñacíes ente 1901 y 1930, que padecieron la guerra civil y la llarga posguerra dende una posición doblemente débil: como población civil nun país en llucha y como muyeres, sometíes por una sociedá na que teníen pocos derechos y menos oportunidaees, y onde yeren conscientes, a la vez, de la so situación de subordinación y de la imposibilidá de tornala. Sicasí, estes muyeres enxamás perdieron la dignidá nin un sentíu de la xusticia que dexaron en herencia a los sos descendientes, a otres muyeres a les que, cuasi ensin sabelo, ayudaron a conquistar la condición de ciudadanes de plenu derechu y a ser más llibres. Fielmente trescrites, calteniendo la naturalidá y frescura de l’oral, contaes nuna llingua a mediu camín ente’l castellanu y l’asturianu, estes hestories son un homenaxe a aquelles muyeres que nos criaron y educaron y que tuvieron qu’esperar a ser mayores –en dalgunos casos demasiao– pa esfrutar de la vida. Y tamién son un testimoniu de primer mano sobre la condición de la muyer na Europa del sieglu XX, de validez universal anque toles persones entrevistaes se circunscriban a un territoriu llimitáu.

Paquita Suárez Coalla (Grullos, Asturias, 1965), doctora en Filoloxía Española pola Universidá d’Uviéu, reconocida escritora n’asturianu, vive dende 1994 en Nueva York, onde ye profesora d’español na Universidá de la Ciudá de Nueva York.

(de Formientu, 29-10-2021)

Read Full Post »

“La llingua asturiana forma parte de la nuesa identidá más de lo que la xente piensa”

PACO ÁLVAREZ

Lleva ventisiete años saboriando la Gran Mazana, pero echa de menos el frutu coloráu del Festival de les Freses de Candamu, que nun visita dende qu’emigró a Nueva York. Paquita Suárez Coalla (Grullos, 1965), escritora n’asturianu y en castellanu, traductora y profesora universitaria d’español nel Borough of Manhattan Community College, ta a puntu d’acabar les sos vacaciones de branu n’Asturies, pero enantes de regresar a los Estaos Xuníos güei, xueves, a les siete de la tarde, va presentar nel Palaciu Valdés Bazán de San Román de Candamu la segunda edición de La mio vida ye una novela. Testimonios de las mujeres del campo de Asturias (Trabe, 2021), un llibru publicáu va ventiún años nel que da voz a diecisiete muyeres nacíes nes primeres décades del sieglu XX.

El llibru empieza con una dedicatoria a la so güela Lucía, que “foi tan valiente de llegar a los cien años”. ¿La llonxevidá tamién depende del valor col qu’afrontamos la vida?

Sí, yo creo que’l tiempu qu’ún pueda tar vivu depende tamién del deséu de vivir. Nel casu concretu de mio güela, aparte de cuestiones xenétiques, supongo qu’había un deséu, una voluntá de vivir.

Read Full Post »

Testos infantiles y xuveniles protagonicen el númberu 36 de «Lliteratura»

L’Academia de la Llingua Asturiana vien d’asoleyar el númberu 36 de la revista Lliteratura. Revista lliteraria asturiana correspondiente al añu 2020. Nesti númberu, de 173 páxines, baxo la direición de la escritora y académica Marta Mori, atópense dos estayes de la revista claramente definíes y que bien podríen iguar dos númberos perfectamente dixebraos: una primer estaya especial dedicada a la Lliteratura Infantil y Xuvenil (LLIX) y una segunda estaya que coincide colos conteníos habituales de la revista.

A lo llargo de les sos páxines combínase la creación lliteraria, l’ensayu y la crítica, y les voces nueves apaecen xunto a voces yá consagraes. «Esti exemplar pue valir al empar d’amuesa del llabor lliterariu de güei y como material pal aula no que cinca a la Lliteratura Infantil y Xuvenil», espliquen na academia. 

Read Full Post »

Más cultura asturiana na RTPA

Col títulu de ‘Por una RTPA al serviciu de la cultura asturiana’ 118 persones del campu cultural y musical roblen un escritu nel que reclamen “apostar por dignificar la presencia de conteníos culturales y musicales del país (mui especialmente n’asturianu y gallego-asturianu) na programación, con un tratamientu dignu, global y permanente nella”. La fundación nel añu 2005 de Radiotelevisión del Principáu d’Asturies (RTPA) enllenó d’esperances a los y les trabayadores/ dinamizadores/creadores culturales y musicales asturianos/es. Rixida nos primeros años pola Llei 2/2003, nel so preambulu falaba de potenciar las peculiaridades y el afianzamiento de la identidad asturiana, a través de la difusión, conocimiento y desarrollo de los valores históricos y culturales en toda su variedad y riqueza recuerden los firmantes del manifiestu. “La puesta en marcha efectiva del serviciu de televisión (TPA) fixo qu’aquelles esperances primerices s’esvanecieren en viendo’l modelu pel qu’empobinó la so programación; el fracasu social y económicu al que llevó obligó a un cambiu de rumbu radical que se caltuvo nel tiempu, con una visión de lo asturiano mui restrictiva y simplista” señalen. Tamién consideren que “los primeros pasos del serviciu radiofónicu (RPA) paecíen ufiertar bonos augurios, asina la so parrilla enllenóse de programes y espacios en llingua asturiana colos más variaos conteníos y atentos al fechu cultural y musical del país, pero namás foi un espeyismu nel tiempu y darréu foron desapaeciendo dafechu de les so emisiones”.

Read Full Post »

Trabe asoleya un llibru nuevu de Paquita Suárez Coalla pa la reciella

‘Cuentos pequeñinos y grandes pa dormir y pa quedar espiertos’, ye la obra nueva de Paquita Suárez Coalla con ilustraciones de Francisco Pimiango que ta acabante asoleyar Ediciones Trabe.

Na obra Lucía, la protagonista, quier saber pa qué sirven les palabres y la madre, que nun lo sabe, esplíca-y lo que pue facer con elles: conta-y hestories bien guapes que la nena escucha colos güeyos reguilaos y ensin apistañar.

Read Full Post »

Paquita Suárez Coalla asoleya la novela xuvenil «Paecen esguiles»

L’autora de Candamu, residente en Nueva York, Paquita Suárez Coalla, ta acabante asoleyar con Saltadera, la novela xuvenil «Paecen esguiles», dientor de la Colección «Cigoreya».

Un branu rural na Asturies del sieglu XXI. Una neña de Nueva York pasa en pueblu les vacaciones cola familia, descubriendo –y descubriéndonos– un mundu a la midida de los sos güeyos: la hermana mayor y la prima pequeña, les amigues, la familia, los vecinos, l’alcalde y los animales son los protagonistes d’esti mosaicu d’escenes cotidianes. De fondu, la pasión pola tierra y el pesu de les decisiones que van dar calce a una vida.

Paquita Suárez Coalla (Grullos, Candamu, 1965) ye escritora, traductora y profesora d’español na B.M.C.C City University de Nueva York. Ente les sos obres destaquen La mio vida ye una novela (2001), Pa nun escaeceme (2003) y El día que nos llevaron al cine (2007). En 2011 ganó’l premiu «María Josefa Canellada» de lliteratura infantil col llibru Camín de lletres: d’Asturies a Nueva York (2012).

(de Formientu, 04-07-2019)

Read Full Post »

Saltadera saluda al branu con cuatro novedaes editoriales

PABLO R. GUARDADO

Gonzalo G. Barreñada, Francisco Priegue y Paquita Suárez Coalla tán acabantes d’asoleyar títulos con Saltadera, qu’edita tamién la novela ‘Invisible’ d’Aique Fernandi, ganadora del XI Premiu María Xosefa Canellada de lliteratura infantil y xuvenil. Cuatro llectures n’asturianu pa disfrutar xunto cola llegada del bon tiempu.

‘El peso de la lluz’ ye’l llibru que firma Barreñada. Trátase del so segundu poemariu, nel que “hai un movimientu continuu que camina de dientro a fuera. Muévese dende l’espaciu íntimu de la casa (la cocina onde llee y trabaya, la llavadora, la despensa, el tendal…) a llugares abiertos pelos que rolda como un modernu poeta-flâneur: lo urbano y lo rural, el monte y les escombreres, l’estranxeru…”, apunten dende Saltadera.

Read Full Post »

‘Cúntame un cuentu’, dieciocho histories que sirven de “ferramientes educatives pa centros y biblioteques”

Esti xueves inauguróse n’Avilés la VI Feria del Libru y el Discu n’Asturianu cola presentación de ‘Cúntame un cuentu’ y ‘Cúntame un conto’, llibros conmemorativos de la XXXIX Selmana de les Lletres Asturianes. Éstos recueyen dieciocho histories pa poder emplegar como “ferramientes educatives” pa la reciella.

Otros tantos escritores y dibuxantes participen de manera desinteresada nesta iniciativa que busca ser “un termómetru del estáu de la nuesa lliteratura dedicada a la xente mozo; un llibru qu’amosare la cantidá y la calidá de los nuesos autores y de los y les ilustradores d’Asturies”, esplicó Chechu García Fernández, xefe de serviciu de Planificación Llingüística y Normalización. Ésti divídise en dos partes, una dedicada a los más neños y otra a los más mozos, yá que la edición d’esti añu de la Selmana tien como exa central la lliteratura infantil y xuvenil.

Read Full Post »

La lliteratura infantil y el gallego-asturianu protagonicen l’actu institucional de la Selmana de les Lletres

Mediu centenar de neños y neñes participaron xunto a diputaos y representantes institucionales nel actu institucional de la Selmana de les Lletres, celebráu esti miércoles na Xunta Xeneral. Nél, la lliteratura infantil y xuvenil en llingua asturiana foi la protagonista, anque tamién el gallego-asturianu.

Esti foi l’idioma de dalgún de los testos lleíos polos diputaos, pero tamién el qu’usó’l presidente del Parllamentu, Pedro Sanjurjo, que se dirixó a tolos presentes y mentes tol actu nel idioma faláu nel Occidente asturianu, ente los ríos Navia y Eo.

Read Full Post »