Col lema Dibuxando un camín, la 35 Selmana de les Lletres va dedicar atención especial al cómic n’asturianu, coincidiendo col 125 aniversariu de la so primer manifestación: en 1889, nel númberu 1 de la revista “La Comedia Gijonesa”, el dibuxante Pepe Priendes publica un cuentu popular tituláu Un cuento viejo que resuelve en cuatro viñetes de forma secuencial y con testu n’asturianu a pie de viñeta. Esti homenaxe institucional y colectivu a les lletres va llegar a la sociedá asturiana ente’l 2 y el 11 de mayu con actos de bien diversu calter (presentaciones de llibros, llectures públiques, coloquios, certámenes escolares o conciertos musicales).
La Selmana de les Lletres Asturianes ye un eventu participativu, entamáu pola Conseyería d’Educación, Cultura y Deporte y nel que collaboren múltiples persones y instituciones, como la Xunta Xeneral del Principáu d’Asturies, la Universidá d’Uviéu o l’Aula de les Metáfores. Tamién participen de manera especial los centros educativos, los llibreros, los editores, y los mesmos escritores, protagonistes indiscutibles d’estes xornaes. Configurada como un homenaxe públicu y institucional a la lliteratura escrita en llingua asturiana y gallego-asturianu, la Selmana dedicóse n’ocasiones a escritores particulares y, n’otres, garró un calter temáticu, centrándose en xéneros lliterarios como la narrativa, la poesía o’l teatru. (more…)
Tierra alantre, la mesma fala 