Feeds:
Antradas
Comentairos

Posts Tagged ‘Pepín Álvarez Lobo’

Güei 12 de xunetu morrió na Casa Sacerdotal d’Uviéu’l relixosu dominicu Pepín Álvarez Lobo, popularmente conocíu como’l Padre Lobo o “Pepín el de Manuela la d’Antón”. Ñació nel añu 1937 nel pueblu de Nembra (Ayer). Ingresó mui mozu na Orden de Predicadores na que recibió la ordenación presbiteral. Foi misioneru en Nicaragua, xunto a Gaspar García Laviana, y tuvo destináu en delles parroquies del conceyu de Tinéu. Siempres caltuvo un compromisu llingüísticu col asturianu que lu llevó a tornar una montonera d’obres relixoses al asturianu, como “El tchibru de Xob”, “El tchibru de Nehemíes”, “Isaíes”, amás del “El Sentu Roseriu” o les homilíes. Asoleyó tamién un estudiu de toponimia y vocabulariu de Nembra nel qu’amosaba’l so fondu conocimientu de la variedá del asturianu de la so zona.

Iniciativa pol Asturianu llamenta la muerte de P. Pepín Álvarez Lobo O.P. y tresllada a la so familia y comunidá’l pésame de tola organización.

(d’Iniciativa pol Asturianu, 12-07-2021)

Read Full Post »

ANTÓN GARCÍA

Los procesos normalizadores d’una llingua dexen al abintestate, cásique siempre, los repuelgos de feríes que se zarren en falso. El trabayu de Pompeu Frabra nel casu catalán non siempre s’aceptó nel so tiempu. Pensemos nes posiciones antifabrianes que tomaron Alcover o Fullana, les d’esti tovía vives na academia valenciana. Tamién pasa n’Asturies. De xemes en cuando llega dalguna publicación escrita y publicada al marxe de la normalización, con voluntá de que seya asina, de marcar distancia.

Ye’l casu de los llibros que publica “un dominicu de Nembra”, qu’asina firma, depués del Pepín Álvarez Lobo col qu’anda pel mundu, esti fíu de Manuela la d’Antón. Hasta onde sé, Álvarez Lobo ye un home d’igresia comprometíu cola parte más social de la institución, la de los probes, que coincidió en Nicaragua con Gaspar García Laviana. Vien sacando unes obres mui interesantes, dende l’inicial Tchibru de Nehemíes (1997) a Nembra, la xente y sos coses, del añu siguiente, onde recueye’l saber popular del so pueblu depués de pasalo pela peñera observadora de quien viaxó muncho y reflesionó más. Amás d’una biografía sobre l’obispu Valdivieso, acaba de publicar El profeta Isaíes (2011) y más recientemente El tchibru de Xob. Estes traducciones bíbliques son llibros sorprendentes, atentos a la llección que dan sobre la probeza, nos qu’Álvarez Lobo despliega la so erudición de les escritures sagraes, traduz y anota los textos, y entá propón reflesiones dende la fe cristiana. Les versiones, resueltes con dominiu del idioma y cenciellez espresiva, lléense con gran provechu, destacando nelles la voluntá localista: tán feches al asturianu de Nembra (col empeñu d’acercales al pueblu na so llingua) buscando más el rasgu diferencial que lo que define a esta llingua como sistema. (more…)

Read Full Post »