Yá ta na cai l’Anuariu de la Música Asturiana 2022

Esta selmana entama a distribuyise y asoleya online la edición 2022 del Anuariu de la Música Asturiana, publicación editada por Goxe Producciones que lleva ventidós años faciendo un repasu fondu a lo que dio de sí’l recién pasáu añu en rellación a la música d’espresión asturiana. Como de costume les temátiques céntrense n’estilos como la música tradicional, el folk, el rock o la canción d’autor, con secciones qu’inclúin reportaxes, informes, entrevistes, crítiques, opinión, recoyida de material o anuncies. L’Anuariu ye de baldre, inclúi un CD compilatoriu y pue consiguise en dellos llocales repartíos pel país .

L’Editorial, nesta ocasión, titúlase «Optimismu ensin trunfalismu» y nél fálase de la variedá y calidá de la música asturiana anguaño, nesti sen, manifiéstase: «Creación y consumidores, un binomiu imprescindible pa caltener una escena musical tan especial como l’asturiana. Les bases tán puestes, agora namás falta que los poderes públicos del país, particularmente’l Gobiernu Asturianu y la RTPA, apoyen amañosamente con polítiques y acciones reales, permanentes y ambicioses. Nun cabe ser trunfalistes y hai que siguir trabayando, pero paga la pena aparar per un momentu, mirár atrás, sentir satisfacción pola xera fecha y coyer impulsu pa siguir alantre».

Read Full Post »

Quince empreses qu’usen l’asturianu participen nel Reguerada Fest, espaciu d’alcuentru de la cultura nel idioma

Candás va acoyer del xueves al domingu’l I Reguerada Fest, iniciativa del Gobiernu pa crear un espaciu d’alcuentru de la cultura en llingua asturiana. Van entamase más d’una docena d’actividaes estos cuatro díes y la Fábrica d’Ortiz va agospiar un Mercáu y Feria d’Empreses na que participen un total de quince firmes qu’empleguen l’asturianu.

“Carreño ye una zona mui vinculada a la cultura n’asturianu”, aseguró na presentación Antón García, direutor xeneral de Politica Llingüístca, Antón García, qu’apuntó qu’anque en Candás “suelen dicir que ye’l ñero de la lliteratura asturiana, yo creo que ye un poco más que’l ñero, ye l’aniciu, l’orixe de la lliteratura n’asturianu y paecíanos un bon sitiu pa rindir homenaxe a Antón de Marirreguera”, autor del autor del primer testu conserváu de la historia de les nueses lletres, el ‘Pleitu entre Oviedo y Mérida: Sobre la posesión de las cenizas de Santa Eulalia’, del 1639. Asina, escoyóse’l nome de Reguerada Fest pa esta iniciativa.

Read Full Post »

El discu del concursu ‘Al son del cantar’, un recursu nuevu pa la clase de Llingua Asturiana y Gallego-asturiano

Les maestres y maestros de Llingua Asturiana y Gallego-asturiano disponen d’un recursu nuevu pa trabayar nes aules col alumnáu. Yá ta disponible en plataformas dixitales y va distribuyise de manera física per toles escueles del país el discu coles diez canciones de ‘Al son del cantar’, concursu que ta acabante de celebrar la so gala.

Destináu a escolines y escolinos de cuartu de Primaria a segundu de la ESO, esta iniciativa buscaba estimular el deprendimientu significativu del alumnáu per aciu de la investigación, el descubrimientu y la creatividá nel campu de la música. Nel aula habríen de componer una lletra pa un cantar a partir d’una melodía tradicional o orixinal pa valoración del xuráu encargáu de facer la escoyeta de los diez meyores pa la grabación del discu por parte de bandes o artistes con trayeutoria.

Read Full Post »

La Feria del Llibru y Discu n’Asturianu treslládase a Uviéu

Va tener como sede la plaza de Trascorrales, con numberoses actividaes programaes.

La inauguración de la VII Feria del Llibru y Discu n’Asturianu, que dexa Avilés pa celebrase n’Uviéu, va ser mañana al meudía, pa siguir con una mesa redonda entitulada ‘Música n’asturianu’, moderada por Ignaciu Llope. Los participantes van ser Xune Elipe, Llorián García Flórez, Ismael González Arias, Andrea Joglar y Xosé Anton Fernández ‘Ambás’.

Read Full Post »

“La xente avérase muncho al asturianu pola música”

XAUME MARTÍNEZ

Anque la xente lu conoz principalmente pola curdión, cola que percuerre de magar munchos años los escenarios d’Asturies, ello ye que David Varela (Xixón, 1975) fai munches más coses: toca un bon garrapiellu d’instrumentos; ye mayestru de música en Tinéu, Nava, Cangas del Narcea, Llaviana y Xixón; foi componente de bandes de gaites y grupos folk como Lliberdón, La Bandina o, anguaño, La Bonturné, y tien acompañao a artistes como Anabel Santiago o Marisa Valle Roso. Falemos con elli d’educación musical, del papel de la llingua na enseñanza y de tocar música pa nenos.

Esti día falábemos de la importancia de la tresmisión xeneracional pal caltenimientu de l’asturianu. Nel so casu, la familia foi decisiva nel empiezu, ¿non?
Yo en casa tengo un hermanu gaiteru, asina que crecí cola gaita. Entamé col tambor y hasta güei. Los primeros años nun me dediqué profesionalmente a la música (personalmente, siempres) pero anguaño ye la mio actividá profesional tamién.

Read Full Post »

El Conceyu de Xixón va da-y sofitu institucional al Día de la Reciella y a la tresmisión del asturianu

Los grupos del Plenu van anunciar mañana que la selmana qu’entra aprobarán una declaración institucional pola que’l Conceyu de Xixón sofita la continuidá del Día de la Reciella y se compromete a favorecer la tresmisión xeneracional del asturianu. Esti domingu celébrase nel Muséu del Pueblu d’Asturies esta xornada familiar al rodiu del idioma qu’algama la so sesta edición.

Tolos grupos municipales, cola esceición del Partido Popular (PP) sacante novedaes d’última hora, van apoyar esta declaración institucional nel Plenu d’ochobre. El documentu, na so esposición de motivos, fai un repás a la “llarga historia d’usu y promoción del asturianu” de Xixón.

Read Full Post »

Reciella presenta’l vídeo de ‘Espoxiga’, el tema promocional del VI Día de la Reciella interpretáu por Pop Piquiñín

L’asociación Reciella-Families pol Asturianu presenta’l vídeo de ‘Espoxiga’, un títulu que coincide col lema del VI Día de la Reciella y que ta compuestu por Pop Piquiñín –la versión n’asturianu del exitosu grupu infantil asturianu, Petit Pop–.

El Día de la Reciella ye un eventu festivu de tipu familiar organizáu pola asociación Reciella, nel que durante un día completu, dende pela mañana hasta pela nueche, sucédense actividaes, talleres, conciertos y exhibiciones deportives que tienen como nexu l’usu del asturianu como llingua vehicular, indica l’asociación al traviés de nota de prensa.

Read Full Post »

Pop Piquiñín interpreta ‘¡Espoxiga!’, el cantar del VI Día de la Reciella

El 7 d’ochobre va celebrase’l VI Día de la Reciella. Nesta ocasión el lema del eventu ye ‘¡Espoxiga!’, nome tamién del cantar que promociona esta xornada de diversión n’asturianu en familia, qu’interpreta Pop Piquiñín, Petit Pop cantando n’asturianu, y qu’Asturies.com ufre güei en versión karaoke.

Ésti ye’l tercer añu nel que ‘Reciella. Families pol Asturianu’ apuesta por ellaborar un tema pa fomentar l’usu de la llingua asturiana, sirvir de material de trabayu na escuela y, al empar, promover la participación nesta cita que tien como sede’l Muséu del Pueblu d’Asturies el primer domingu d’ochobre. Primero foi Skama la Rede con ‘Entaína’, llueu David Varela con ‘N’asturianu, sumes’ y agora Pop Piquiñín con ‘¡Espoxiga!’, que pronto va contar con un videu realizáu por Pablo A. Quiroga y que dende l’asociación de families esperen que seya “ún de los temes del branu”.

Read Full Post »

IX Sumana de las L.letras Asturianas

Ente’l 22 ya’l 26 de mayu de 2017, Cangas celebra la súa IX Sumana de las L.letras Asturianas.

Pa la celebración d’estiañu, ofrécense muitas actividades diferientes, todas, eso sí, pensadas pa satisfacer las demandas d’un espectru ampliu de la población.

Abren la sumana dúas exposiciones, una de tipu infantil ¿A qué sabe la lluna? ya outra más enfocada al públicu adultu, baxo’l títulu Na punta la llingua, que recói una serie de viñetas de reivindicación l.lingüística del artista gráficu cangués Neto.

Read Full Post »

L’Anuariu de la Música analiza’l “les carencies” de la RPA y la “tercer revolución” del folk

Goxe Producciones vien de publicar el nuevu Anuariu de la Música Asturiana, referente al añu 2016, nel qu’ente otros coses, analízase’l papel y “les carencies” de la Radio Principáu d’Asturies nel contestu musical asturianu, asina como la “tercer revolución” del folk, no que cinca a tendencies y estilos nuevos.

Nuna nota de prensa, la editora informa de la publicación d’esti nuevu númeru, que será presentáu el xueves qu’entra nel llocal La Llegra d’Uviéu. Como ye vezu les temátiques céntrense n’estilos como la música tradicional, el folk, el rock o la canción d’autor, con secciones qu’inclúin reportaxes, informes, entrevistes, crítiques, opinión, cróniques, recoyida de material o anuncies.

L’Entamu, nesta ocasión titúlase ‘Una radio musicalmente asturiana’ y nél fálase del papel que tien que xugar la radio pública nel contestu musical asturianu, con bien de carencies y dificultaes, concluyendo que *La música propia del país ha tener un tratamientu fondu, seriu, permanente y tresversal na so programación*.

Read Full Post »