Fernández: “La xente ta preparao pa sentir y ver fútbol n’asturianu”

PABLO R. GUARDADO

TermAst ábrese, cola decimosegunda propuesta, al mundu del deporte. ‘Terminoloxía de Fútbol’ ye un pallabreru formáu por 700 términos recoyíos pol filólogu David Fernández Fernádez (Candás, 1981) que busca facilitar el llabor a periodistes.

¿Por qué una propuesta de terminoloxía sobre fútbol?
El fútbol ye’l deporte que más se prautica n’Asturies y nel mundu y siempre que lo sentía pela radio o la televisión entrugábame, ¿por qué nun podemos sentir el fútbol n’asturianu? Entós presente la propuesta na Academia de la Llingua Asturiana (ALLA) y entamé a trabayar por ello falando y entrugando a xente que xugare o tuviere venceyao al mundu del fútbol intentando que fueren de dómines un poco estremaes.

Read Full Post »

Los creadores culturales mozos analizaron los sos ámbitos de trabayu nel congresu celebráu n’Uviéu

PABLO R. GUARDADO

El Congresu Cultura Asturiana Mozo resultó una perbona ferramienta pa conocer el llabor que se ta faciendo n’Asturies en delles estayes y les mires de los creadores culturales. Éstos foron los protagonistes d’una xornada “que foi un ésitu”.

Con estes pallabres finó Xuan Xosé Sánchez Vicente un congresu que podría tener continuidá n’años vinientes, dalgo que se decidirá nunos dos o trés meses. Ésti ye’l tiempu que van tomar los impulsores d’esta iniciativa, la Fundación Nueva Asturies y l’Asociación Cultural L’Arribada, y los coordinadores de toles estayes pa madurar la esperiencia d’esti primer Congresu Cultura Asturiana Mozo y convocar un conceyu nel que valorar la conveniencia o non de celebrar ediciones nueves.

Read Full Post »

Radio Sele intensifica la busca d’un llocal pa poder emitir pela FM

PABLO R. GUARDADO

Pese a la situación complicada que ta viviendo Radio Sele, lo sos responsables intensifiquen la busca d’un llocal. L’oxetivu ye dar con unes instalaciones afayadices pa instalar una antena y recuperar la emisión pela FM casi dos años depués.

Na xunta celebrada la selmana pasada decidióse tirar p’alantre colos pocos medios disponibles y intensificar la busca d’un llocal pa continuar les emisiones enantes de tomar una decisión definitiva. El presupuestu estimáu pa que la emisora de radión única n’asturianu dafechu siga furrulando ye d’unos 600 mensuales, esto ye, más de 6.000 euros añales, una cantidá a la que nun lleguen les cuotes aportaes polos 30 socios actuales de Radio Sele, situación que lleva a la canal a continuar cola campaña de captación d’asociaos. La cuota mínima ye de 6 euros al mes, anque hai la posibilidá tamién d’aumentar la cantidá a aportar según la capacidá económica de caún.

Read Full Post »

Qu’el Gobiernu aplique les recomendaciones sobre diversidá llingüística

La XDLA pide al Gobiernu d’Asturies qu’aplique les recomendaciones sobre diversidá llingüística aprobaes pola Comisión de Cultura del Europarllamentu el pasáu 18 de xunu, un informe realizáu pol diputáu corsu Francois Alfonsi. Depués d’un procesu d’enmiendes, el documentu aprobóse por unanimidá.

Según l’Atles de les llingües del mundu en peligru de la UNESCO, l’asturianu ye ún de los idiomes europeos que ta nuna situación d’alerta encarnada. Agora ye la Unión Europea, al traviés de la Comisión de Cultura, la qu’acaba d’aprobar un informe que recueye delles recomendaciones pa protexer la diversidá llingüística del Continente.

Read Full Post »

Xuanxo Mariño: “Si en xunu nun tenemos el sofitu necesariu echaremos el pieslle a 27 años de Radio Sele”

INACIU GALÁN

Radio Sele lleva n’antena dende va 27 años como la única emisora dafechu n’asturianu. En 1999 recibía la llicencia comercial per parte del gobiernu de Sergio Marqués, lo que-y permitiría profesionalizase. Pero la llegada del socialista Vicente Álvarez Areces a la presidencia del Gobiernu d’Asturies torgó estos planes. L’executivu d’Areces quitába-yos la llicencia y más tarde echábalos del so dial emitiendo per él la emisora pública RPA. Dempués de toes estes torgues, a la que se suma la eliminación de les ayudes autonómiques que recibía, la emisora vive un momentu trescendental que podría llevala a desapaecer. Xuanxo Mariño, director de Radio Sele, fala con Asturnews de la situación que viven y de la campaña pa facer socios que tienen en marcha pa superala.

¿Qué momentu vive Radio Sele agora mesmo?
Una situación complicada económicamente, esta ye una radio llibre y polo tanto necesita socios, bien persones faciendo programes o persones qu’ayuden la sostenibilidá de la radio n’otros llugares ta faciéndose dende va munchos años. Yo conozco radios como esta, n’Italia por exemplu, con 15.000 socios y con una programación en directu les 24 hores. Agora mesmo tán rodándose películes con aportación económica de persones independientes que quieren ayudar a qu’esi proyectu salga alantre.

Read Full Post »

Adolfo Camilo: “Con esti discu quiero amosar les posibilidaes espresives del asturianu y pasalo bien”

INACIU GALÁN

Adolfo Camilo Díaz ye unu de los imprescindibles de la lliteratura asturiana contemporánea. Apocayá anunciaba que dexaba la escritura pa dedicase a otres formes d’espresión que vien esperimentando dende va décades, la música y el teatru. Acaba de sacar nuevu discu, anque entá nun va ver la lluz de forma completa hasta ochobre. Col tema “La güela” tuvo ente los finalistes del Premiu al Meyor Cantar n’asturianu, volviendo a la escena musical con fuercia. Versiones d’Elvis, Jethro Tull o los Beatles acompañen a otros temes propios. Aprovechamos la oportunidá pa tener una llarga charra con él sobre la so carrera, el so nuevu discu y otros proyectos, la situación del teatru y la música n’Asturies…

Escritor, xestor cultural, home de teatru… la de músicu ye quiciabes la so facete menos conocida, ¿por qué un discu agora?
Home, na entruga cásique va la rempuesta (rises) al ser esa faceta cuasimente desconocida… Pero yá hebo discos –underground, dacuando de puru piratéu en clave “dadaísta” (pañar cualesquier base desconocía al debalu y derrompela, criando nueva melodía, nueva lletra, nuevu son por exemplu)- enantes pero nun se conocieron (tampoco yo fici muncho por dalos a conocer) En rápidu resume, nel 1980 monté Guaxa, grupu de rock duru n’asturianu, nel 1983 empezó funcionar Güextia. Nel 1986 y 1987 gané’l Premiu de Canción d’Autor qu’entamaba’l Principáu. Nel 1986 gané en Xaén el Premio Nacional de Canción de Autor a los mejores textos, qu’entamaba’l Ministeriu de Cultura. Nel 1988 publiqué Inaux, de Güextia, el primer discu de rock n’asturianu fechu nel país.

Read Full Post »

Radio Sele, a la gueta de nuevos socios pa sobrevivir

Dende la emisora comunitaria Radio Sele, la única radio qu’emite dafechu en llingua asturiana dende la so creación nel añu 1986, tán acabantes de facer un llamamientu de collaboración pa la continuidá de la so actividá. Como ye conocío dende va meses, la emisora uvieína necesita un total de 6.000 euros esti añu pa siguir emitiendo. Al traviés de donaciones, un conciertu de sofitu, o la venta de materiales propagandísticos, yá s’algamaron más de 3.000 euros, suficiente pa cubrir la primer metá del añu, pero entá lloñe de cumplir l’oxetivu anual.

Nesi sentíu, los miembros de Radio Sele alerten de que necesiten el sofitu popular mediante nuevos socios, que garanticen suficiente base económica como pa poder continuar cola actividá, y tornar a emitir al traviés de la Frecuencia Modulada. De lo contrario, Radio Sele va a vese obligada a echar el pieslle a finales de Xunu Poro, encamienten a rellenar los datos de la fueya de sofitu de la imaxe -especificando con qué cantidá económica se desea collaborar- y unviala a radiosele@yahoo.es . Otra manera de collaborar ye facer una donación puntual a la cuenta na Caja Rural de l’Asociación Cultural Secha: 3059 0001 18 2366328629.

Read Full Post »

Xuanxo Mariño: “Lo que nos fixo más dañu foi’l robu de la llicencia”

PABLO R. GUARDADO

Esti sábadu, trés bandes asturianes xúnense n’Uviéu nun conciertu pa recaudar perres pa Radio Sele, única dafechu n’asturianu. El so direutor, Xuanxo Mariño Fernández (Uviéu, 1957), faló con Asturies.com de la situación de la emisora.

Radio Sele fixo hai pocu tiempu un llamáu a los sos oyente y simpatizantes pa poder cubrir los gastos d’emisión. ¿Qué tal ta siendo la respuesta?
Bona. Radio Sele foi una emisora que siempre tuvo bona acoyida ente la xente y dalgo como esto nunca lo fixéramos de manera pública. Según como tán les coses, va tener que ser asina: nós vamos tener que paganos los proyeutos qu’entamemos, como yá pasa n’otros países con esti tipu de radios.

Read Full Post »

Cuarenta años de reivindicación llingüística. ¿Ente l’apatía y la frustración?

El movimiento de recuperación llingüística del asturianu tien casi cuarenta años. La selmana pasada Vital y Ramón d’Andrés, y Vicente Álvarez Menéndez, los dos últimos ex directores de Política Llíngüística del Principáu, facíen públicu una reflexón personal sobre por qué la llingua asturiana taba perdiendo puxu na nuestra sociedá. Les conclusiones que se podíen sacar ye que, amás de pola falta de polítiques afechisques que defendieran la vitalidá del asturianu, el retrocesu del billingüismu n’Asturies taba ocurriendo pola apatía de la propia sociedá asturiana ente la desapaicion de la so llingua tradicional, y la frustración de la minoría militante que nun yera a facer valir los sos argumentos nel conxuntu la población asturiana. P’afondar güei nesti alderique averámonos a tres iniciatives que tienen l’asturianu como llingua d’espresión.

Desque nel añu 74 naciera Conceyu Bable, primera de les organizaciones que reclamaron un estatus dignu pa la llingua asturiana, fueron munches les iniciatives que puxaron por revitalizar l’usu del asturianu na nuestra sociedá. Nel so escritu ‘La sociedá ante la llingua: compromisu y futuru’ los hermanos d’Andrés y Álvarez Fernández poníen el pesu de la culpa de la perda de presencia del asturianu na propia sociedá que lo tenía qu’emplegar como llingua vehicular.

Read Full Post »

«Cinco televisiones rexonales europees van tar presentes nel Liet International 2012»

DAMIÁN BARREIRO

El Teatru de la Llaboral de Xixón va acoyer el sábadu 1 d’avientu, a partir de les 21.30 hores, la celebración del festival Liet International 2012, nel que participen once grupos que canten nuna llingua minoritaria europea. Con diez años de trayectoria y depués de cinco de participación d’Asturies, ye la primer vez qu’esti festival se celebra na Península Ibérica. Por eso, falamos con Ana Fueyo, directora xeneral de Política Llingüística, p’analizar lo que va suponer esti eventu pal nuestru país y cómo ye’l trabayu que se ta faciendo dende’l Gobiernu d’Asturies pa entamar esta edición del que ye conocíu como l’Eurovisión de les lingües minoritaries.

¿Qué supón p’Asturies y pa la so llingua acoyer la celebración del Liet International?
Pa la llingua asturiana nun dexa de ser una reconocencia grande dientro de la Fundación Liet, que ye una entidá qu’axunta idiomes minoritarios de toa Europa. Otra manera, qu’Asturies, col sofitu del Gobiernu autonómicu, sía la comunidá qu’entama’l festival -amás de ser la primera de la Península Ibérica-, supón da-y una relevancia al Festival Liet como eventu cultural y musical, pero tamién como actu que tien que ver col fomentu y la normalización de la nuestra llingua. Amás, p’Asturies tamién supón una plataforma turística bien importante.

Read Full Post »