L. Álvarez: “Escoyer a una muyer pa esti premiu ye tener en cuenta l’aportación que facemos a la lliteratura asturiana”

PABLO R. GUARDADO

El III Premiu Nacional de Lliteratura Asturiana, qu’entrega cada tres años l’Academia de la Llingua Asturiana, tien nome de muyer. Lourdes Álvarez (La Güeria d’Urbiés, 1961) ye la primera en recibilu –primero foron Xuan Bello y Xuan Xosé Sánchez Vicente– y mañana, nel actu institucional pol XLIV Día de les Lletres Asturianes, va recoyelu nel Teatru Campoamor.

¿Qué supón pa vusté recibir esti reconocimientu?

Yá lo pue imaxinar, una allegría enorme.

¿Recuerda’l momentu nel que-y comunicaron que’l III Premiu Nacional de Lliteratura Asturiana yera pa vusté?

A la perfección. Nun daba creitu a lo qu’escuchaba. Hai munches persones con una trayectoria lliteraria interesante; nun sospechaba que pudiese ser yo la persona escoyida nesta tercer edición del premiu.

Read Full Post »

Xaime y les nueves voces de la poesía asturiana

L.O.

Casi todo el mundo abomina ya, casi, del mismo concepto de generaciones literarias, demasiados matices, demasiadas peculiaridades, tan difícil como reunir un rebaño de gatos. Y, sin embargo, Xaime Martínez, premio Joven de Poesía 2019, sí que aprecia un hilo común en la escritura más reciente de Asturias, uno marcado por la emigración, por la mirada a la tradición desde nuevos lenguajes, y sobre todo, porque son la primera generación que escribe en asturiano y que fue además escolarizada en asturiano.

«Ye lo que se diz de que la llingua asturiana a medida que va perdiendo falantes va ganado prestixu, ye un procesu habitual y tráxicu». Martínez cita nombres que pasan por como Raquel F. Menéndez o María García Díaz o como Pablo X. Suárez, Laura Marcos. «Tuvimos la suerte, la xeneración nuestra, de lleer ya munchu n’asturianu que ye una cosa que les xeneraciones anteriores nun tuvieron porque de alguna manera tuvieron que reinventar la lliteratura asturiana; y al final, nos medramos lleendo a Xuan Bello o Berta Piñán, eso ye una gran ventaxa»; pero también «la manera de escribir que había na poesía asturiana de los 80 o 90 agora ya non nos satisface en muchos sentidos».

Read Full Post »

Gonzalo G. Barreñada: “A veces tengo la impresión de que la xente fala yá como’l Salvatore d’El nome de la rosa, que falaba toles llingües y nenguna.”

Gonzalo G. Barreñada (Sotrondio 1973) tardó muncho n’entamar a asoleyar obra (de 2016 ye’l so poemariu “Biografíes”), pero lo cierto ye que nestos últimos 4 años consiguió afitase como una de les voces más importantes de la lliteratura asturiana: Los Poemarios Biografíes y El Pesu de la Lluz, amás del volume de rellatos Hestories de Burgundu, y la novela La Casa de Xuan Buelga preceden nel tiempu a esti el Llar n’Orde, que non solo ye’l so tercer poemariu, sinón que tamién-y valió’l premiu Xuan María Acebal del Principáu d’Asturies. Recordámosvos, como siempre, qu’El Llar n’orde, amás de na vuesa llibrería asturiana de confianza, vais poder atopalu equí.

En 4 años fuisti a sacar trés poemarios, un volume de rellatos y una novela y, amás, a ganar el premiu más prestixosu de poesía d’Asturies, el Xuan María Acebal. Una de les carreres más meteóriques nes nueses lletres. ¿Tardasti n’escribir o en querer publicar? ¿Por qué? ¿Qué te fixo decidite?

Escribo cuentos dende neñu; daquella la mio mayor influyencia yera un llibru que tenía en casa de los hermanos Grimm. Con 12 ó 13 años escribí una novela d’esploradores ingleses en Canadá y una imitación mala d’El señor de los aniellos que llevaba de títulu Les seis espades de los elfos, obres dambes que tán na carbonera de casa xunto a otres munches; pero na carbonera tán bien; sicasí, nun olvido que nun hai nada de lo qu’escribí daquella que llueu nun sirviera d’aprendizaxe.

Read Full Post »

“Ye un homenaxe a tantes persones qu’escribieron n’asturianu y de les que naide s’alcuerda”, espresa Lluis Portal

PABLO R. GUARDADO

El responsable de la edición de ‘Postrer adiós. Prosa, poesía, teatru’ al rodiu de la figura de María Teresa Villaverde, Lluis Portal, aseguró qu’esti reconocimientu na XLI Selmana de les Lletres Asturianes “ye un homenaxe a tantes persones qu’escribieron n’asturianu y de les que naide s’alcuerda”. La conseyera Piñán recordó’l silenciamientu de la obra de Tuxa nes antoloxíes del so tiempu por “ser muyer”.

La Casa de los Hevia foi’l llugar escoyíu pa inaugurar la gran fiesta de les nueses lletres. En Villaviciosa, nel conceyu onde nació Tuxa, natural de Tornón: “Ye la segunda vegada que se dedica la Selmana de les Lletres a dalguien d’equí”, recordó l’alcalde Alejandro Vega –en referencia a Xosé Caveda y Nava, reconocíu nel 1989, la primera temática que s’entamó–, que reconoció conocer recién la historia de la homenaxada “porque la prima de la mio muyer llamó a la so fía Tuxa”.

Read Full Post »

Alejandro Fernández-Osorio gana’l Premiu Xuan María Acebal por “Tayu”

La ventésima sesta edición del Premiu Xuan María Acebal de poesía n’asturianu recayó nel escritor l.lenizu Alejandro Fernández-Osorio pola obra Tayu.

Nel acta del fallu, el xuráu resume la temática central del poemariu y destaca “cómo la voz del nietu revisita les vivencies de la mina con una visión social y política, pero al empar íntima y novedosa, de quien se siente heriede d’una tradición que pesa nel entornu familiar, pero qu’en realidá yá nun existe pa quien escribe dende otra esperiencia, la de la emigración”.

Read Full Post »

Yá ta nes cais y na rede’l númberu 6 de la revista lliteraria Brixel

La revista de lliteratura Brixel llega al númberu 6 de la segunda época con una entrega que pon bien d’atención na lliteratura moza. La revista, qu’apaeció per primer vegada nel mes de xunu del 2010 col periódicu Les Noticies y concebida como un suplementu lliterariu “onde tuvieren sitiu tolos actores del mercáu del llibru n’Asturies y que valiera pa dinamizar el sector editorial del país y dar visibilidá a la lliteratura escrita n’asturianu y gallego-asturianu”.

Esti enfotu ye’l mesmu que llevó en 2013 a B. Alto a recuperar la cabecera, magar que convertida nuna espublización añal. Amás de los 5.000 exemplares en papel que reparten de baldre ente les llibreríes y usuarios de les biblioteques públiques d’Asturies, Brixel ta disponible pa la so consulta na web.

Read Full Post »

Armando Gutiérrez, Raquel F. Menéndez y Marcos Martínez Fernández ganen el premiu de cuentos curtios de Cangas

El XVI Concursu de cuentos curtios del conceyu Cangas yá tien ganadores. El primer premiu na categoría n’asturianu occidental foi pal cuentu El picadoiru, de Raquel F. Menéndez y Marcos Martínez Fernández y el primer premiu n’asturianu normativu foi pal cuentu El frutu de la pasión, del escritor llionés Armando Gutiérrez Rodríguez.

El xuráu tuvo formáu polos escritores Elías Veiga y Laura Marcos, la filóloga Marta López y la responsable del Serviciu de Normalización Ḷḷingüística de Cangas, Mónica Rodríguez.

Read Full Post »

Les escritores más nueves vindiquen el papel de la lliteratura na escuela

XAIME MARTÍNEZ

El pasáu llunes 15 d’ochobre foi’l Día de les Escritores, nel que la comunidá internacional de llectores s’alcuerda, anque hubiera facelo más davezu, d’eses grandes escaecíes pola Historia de la Lliteratura y el so canon: les muyeres.

Na lliteratura asturiana, les autores tienen fecho un llabor fundamental: dende Xosefa Xovellanos a Berta Piñán, pasando per Enriqueta González Rubín o María Xosefa Canellada, toes contribuyeron -ente otres coses d’igual valir- a fixar la llingua lliteraria asturiana. O lo que ye lo mesmo, a fixar un mundu col que falar d’otros mundos.

Read Full Post »

CincoXCinco = Raquel F. Menéndez

Raquel F. Menéndez (Vallouta, Salas, 1993) ye graduada en Llingua Española y la so Lliteratura pela Universidá d’Uviéu. Cola so obra en castellán ganó nel añu 2013 el III Concursu Lliterariu de la universidá asturiana col llibru Libélula (2013) y participa nes antoloxíes Siete mundos (2015) y Poesía, alma del mundo (2014). Los sos poemes n’asturianu tán espublizaos en revistes como Formientu y Lliteratura. Nel añu 2016 ganó’l Premiu Nené Losada Rico con El llibru póstumu de Sherezade. La Tertulia Malory, de L’Entregu, escoyó como meyor llibru n’asturianu de tolos que s’editaron nel 2017 el poemariu El llibru póstumu de Sherezade.

1. Proponga un menú lliterariu: entrada, platu principal y postre.
De primeru, y pa entrar n’escena, India o cualquier otru poemariu/ensayu de Chantal Maillard, de segundu Los líquidos íntimos d’Olga Novo y, de postre, los últimos ensayos de Siri Husvedt, traducíos al español en La mujer que mira a los hombres que miran a las mujeres (Seix Barral).

Read Full Post »

‘El llibru póstumu de Sherezade’, de Raquel F. Menéndez, meyor llibru n’asturianu pa la Tertulia Malory

La Tertulia Malory, de L’Entregu, escoyó, por mayoría, como meyor llibru n’asturianu de tolos que s’editaron nel 2017 el poemariu El llibru póstumu de Sherezade, de la escritora Raquel F. Menéndez, col que yá ganara, nel 2016, el Premiu Nené Losada Rico. El xuráu tuvo formáu polos escritores Xulio Arbesú, José Luis Rendueles, Pablo Rodríguez Medina, Solinca Turbón, David Fernán, Roberto Corte, Chechu García y Henrique G. Facuriella, que fallaron el premiu nun actu celebráu na tertulia’l 22 de xunu del 2018.

El xuráu destacó, nel acta del fallu, «l’autenticidá de la voz poética y la verdá de les emociones que l’autora espeya en caún de los poemes, unes emociones que tienen como puntu de partida les rellaciones ente les tres protagonistes femenines del llibru: la propia poeta, la güela con alzhéimer y la madre. L’autora muéstrase heriede de un llinaxe femenín que se materializa nel conocimientu que vien al traviés de los oxetos probes –botones, alpargates, el café de pota…– pero, sobre too, de los cuentos, como aquellos colos que la Sherezade de Les mil y una nueches va consiguiendo ganar un día más de vida». El gallardón consiste nuna ilustración d’Alfonso Zapico y una medaya conmemorativa, que se van entregar nun actu públicu en L’Entregu en feches próximes.

Read Full Post »