Feeds:
Antradas
Comentairos

Posts Tagged ‘Ricardo Candás’

INACIU GALÁN

Berto García ñaz en Les Vegues (Corvera), en 1975. “Inercia” ye’l quintu poemariu que da a imprenta l’autor. Premiu Fernán-Coronas 2007 y Premiu Llorienzu Novo Mier 2009, tien amás bien d’obra espardío peles revistes lliteraries del país, como El Canciu’l Cuélebre, Lletres Asturianes, Lliteratura, Formientu… Autor de tornes na estaya de la lliteratura infantil, ye amás maestru d’Educación Infantil, amás d’espertu en Llingua Asturiana. Aprovechamos la salida a les llibreríes d’“Inercia”, pa falar con él de poesía y d’otres cuestiones na Entrevista de la selmana.

Con “Inercia” llega al so quintu poemariu, ¿qué balance fai?
Faigo un balance mui positivu. Llego, como bien dices, al quintu llibru, a un puntu na mio carrera lliteraria que nun imaxinaba cuando entamé a escribir los primeros poemes y a publicar dellos d’esos poemes nes distintes revistes: El canciu’l cuélebre, Entellunu, Lletres Asturianes. Depués llegó’l primer llibru con Trabe nel 2005, Ensin otra sida; dos años depués Treslallende con Carlos Suari: un llibru mui especial por munches razones; el Premiu Fernán Coronas nel 2007, Manual contra’l vacíu, y la so edición; nel 2009 el Premiu de l’Academia, el Llorienzu Novo Mier, con Cuando’l mundu debala, cola so edición nel 2011, que facía yá’l cuartu na llista de los mios llibros, un númberu importante d’obres. Y agora, Inercia, el quintu, un pasín más, non l´últimu, anque entá nun sé de cuántos nesti camín poéticu qu’entamé fai yá dellos años. (more…)

Read Full Post »

L’Academia de la Llingua Asturiana asoleyó’l poemariu últimu de Ricardo Candás, “Nos díes pensatibles” dientro de la so colección «Llibrería Académica», na que fai’l númberu 46.

Esta obra, ganadora del «Concursu de Creación Lliteraria Llorienzu Novo Mier» nel añu 2010, ye un poemariu que sigue’l bagaxe atronador d’un mundu que mos supera, al traviés d’una poesía reflexiva, pensatible, sobre la mirada nubla del amor y de la tierra. Siempre Influenciáu pol llinguaxe metafóricu, el poeta percuerre un camín enllenu de ilancos y desencantu nel que convién, dacuando, parar pa echar tenrura sobre lo andao. La so pesonalísima visión pretende reconstruir un pasáu naufragáu al traviés del llinguaxe señardosu y asosegáu. (more…)

Read Full Post »

La revista cultural y lliteraria d’Antón García, asoleyada pol so sellu Saltadera Ediciones, llega a les llibreríes col númberu 3, un Dossier de poesía norteamericana. Ente los conteníos Martín López-Vega dando “Dos coordenaes de la poesía norteamericana”, la torna de 10 poetes modernistes norteamericanos baxo la selección y traducción d’Héctor Fernández o 5 poemes d’Ezra Pound tornaos al asturianu por Xuan Xosé Sánchez Vicente.

José Luis Argüelles echa “una parolada sobre Poe y Whitman”, mientres Pablo Antón Marín Estrada presenta los trabayos “Un cosmos: Walt Whitman” y “Emily Dickinson, la voz cómpliz”. Esther Prieto torna 5 poemes de Marianne Moore, Silverio Moreda a Frank O’Hara, Berta Piñán a Linda Pastan y Lucille Clifton, Pablo Texón torna nueve pieces de Raymond Carver, y Xosé Anxelu Gutiérrez Morán pon n’asturianu a Ted Kooser y Billy Collins.

Amás Antón García y Jaime Priede tornen a siete poetes norteamericanos y una canadiense; José Luis Piquero fala de “Weldon Kees: l’amargu misteriu” ya Iván Cuevas presenta “We ain’t AmeriKKKa. Muestrina de poesía del Black Arts Movement”. Tornen tamién al asturianu Ramón Lluís Bande, que lo fai con siete poemes de The Four Queens y Back in America, de Barry Gifford; y Laura Marcos que firma “Sherman Alexie: embaxo les plumes y les pintures de guerra”. (more…)

Read Full Post »

La revista lliteraria Formientu va despidir l’añu y a dellos de los sos autores más vieyos nun actu que se va celebrar nel chigre L’Ayalga (c/ Prendes pando 11, Xixón), el xueves 29 d’avientu, a les 20:00 hores. L’actu va valir tamién pa recaudar fondos pa l’asociación Iniciativa pol Asturianu, creada va poco, pos tolos ingresos pola venta de revistes que se faigan esi día van tar destinaos al llabor d’esta organización.

Xareos! Xestión Cultural ye la entidá responsable de la publicación de Formientu, que cumplió apocayá cinco años, con una periodicidá biañal. Depués d’esti tiempu, y col oxetivu de caltener vixente’l subtítulu de «Revista de lliteratura mui moza», llegaba’l momentu de dicir adiós a dellos de los sos collaboradores, qu’entamaron siendo bien mozos y que tienen yá encadarmada una carrera lliteraria, con premios y volúmenes propios nel mercáu en munchos casos. (more…)

Read Full Post »

PABLO R. GUARDADO

Pablo Rodríguez Medina y Ricardo Candás foron los ganadores, ex aequo, del VIII Certame de Poesía Nené Losada Rico. El xuráu escoyó por unanimidá los sos trabayos ‘Mitoloxíes íntimes’ y ‘Naufraxos’ como los meyores.

Ésti tuvo conformáu por Antón García, José Luis Rendueles y Xuan Santori. “Les obres ganadores son intenses y estremaes. Entrambos autores apurren una visión densa y personal del fondu sentimental comúnmente compartíu. Los dos poemarios utilicen una carga metafórica destilada, partiendo dende posiciones poétiques mui distintes, pa lo que remanen un material lliterariu firme que fuxe de la fraxilidá cotidiana”, resalta l’acta del xuráu, que tuvo qu’escoyer ente ocho obres procedentes d’Arnáu (Castrillón), Avilés, Ciudad Real, L’Entregu, Xixón, Uviéu, La Pola Siero y Quart de Poblet (València). (more…)

Read Full Post »

ENRIQUE CARBALLEIRA

Héctor Pérez Iglesias (Llanera, 1978) ye’l nuevu ganador del premiu de creación lliteraria, Llorienzu Novo Mier, de l’Academia de la Llingua Asturiana. La obra ganadora, ‘La mano vacía’ preséntase como un poemariu que trata sobre’l pasu’l tiempu, esperiencies vivíes y paisaxes futuros. L’autor tamién cunta con dalgunos otros premios importantes, ente ellos el Fernán Coronas.

Preséntenos ‘La mano vacía’.
Diría que ye un poemariu nel que s’observa y reflexona sobre dellos aspeutos del pasu del tiempu, una mirada que se fai dende unu d’esos momentos de la vida que paecen claves pa facer recuentu de lo fecho y les espectatives de lo por venir; falo d’oportunidaes perdíes, y tamién de frustración y de la rabia que conlleva ésta munches veces. (more…)

Read Full Post »

IVÁN CUEVAS

Parez innegable, anque haya escritores previos a reivindicar, que les primeres tentatives d’un sistema lliterariu propiu pal asturllionés xurden del llugar poéticu que, mediaos los ochenta, se construyó alredor de tres cases: García, Piñán y Bello. Esti modelo, que non por casualidá s’alzó nun tiempu de multiplicidá d’opciones poétiques, foi esencial pa desenvolver una lliteratura propia, reivindicando un paisaxe psicolóxicu y sentimental de la qu’importaba corrientes que nun pasaben pela metrópoli y (re)inventaba una historia posible que nos conecta, tovía hoi, col pasao lliterario.

Con too y con ello, sobre aquella cimbria valiosa nun s’edificó tolo que se precisaba pa desenvolver una poesía autónoma y fuerte. Pese a los éxitos obvios, produciéronse al menos dos fenómenos en contra de la creación del necesariu sistema lliterariu. Pa lo primero, la monolitización de la corriente acabó por zarrar la renovación de la poesía asturllionesa. Pa depués, too un conglomerao d’antoloxíes, autores billingües, imitadores, revistes y colaboraciones tuvieron un efectu que podíemos llamar de xentrificación del modelo, que, a picos y a micos, foi integrándose como subsistema rexonal nel sistema lliterariu español.

(more…)

Read Full Post »

ANTÓN GARCÍA

Nesti númberu de Formientu, el doble 7-8, nun se nota’l cambiu d’editor. Acierten en Xareos! manteniendo un diseñu que personaliza pa bien el resultáu final. Formientu subtítulase «Revista de lliteratura mui moza», y fai bandera de la creación lliteraria de los más nuevos. Nun podemos evitar que se nos alcuerde esa frase atribuyida a George Bernard Shaw: «La mocedá ye una enfermedá que se cura col tiempu». Pero depués de seis años saliendo, esta revista insiste nello, na xuventú, y nel Entamu Laura Marcos acota pa númberos futuros la edá de participación: nacíos depués de 1980. Eso sí, failo con humor, citando a Ángel González: «Vivir para ver: ¡joven poeta de cuarenta años! / ¿Último logro de la geriatría? / No; retrasado mental, sencillamente».

(more…)

Read Full Post »

La revista Formientu, asoleyada por Xareos! Xestión Cultural, espubliza un númberu doble (7-8) nel qu’hai munches novedaes bien importantes. La revista espubliza per primer vegada un autor en fala, Miguel R. Monteavaro (Bual, 1990), y cunta amás con delles collaboraciones d’autores qu’entá nun espublizaren en Formientu. Ye’l casu de Pablo A. Quiroga, Paula Pulgar, Alex Fernandi, l’autor más mozu de la revista (Uviéu, 1992), o David Artime, que mos presenta un estractu del premiu Trabe de Narraciones, que llevó la so novela «La bufanda», una de les obres con más ésitu en 2010.

Amás nel númberu apaecen autores habituales na revista, como Héctor Pérez Iglesias, Abel Martínez, Jorge Fernández, Ricardo Candás y José Ángel Gayol, que dan amuesa de la lliteratura con más esperiencia.

(more…)

Read Full Post »

ANTÓN GARCÍA

El primer llibru en prosa de Ricardo Candás ye un ensayu de prueba y error de lo que l’autor nos va ufiertar nel futuru. El escritor presenta una riestra de muertes como exe de construcción d’un llibru desigual en calidá y homoxéneu en pretensiones. Respective a lo segundo, la apuesta de Ricardo Candás ye clara: rellatos pa entretener, con una narratividá marcada y vixilante, y un desendolcu de ritmu mui axustáu a les necesidaes de cada cuentu. La muerte ta presente cásique en tolos rellatos, si salvamos «El lladrón de llapiceros», «El trubiecu azul» o «Braulio». Esti últimu, el más floxu con diferencia, ye un rellatu sobre un home que se fai les necesidaes encima pa salvar les perres, y esta vertiente escatolóxica caltiense n’otros cortes del llibru cola muerte como testigu intevitable. «El cáncanu», «Yeren felices», «El suañu de Brunilda»? son cróniques de muerte y sangre más qu’otro. Narren estremaes formes de matar con pulsu y aciertu nel llevantamientu del edificio narrativu. Sicasí, falta un tema definíu nes histories que componen el llibru.

(more…)

Read Full Post »

« Newer Posts