“Ye la llexislatura con más diputaos a favor de la oficialidá, 17 de 45”

PABLO R. GUARDADO

Segunda y cabera parte de la entrevista a Inaciu Galán y González (Xixón, 1986), presidente d’Iniciativa pol Asturianu, que va viaxar esta selmana a Suiza pa intervenir na ONX.

Nestos trés años, dende que nació Iniciativa pol Asturianu, ¿la situación del idioma vivió avances o retrocesos?
La situación ye mala y va peor, no que cinca a la vitalidá de la llingua y a que les autoridaes siguen ensin garantizar la llibertá de los ciudadanos pa qu’al terminar el sistema educativu puedan escoyer qué llingua falen, porque salgan bien formaos n’asturianu y castellán, y porque esista una oficialidá que garantice’l drechu a usala en tolos ámbitos.

Por embargu, el sofitu de cada vegada más partíos de tol espectru políticu y l’enorme consensu social a favor del asturianu, más d’un 60% de partidarios de la oficialidá según les encuestes, faenmos ser positivos al respective del futuru. Tamos a tiempu de cambiar la tendencia que lleva l’asturianu hacia la desapaición en poques décades y tamos enfotaos en que vamos consiguilo.

Nel ámbitu de la reivindicación ta faciéndose cada vegada un meyor trabayu. L’importante llabor reivindicativu de la Xunta pola Defensa de la Llingua Asturiana impulsando la manifestación cada añu; el llabor sectorial de Softastur, nel campu de la informática; de Reciella, families pol asturianu, cola tresmisión del idioma a los neños; y otres organizaciones d’otru tipu como El Ronchel, Ástura, El Teixu, N’Ast, Faceira y Furmientu en Lleón, grupos de trabayu dientro de los partíos, asociaciones, llocales sociales…

Hai un movimientu plural, ampliu y que ye exemplu de convivencia. Tovía mos queda, sí me paez, un pasu más, una mayor coordinación de tol movimientu.

Read Full Post »

Educación va recurrir la sentencia sobre’l númberu mínimu d’alumnos pa formar un grupu de Llingua Asturiana n’ESO

El conseyeru d’Educación y Ciencia del Principáu d’Asturies, Herminio Sastre, anunció esti martes que’l Principáu tien previsto recurrir la sentencia de la Sala de lo Contencioso Alministrativo del Tribunal Superior de Xusticia d’Asturies, que “declara nulu y sin efectos por ser contrariu a Derechu”, l’artículu 5.1 de la norma qu’establecía un númberu mínimu d’ocho alumnos pa formar un grupu na asignatura de Llingua Asturiana na Educación Secundaria.

El TSXA estimaba asina la demanda interpuesta polos servicios xurídicos de CC.OO contra la Resolución de 16 de mayu del 2008, de la Conseyería d’Educación y Ciencia, pola que s’establecía la ufierta y les condiciones pa la elección de materies optatives y materies opcionales pa la Educación Secundaria Obligatoria.

Read Full Post »

Echen a andar les I Xornaes de la Música Alternativa Asturiana

Les I Xornaes de la Música Alternativa Asturiana, entamaes pol Ensame Cultural Sonastur y Fnast.net, van celebrase en Xixón ente’l 25 y el 29 d’agostu. El hip hop, el hardcore y el rock astur van ser los asuntos que se traten nestos alcuentros, que nacen col oxetivu d’«abrir un espaciu de debate qu’avere y muestre a la sociedá que la música d’Asturies nun ye namás lo que se siente pela radio», indiquen los colectivos organizadores. Amás, la organización remarca que quier demostrar que «la nuestra música ta viva y que, a pesar del silenciu mayoritariu, siempre van existir voces qu’amuesen qu’esti país tien voz y son».

Read Full Post »

Refúndase’l Conseyu Asesor pa desarrollar la Ordenanza del Asturianu en Xixón

L’organismu, que va asesorar al Conceyu de Xixón en materia llingüística, incorpora miembros de partíos políticos y organizaciones sociales y profesionales y entama a funcionar depués de l’aprobación de la Ordenanza del Asturianu. L’anterior conseyu, del que yeren parte colectivos como la Xunta, que yá nun tán presentes nesti, dimitiera en 2006, como protesta pol bloquéu a les sos iniciatives.

Amás de Jesús Montes Estrada “Churruca” como presidente del Conseyu, incorpórense como miembros Ramón d’Andrés (como espertu propuestu pola Alcaldía), Julio Ramos del PSOE, Humberto Gonzali del PP, Roberto Colunga d’IU-BA-Los Verdes, Consuelo Vega del Principáu d’Asturias, Jordán Suárez del Conseyu de la Mocedá de Xixón, Urbano Rodríguez de la Academia de la Llingua, Isabel Tuñón de la Federación d’Asociaciones de Vecinos, Xosé M.ª García de l’asociación de vecinos de la zona rural «Les Caseríes» , Jorge Espina de CC OO, José Luis Llera d’USO, Berto Cobreros de SUATEA, Carmen Moreno de la Unión de Comerciantes y Ricardo Álvarez de l’ Asociación d’Hostelería.

Read Full Post »

Xuan Xosé Sánchez Vicente faise cola segunda convocatoria del Premiu Timón

Según informó l’Arribada, a seis díes andaos del mes de setiembre, aconceyara’l xuráu del Premiu Timón 2008 na ciudá de Xixón, y tando formáu por David M. Rivas, Roberto Colunga, Milio Rodríguez Cueto, Humberto Gonzali, Aurora García Rivas, Xosé Nel Riesgo Fernández, María Teresa González Cobos ya Illán Gonzali alcordó, por unanimidá, otorga-y el gallardón correspondiente a la edición d’esti añu, en virtú del valir de la so trayectoria lliteraria, a D. Xuan Xosé Sánchez Vicente.

Read Full Post »