La Tertulia Malory escueye ‘Onde’l caos se texe y se destexe’, de Xulio Viejo, como meyor llibru n’asturianu del añu 2021

La Tertulia Malory, de L’Entregu, escoyó como meyor llibru n’asturianu de tolos que s’editaron nel 2021 la novela Onde’l caos se texe y se destexe, del escritor y profesor universitariu Xulio Viejo. El xuráu formáronlu los escritores Xulio Arbesú, José Luis Rendueles, Solinca Turbón, Roberto Corte, Aique Fernandi, Beatriz Quintana, David Fernán, Chechu García y Henrique G. Facuriella, que fallaron el premiu nun actu celebráu na tertulia’l viernes 7 de ochobre de 2022.

El xuráu destacó, nel acta del fallu, cómo’l llibru «amuesa una narrativa híbrida d’un valir lliterariu altu, qu’afita de forma perfecha’l camín de lo universal a lo llocal, siendo quién a empatar  a historia familiar con un territoriu míticu y, al empar, real, como ye Quirós, y que furrula como una métafora d’Asturies y del orixe mesmu de la cultura occidental». El xuráu tamién quixo rescamplar la calidá tan grande de la producción lliteraria n’asturianu del añu 2021, lo que fixo que la decisión de premiar la novela de Xulio Viejo se garrara por mayoría depués d’una votación apretada.

Read Full Post »

La Tertulia Malory escueye Les isles inciertes, de Xuan Bello, como meyor llibru n’asturianu del añu 2020

La Tertulia Malory, de L’Entregu, escoyó como meyor llibru n’asturianu de tolos que s’editaron nel 2020 al poemariu Les isles inciertes, del escritor y periodista Xuan Bello. El xuráu tuvo formáu polos escritores Xulio Arbesú, José Luis Rendueles, Solinca Turbón, Roberto Corte, Laura Marcos, Aique Fernandi, Beatriz Quintana, David Fernán, Chechu García y Henrique G. Facuriella, que fallaron el premiu nun actu celebráu na tertulia’l 19 de payares de 2021.

El xuráu destacó, nel acta del fallu, «ye un poemariu atemporal, nel que l’autor fai un diálogu cola tradición poética universal, nun viaxe d’enorme valor artísticu onde resuenen los ecos de los grandes maestros»; el xuráu tamién punxo en vallir la gran calidá de la producción lliteraria n’asturianu del añu 2020, lo que fixo que la decisión de premiar el poemariu de Xuan Bello se garrara por mayoría.

Read Full Post »

«Memoria de Tuña», d’Antón García, meyor llibru n’asturianu del añu 2019 pa la Tertulia Malory

La Tertulia Malory, de L’Entregu, escoyó como meyor llibru n’asturianu de tolos que s’editaron nel 2019 la novela Memoria de Tuña, del escritor, editor y actual Director Xeneral de Política Llingüística del Gobiernu d’Asturies, Antón García. El xuráu tuvo formáu polos escritores Xulio Arbesú, José Luis Rendueles, Solinca Turbón, Pablo Rodríguez Medina, Roberto Corte, Aique Fernandi, Chechu García y Henrique G. Facuriella, que fallaron el premiu nun actu celebráu na tertulia’l 4 de setiembre de 2020.

El xuráu destacó, nel acta del fallu, «La novela guarda una unidá tonal, l’autor ye quien a construir, a partir de la señaldá y el sentimientu, un universu simbólicu, onde con emoción controlada facer un homenaxe al pueblu, la familia, la infancia y la tradición”, amás de la calidá de la producción lliteraria n’asturianu del añu 2019, lo que fixo que la decisión de premiar la novela d’Antón García se garrara por mayoría.

Read Full Post »

La Tertulia Malory escueye ‘Incorrectos’, de David Artime, como meyor llibru n’asturianu del añu 2018

La Tertulia Malory, de L’Entregu, escoyó como meyor llibru n’asturianu de tolos que s’editaron nel 2018 la novela Incorrectos, del escritor y periodista David Artime Coto. El xuráu tuvo formáu polos escritores Xulio Arbesú, José Luis Rendueles, Solinca Turbón, David Fernán, Roberto Corte, Aique Fernandi, Chechu García y Henrique G. Facuriella, que fallaron el premiu nun actu celebráu na tertulia’l 21 de xunu del 2019.

El xuráu destacó, nel acta del fallu, «l’arquitectura narrativa, el ritmu y la fondura psicolóxica de caún de los personaxes protagonistes d’una obra que va muncho más p’allá de la premisa argumental, al poner al llector énte un espeyu qu’enseña los demonios de la sociedá d’anguaño con un realismu grande», amás de la calidá altísima de la producción lliteraria n’asturianu del añu 2018, lo que fixo que la decisión de premiar la novela d’Artime se garrara por mayoría.

Read Full Post »

La Tertulia Malory celebra’l XX aniversariu con un programa d’actividaes culturales en L’Entregu

Xuntase tolos vienres pa falar y debatir de llibros y lliteratura ye lo que vienen faciendo, dende hai yá venti años, los miembros de la Tertulia Malory, qu’aconceya, dende 1998, na cervecería Tom Malory de L’Entregu. Nacida de los talleres lliterarios que diera’l profesor Benigno Delmiro na biblioteca de L’Entregu, esta tertulia foi amestando, col tiempu, voces nueves al grupu inicial, un grupu del que permanecen, fieles a la cita selmanal, nomes como los de los escritores Chechu García y Xulio Arbesú o’l director de teatru Roberto Corte.

Pa conmemorar esti aniversariu, los miembros actuales de la tertulia tienen preparáu un conxuntu d’actividaes que se van desenvolver ente los díes 5 y 7 d’ochobre baxo la denominación común de «Maratón Malory» y que van arrancar el vienres 5, a partir de les cuatro y media de la tarde, con una Tertulia Lliteraria abierta na mesma cervecería Tom Malory. D’ehí, saldráse pa la Casa Cultura de L’Entregu, onde, a les seis de la tarde, va inaugurase la esposición 20 años de Tertulia Malory, onde se van poder ver dibuxos, llibros y otres pieces rellacionaes cola vida de la tertulia, tal como una de les medalles que s’entreguen a los ganadores del Premiu Malory al Meyor Llibru n’Asturianu, que, dende’l 2012, vien concediendo la tertulia. A les ocho y media, la cita va ser otra vuelta na cervecería Tom Malory, onde va principiar una una K-charrada poética con micrófonu abiertu, a la que tán invitaes a participar toles persones que quieran.

Read Full Post »

‘El llibru póstumu de Sherezade’, de Raquel F. Menéndez, meyor llibru n’asturianu pa la Tertulia Malory

La Tertulia Malory, de L’Entregu, escoyó, por mayoría, como meyor llibru n’asturianu de tolos que s’editaron nel 2017 el poemariu El llibru póstumu de Sherezade, de la escritora Raquel F. Menéndez, col que yá ganara, nel 2016, el Premiu Nené Losada Rico. El xuráu tuvo formáu polos escritores Xulio Arbesú, José Luis Rendueles, Pablo Rodríguez Medina, Solinca Turbón, David Fernán, Roberto Corte, Chechu García y Henrique G. Facuriella, que fallaron el premiu nun actu celebráu na tertulia’l 22 de xunu del 2018.

El xuráu destacó, nel acta del fallu, «l’autenticidá de la voz poética y la verdá de les emociones que l’autora espeya en caún de los poemes, unes emociones que tienen como puntu de partida les rellaciones ente les tres protagonistes femenines del llibru: la propia poeta, la güela con alzhéimer y la madre. L’autora muéstrase heriede de un llinaxe femenín que se materializa nel conocimientu que vien al traviés de los oxetos probes –botones, alpargates, el café de pota…– pero, sobre too, de los cuentos, como aquellos colos que la Sherezade de Les mil y una nueches va consiguiendo ganar un día más de vida». El gallardón consiste nuna ilustración d’Alfonso Zapico y una medaya conmemorativa, que se van entregar nun actu públicu en L’Entregu en feches próximes.

Read Full Post »

La Tertulia Malory escueye ‘Lluvia d’agostu’, de Francisco Álvarez, como meyor llibru n’asturianu del añu 2016

La Tertulia Malory, de L’Entregu, escoyó como meyor llibru n’asturianu de tolos que s’editaron nel 2016 la novela Lluvia d’agostu, del escritor xixonés Francisco Álvarez. El xuráu formáronlu los escritores Xulio Arbesú, José Luis Rendueles, Pablo Rodríguez Medina, Solinca Turbón, David Fernán, Roberto Corte, Chechu García, Lluis Aique Iglesias y Henrique G. Facuriella, que fallaron el premiu nun actu celebráu na tertulia’l 23 de xunu del 2017.

El xuráu destacó, nel acta del fallu, “la maestría cola que l’autor resuelve una empresa tan ambiciosa como la de contar la historia del anarquista Buenaventura Durruti ensin perder de vista al home que la historia convirtiera nun símbolu. Tres d’esti trabayu narrativu, onde Álvarez fai rescamplar el so dominiu del asturianu pa facer llegar al públicu la historia al traviés d’un llinguaxe contemporaneu, apréciase un llabor de documentación rigorosu, que mete dafechu al llector na trama y lu conecta colos sos protagonistes».

Read Full Post »

L’aire ente la rama, meyor llibru n’asturianu del 2015 pa la Tertulia Malory

La Tertulia Malory, de L’Entregu, escoyó como meyor llibru n’asturianu de tolos que s’editaron nel 2015 el poemariu L’aire ente la rama, de la escritora d’Argüeyes (Siero) Ángeles Carbajal. El xuráu formáronlu los escritores Xulio Arbesú, José Luis Rendueles, Pablo Rodríguez Medina, Solinca Turbón, David Fernán, Roberto Corte, Chechu García y Henrique G. Facuriella, que fallaron el premiu nun actu celebráu na tertulia’l 24 de xunu del 2016.

«L’aciertu col qu’Ángeles Carbajal vuelve la mirada a la infancia y la tresmuta n’imáxenes d’un conteníu llíricu y emocional mui fondu, non solo como memoria del tiempu que pasó, sinón, sobre manera, como diálogu ente’l yo poéticu qu’escribe nel presente y la neña que foi. Rescampla nesti poemariu de Carbajal una habilidá pa rescatar los conocimientos del pasáu y tresformalos en materia válida pa trensitar la vida hacia’l futuru», pue lleese nel acta del fallu.

Read Full Post »

La Tertulia Malory escueye ‘Más espeso que l’agua’, de Consuelo Vega, como meyor llibru n’asturianu del 2014

La Tertulia Malory, de L’Entregu, escoyó como meyor llibru n’asturianu de tolos editaos nel 2014 el conxuntu de cuentos Más espeso que l’agua, de la escritora ayerana Consuelo Vega. El xuráu tuvo formáu polos escritores Xulio Arbesú, José Luis Rendueles, Pablo Rodríguez Medina, Solinca Turbón, David Fernán, Roberto Corte, Chechu García y Henrique G. Facuriella, que fallaron el premiu nun actu celebráu na tertulia’l 26 de xunu del 2015. El xuráu destacó nel acta del fallu “una magnífica coleición de cuentos qu’algamen con voz sensible, firme y poderosa’l terrén de la maestría narrativa, amosando al llector el delicáu misteriu que s’escuende tres de lo cotidiano, siempre con una prosa esencial, guapa, ensin aditivos. Histories de xente corriente, vides comunes que, gracies a l’habilidá d’una observadora atenta, resulten aventures estraordinaries.”

El gallardón consiste nuna ilustración d’Alfonso Zapico y una medaya conmemorativa, que se van entregar nun actu públicu en L’Entregu en prósimes feches.

Read Full Post »

La Tertulia Malory escueye “Carne de melandru”, de Milio Rodríguez Cueto, como meyor llibru n’asturianu del 2013

La Tertulia Malory, de L’Entregu, escoyó como meyor llibru n’asturianu de tolos editaos nel 2013 la novela Carne de melandru, del escritor Milio Rodríguez Cueto. El xuráu tuvo formáu polos escritores Xulio Arbesú, José Luis Rendueles, Pablo Rodríguez Medina, Solinca Turbón, David Fernán, Roberto Corte, Chechu García y Henrique G. Facuriella, que fallaron el premiu nun actu celebráu na tertulia’l 24 d’ochobre del 2014. El xuráu destacó nel acta del fallu «la maestría del artificiu narrativu que constrúi Rodríguez Cueto a la hora de contar a les xeneraciones más nueves l’ambiente, los valores y les rellaciones personales d’un tiempu col que la mayoría d’ellos cuenta que nun tien nada que ver».

El gallardón consiste nuna ilustración d’Alfonso Zapico y una medaya conmemorativa, que se van entregar nun actu públicu en L’Entregu’l 21 de payares.

Read Full Post »