Xeollingüística asturiana nel CSIC en Madrid

El pasáu 28 de setiembre celebróse en Madrid el coloquiu académicu tituláu «Xeollingüística peninsular: investigaciones en cursu». Organizáronlu les profesores Pilar García Mouton, Isabel Molina Martos y l’asturiana Rosabel San Segundo Cachero, del Centru Superior d’Investigaciones Científiques (CSIC), al traviés del so Centru de Ciencies Humanes y Sociales (CCHS).

Esti alcuentru científicu dio un repasu detalláu del estáu de les investigaciones actuales en xeografía llingüística peninsular: trabayos de dixitalización del Atlas Lingüístico de la Península Ibérica (ALPI), investigaciones remanecíes de los datos del ALPI, xeollingüística de les fales ente España y Portugal, y proyectos diversos sobre xeografía llingüística y dialectoloxía d’Andalucía, Madrid, Asturies, País Vascu, Galicia, Cataluña-Valencia-Baleares y Portugal.

Read Full Post »

La Revista de Filoloxía Asturiana va camudar de títulu y configuración

Acaba d’apaecer el númberu 17 de la «Revista de Filoloxía Asturiana» col que se zarra una etapa qu’entamó nel añu 2001.

D’agora en delantre, la revista acoyeráse a una nueva orientación qu’implicará un cambiu de títulu y de configuración y d’ello daráse anuncia a lo llargo de los próximos meses.

Read Full Post »

L’Alla desenvuelve esti Payares les XXXVI Xornaes d’Estudiu

L’Academia de la Llingua Asturiana vieno acabante d’asoleyar esti dia’l programa de les Xornaes que va organizar como tolos años del 7 al 9 del mes de Payares na Facuáltá de Filosofia y Lletres del campus delán Milán.

Les XXXIV Xornaes Internacionales d’Estudiu van celebrase como cada añu sedrá nel salón d’actos de la Facultá de Filosofía y Lletres y la inauguración va tener llugar el martes 7 a les 12 hores cola presentación de dos espublizaciones de l’Academia de la Llingua Asturiana, la edición dixital del “Lletres Asturianes 117” y el nuevu númberu de la revista dixital “Ciencies. Cartafueyos de Ciencia y Teunoloxía 7”, dixirida por Carlos Lastra.

Tres de la presentación entamarán les xornaes propiamente diches cola participación del académicu Francisco Llera Ramo (Universidá del País Vascu) que va facer la presentación en sociedá de la III Encuesta Sociolingüística de Asturias.

Read Full Post »

L’ALLA espubliza’l númberu 114 de ‘Lletres Asturianes’

PABLO R. GUARDADO

El ‘Lletres Asturianes’ 114 yá ta disponible tanto en formatu físicu como pa la so consulta na rede al traviés de la web de l’Academia de la Llingua Asturiana (ALLA). El boletín de la institución presenta ocho trabayos d’investigación.

Abre esti númberu Olga Álvarez, de la Universidá d’Uviéu, con ‘Los verbos con prefixu a- n’asturianu’, pa depués siguir col estudiu del so compañeru d’universidá Guillermo Lorenzo, entituláu ‘¿Por qué no en asturiano? El infinitivo flexionado como ‘apomorfia negativa’ de la lengua asturiana’. Rosabel San Segundo, de la Universidade de Lisboa, fala mentes de la ‘Negación metalingüística y estructura informativa: caracterización sintáctico-pragmática de ‘non”.

Read Full Post »

Atrévite a saber

ANTÓN GARCÍA

Varia asturlleonesa n’homenaxe a José A. Martínez
Edición de Ramón d’Andrés, Taresa Lorences y Juan Carlos Villaverde
Uviéu, Trabe, 2015

José Antonio Martínez, Catedráticu de Llingua Española na Universidá d’Uviéu, dexa l’actividá docente depués de cuarenta años de maxisteriu. Los compañeros d’esti asturianu d’Armellada d’Órbigu (Llión) ufiérten-y, con eso, dos publicaciones d’homenaxe. Los estudios gramaticales queden reuníos nel volume Studium Gramaticæ. El Seminariu de Filoloxía Asturiana de la universidá asturiana ofrez-y otru, Varia asturlleonesa, tirada aparte del númberu 14 de la Revista de Filoloxía Asturiana, onde se xunten dellos estudios que tienen como obxetu l’asturianu d’entrambos llaos del cordal, aspectos relacionaos con esta llingua o la so lliteratura. Hai, sicasí, una bien interesante escepción, el documentáu y amenu trabayu que zarra’l volume y que firma Clara Ilham Álvarez sobre Muñoz de la Presa, un renegáu palentinu nel Túnez otomanu del sieglu XVIII. Si la figura del cautivu en tierra de moros ta mui viva na lliteratura moderna del ámbitu mediterraniu (toi pensando na narrativa de Baltasar Porcel), ye un tema qu’al noroeste peninsular parez queda-y lloñe. Álvarez Dopico rescata la historia de quien llegó a tener un cargu importante na corte beilical de Túnez, pero apunta otros datos curiosos: les males relaciones ente distintes órdenes relixoses, el sincretismu de los que cambiaben de fe o los casos de los marineros de Xixón, Llanes o Cuideiru que tuvieron cautivos n’Arxel depués de que los corsarios los prindaren.

Read Full Post »

Revista de Filoloxía Asturiana. Volume 14

Varios autores
ISSN: 1578-9853-14
15,5 x 21,5 cm || 438 páxs. || PVP: 25 €

Volume númberu 14 de la Revista de Filoloxía Asturiana correspondiente al añu 2014. Nella vamos atopar: Varia asturlleonesa n’homenaxe a José Antonio Martínez («La impronta del funcionalismo en los estudios lingüísticos del asturiano», por Javier San Julián Solana; «La polaridad negativa en los datos asturianos del ALPI», por Pilar García Mouton y Rosabel San Segundo Cachero; «El artículo neutro en gallego-asturiano», por Ramiro Javier Barcia López; «Sintaxis de los complexos verbales y posición de los clíticos n’asturianu», por Taresa Fernández Lorences; «Sobro la cantidá vocálica n’asturianu y les sos implicaciones teóriques», por Xulio Viejo Fernández; «Un esbozu pal estudiu de les interferencies y ultracorrecciones fóniques ente l’asturianu y el castellanu», por Ramón d’Andrés; «H.ablamos payu: una aproximación al estudiu del continuum sociolectal dende la xeolingüística», por María Cueto Fernández; «Na frontera del asturllionés y el gallegoportugués: descripción y exame horiométricu de la fala de Fernidiellu (Forniella, Llión), I. Fonética», por Fernando Álvarez-Balbuena García; «Xuan González Villar (1746-1820), autor de La Xudit: una vida entre Asturias y León», por Xuan Carlos Busto Cortina; «Origen de los maragatos de fray Martín Sarmiento: el manuscrito de Oviedo», por M.ª Jesús Villaverde Amieva; «Un testimonio de /n/ velar en asturiano (A propósito de una etimología dieciochista de Covadonga)», por Juan Carlos Villaverde Amieva; «Fernando Muñoz de la Presa, alias Sidi cAli: un renegado palentino en el Túnez otomano», por Clara Ilham Álvarez Dopico), rellectures (Romance de la tierra: chanson populaire asturienne», por Åke W:son Munthe) y reseñes («María Dolores Gordón Peral (coord.), Lengua, espacio y sociedad. Investigaciones sobre normalización toponímica en España», por Eduardo Blasco Ferrer).

(d’Ediciones Trabe, 24-08-2015)

Read Full Post »

L’Alla peracaba’l programa de les XXXIV Xornaes d’Estudiu

L’Academia de la Llingua Asturiana organizará como tolos años nel mes de Payares les XXXIV Xornaes Internacionales d’Estudiu. Como cada añu sedrá nel salón d’actos de la Facultá de Filosofía y Lletres y la inauguración va tener llugar el martes 3 a les 16,15 hores cola presentación de dos espublizaciones de l’Academia de la Llingua Asturiana, la edición dixital del “Lletres Asturianes 113” y el quintu númberu de la revista dixital “Ciencies. Cartafueyos de Ciencia y Teunoloxía”, dixirida por Carlos Lastra.

Tres de la presentación entamarán les xornaes propiamente diches con una ponencia de la decana de Filolofía y Lletres, Cristina Valdés Rodríguez (ALLA & Universidá d’Uviéu) que presentará un “enfoque polisistémicu a la traducción n’asturianu: normes y estratexes”.

Read Full Post »

L’academia espubliza’l númberu 112 de Lletres Asturianes

Por segundu añu consecutivu, l’Academia de la Llingua Asturiana aprovechó la selmana na que se celebra’l Día Mundial del Llibru pa entamar a esparder la so revista más popular y con mayor posu científicu, Lletres Asturianes, qu’aporta con esti númberu al 112. Esti númberu 112 recueye dellos trabayos d’investigación d’un total de 11 autores, de los que la mayoría ya foron protagonistes de les Xornaes Internacionales d’Estudiu y Trabayu que se desenvuelven cada añu n’ochobre. Nellos, tóquense temes como la toponimia,la morfoloxía nominal, l’asturianu y les nueves teunoloxíes, la etimoloxía asturiana, el mirandés o l’asturianu ente les lllingües romances. Lletres Asturianes ye’l Boletín de l’Academia de la Llingua Asturiana y espubliza dos númberos añales, entamando la so hestoria nel añu 1982 y aportando nel añu 2011 a la rede Internet, con una versión dixital d’accesu llibre que pue consultase dende’l númberu 105.

Amás de les secciones que davezu s’atopen nesta revista científica,. como Reseñes Bibliográfiques, Notes y anuncies o Llibrería Asturiana, el númberu 112 presenta un total de 10 trabayos que s’averen a distintos campos de conocimientu. Rosabel San Segundo Cachero presenta un trabayu sobre “El neutro de materia en la morfología nominal del asturiano del concejo de L.lena”; Alberto Gómez Bautista fala de “A formação de palavras em mirandês e a obsolescência linguística”; Anne-Marie Chabrolle-Cerretini filo sobre “La lengua asturiana en los textos lingüísticos francófonos” y Pablo Suárez García escribe sobre “L’arte la guerra. Sobre’l léxicu bélicu na nuesa llingua”.

Read Full Post »

Sal un númberu nuevu de la «Revista Filoloxía Asturiana»

Alvízoras Llibros y Trabe tán a puntu de sacar a la cai la Revista de Filoloxía Asturiana, publicación especializada del Seminariu de Filoloxía Asturiana (SFA), grupu d’investigación de la Universidá d’Uviéu. Na revista tienen acoyida estudios sobre l’asturianu, el gallego-asturianu o les variedaes del asturllionés propies de les árees llionesa y mirandesa, amás d’artículos sobre lliteratura. Agora, el SFA presenta los númberos 6, 7 y 8, editaos nun solu volume de cuasi 500 páxines. Esti númberu nuevu ta dirixíu por Juan Carlos Villaverde Amieva y Xuan Carlos Busto Cortina.

Read Full Post »