El Pegollu de la XDLA ye pa la empresa Reteyaores

PABLO R. GUARDADO

La Xunta pola Defensa de la Llingua Asturiana (XDLA) dio a conocer esti miércoles los ganadores de los XXXII Premios Andrés Solar. La empresa Reteyaores lleva’l Pegollu, mentes que la estaya negativa, el Madreñazu, ye pa la Delegación del Gobiernu estatal n’Asturies na persona de Gabino de Lorenzo.

Un xuráu encargóse de seleicionar a los merecedores de los XXXII Premios Andrés Solar ente toles candidatures presentaes. El Pegollu, el gallardón que reconoz a una entidá o persona que rescamplara pol so llabor en defensa o promoción del asturianu, recayó nesta ocasión en Reteyaores, “empresa del sector de la construcción que vien llevando alantre’l so llabor con especial procuru nel tratamientu y usu del asturianu en tolos soportes comerciales y sociales que manexa”. La firma con sede en Sariegu asocede nel palmarés a Sidra L’Allume.

Read Full Post »

Lluces y sombres

ANTÓN GARCÍA

Palabres
Grupu de Baille San Félix de Candás
La Pola L.lena, 2014.

A diferencia d’otres espresiones artístiques asturianes, como la música de gaita, la tonada o la lliteratura, que nes últimes décades caminaron con bastante fortuna hacia la modernización de les sos formes y llinguaxes, la danza tradicional parecía marchar en dirección contraria, buscando afondar nesa tradición bebiendo de les fontes orales tovía vives, procurando, como nel xuegu del dominó, repetir y respetar. Lo que se ganó n’autenticidá, depués de la cuestionable folclorización de los coros y dances del franquismu, perdióse n’actualización, quedando les dances tradicionales nuna recreación etnográfica brillante, na que los grupos competíen por una puesta n’escena cada vez más tradicional: cásique resulta impensable un baille ensin el traxe asturianu d’a primeros del sieglu XIX, que tampoco llogró nenguna actualización notable de la mano del diseñu de moda.

Read Full Post »

Silvia Quesada asoleya discu en solitariu

Depués del so pasu por coleutivos y grupos como “Muyeres”, Blima nel so primer discu (“Entamu”), Los Gatos del Fornu nel segundu (“Na cai”) y tres de les voces del últimu trabayu de Tejedor (“Positivu”), -grupu col qu’anguaño sigue de xira-, Silvia Quesada decide poner la so voz nes manes d’ Alfredo González y Sergio Rodríguez pa que-y produzcan la que ye la so primer grabación como solista: “La pena abierta”, que sal baxo l’amparu del sellu Algamar Producciones.

Les canciones son, na so mayoría, músiques del propiu Alfredo González -sacante dos composiciones de Javier Vallina, líder del grupu Bueno- basaes en testos propios y ayenos. Tamos falando d’un trabayu sele, semi acústicu, con un pie nel so rexistru habitual y otru mirando a otres fronteres -pop, podríemos dicir cola boca pequeña, y taríemos xeneralizando n’escesu-. La instrumentación ye decididamente austera: la guitarra acústica y la viola de Rubén Bada, el baxu y les programaciones de Sergio Rodríguez, el pianu d’Alfredo y la voz de Silvia. Xunto a estos, collaboraciones con nome y soníu propiu: el propiu Javi Vallina, Elías García, los hermanos Tejedor… Nada sobra nin paez faltar nuna obra que pretende destacar la voz de la muyer que-y da nome y les histories que canta.

Read Full Post »

Música y lliteratura van de la mano nel espectáculu ‘Palabres’ del Grupu de Baille San Félix de Candás

El vienres 8 de payares, a les 20h., el Grupu de Baille San Félix de Candás va estrenar l’espectáculu Palabres, organizáu en coproducción col Teatru Prendes de Candás y l’apoyu del Conceyu de Carreño. Un proyectu qu’axunta música y lliteratura que va tener una segunda función el sábadu día 9 nel mesmu escenariu, y que se va llevar a diferentes llugares d’Asturies a lo llargo de 2013 y 2014.

Depués de más d’un añu de trabayu, el Grupu de Baille San Félix anuncia esti proyectu que consideren, en fondu y forma, el más arriesgáu nos trenta años de trayectoria que tien esta formación. “Palabres defínese como una propuesta artística multidisciplinar que, sofitada na ellaboración d’un análisis críticu de la situación actual de la llingua asturiana -en toles sos variantes- desendolca una obra onde lliteratura, artes escéniques, arte audiovisual, música y baille tradicional interactúen de manera simultánea nun mesmu espaciu escénicu. Asina, quier que se xenere un nuevu discursu artísticu que s’articula alredor de dos puntos: el respetu a la tradición propia; y l’anovación y creación de víes d’accesu afayadices p’atraer a nuevos públicos, interesaos en reflexonar sobre’l propiu conceutu “tradición”. Too ello con un denominador común y central: el poder de la palabra.”

Read Full Post »

L´asturianada ensin repolitar presta más

AURELIO ARGEL

El año recién termináu remató entregando trabayos variaos cola asturianada como protagonista. Delles voces d’esta asturianada apurrieron discos curiosos con tratamientu, acompañamientu, producción y presentación estremáes que son exemplu de pluralidá y riqueza pero tamién de cómo entender, sentir y tratar -o saber tratar – el xéneru más representativu de la música d’esti país. Títulos y pieces perclásiques, arranxos sobre la tradición, igües curiosines y hasta temes novalinos apaecen con pesu en «Poema sinfónico» de la Banda Gaites «Noega», grabación conxunta con otros artistes y tamién, d’otros modos, a manera de cantares populares reibilicoquiaos con otros sones, alcuéntrense nel discu de Fernando Valle Roso «Camín d’ayures» (EveryGoodSong) que llevó’l premiu a «Meyor discu del añu» pa la Crítica de la RPA. D’igual manera les grabaciones cencielles pero necesaries qu’entrega añu ente añu la Fonográfica Asturiana contaron con «Recordando mi niñez», de la veterana María Teresa González Soto, acompañada a la gaita por unu de los grandes del xéneru, Óscar Fernández, y que ya recibi’l premiu de la Crítica de RPA a «Meyor discu del añu» na estaya de canción asturiana. Pero sobremanera, hai tres títulos de rescample pa señalar: «Aire», «Cancios y asturianáes» y «Cola lluz de l’alborada.

Read Full Post »

Xune Elipe: “La mayor novedá del discu ye sentir a Dixebra nun formatu acústicu en dos temes”

PABLO R. GUARDADO

Los y les siguidores de Dixebra tán de norabona. La banda de Xune Elipe (Villalegre, 1962) celebra los sos 25 años de vida con ‘Dixebra XXV. 1987-2012’, un discu recopilatoriu con novedaes abondes y una edición espectacular.

Dixebra cumple 25 años con más vitalidá que nunca. ¿Pensaba que’l proyeutu qu’entamó nel 1987 diba a tener tan llargu percorríu?
La verdá que nun me lo podía figurar lo más mínimo. Nun sabíemos si díbemos poder aguantar un añu, cuanto menos venticinco. Lo que sí teníemos yeren munches ganes de facer coses, de tirar p’alantre…

Read Full Post »

Dixebra edita un discu especial pol so 25 aniversariu

Dixebra celebra’l so 25 aniversariu cola edición d’un discu mui especial: Dixebra XXV. 1987-2012. Con un formatu de luxu atractivu y orixinal, la obra repasa, en venti temes, dellos de los momentos y estilos que marcaron la trayectoria de la formación y fai una retrospectiva sonora de les sos grabaciones en toos estos años. La producción tuvo al cargu de Sergio Rodríguez, collaborador habitual del grupu.

Amás de los músicos actuales, collaboraron na grabación ex-componentes, amigos y intérpretes destacaos de la escena asturiana, como Israel Sánchez (El Sueño de Morfeo), Rubén Bada, Pablo Carrera (Duerna), Lisardo Prieto (Felpeyu), José Manuel Tejedor, Daniel Álvarez (Corquiéu) o Miguel Herrero, ente otros.

Read Full Post »

Karaoke pa cantar n’asturianu

La Oficina Municipal de la Llingua del Conceyu de Xixón presentaba ayeri nos sestos Alcuentros de Mocedá «Saca la Llingua» una iniciativa bien prestosa pa promocionar la llingua asturiana ente esi sector de la sociedá.

Trátase d’un karaoke conteniendo dellos de los cantares más conocíos de la música fecha n’asturianu de los últimos años: “Tengo de rondar to valle” y “So vaqueiru”, pieces tradicionales popularizaes pol dúu Nuberu; “Chacho” y “Nun yes tu” del grupu de Tolivia (Llaviana) Los Berrones; la versión del mui popular “Chalaneru” fecha a comuña ente los hermanos Tejedor y el cantante Chus Pedro; “Rapaza nacionaliega” y “Canciu d’amor” de la banda avilesina de rock Dixebra; “Mexé na caleya”, composición que se fixo mui famosa hai unos años perteneciente a La Bandina; “La capitana”, ún de los cantares más populares del músicu xixonés Carlos Rubiera; “Sonia” y “Los suaños, suaños son” de la formación de ska-punk de Candás Skama la Rede; y el tema de l’agrupación infantil Xentiquina “Bocadillu rock”.

Read Full Post »