La Biblioteca d’Asturies estrena’l ciclu Palabra viva dientro de la so programación d’actividaes p’adultos

La Biblioteca d’Asturies Ramón Pérez de Ayala aumenta la so programación d’actividaes p’adultos cola puesta en marcha de la primer edición del ciclu Palabra viva. Alcuentros na Biblioteca d’Asturies. Estos alcuentros, que nacen coles mires de dinamizar l’intercambiu cultural, van proponer un percorríu polos distintos xéneros de la lliteratura creada por autores asturianos, tanto en castellán como n’asturianu.

La primer sesión de Palabra viva va celebrase’l próximu miércoles, día 29, a partir de les 19:30 hores, nel salón d’actos de la biblioteca y va axuntar a los poetes Pedro Menéndez, Natalia Menéndez y Nacho González. La entrada va ser llibre pa tol públicu interesáu.

Read Full Post »

‘Onde’l caos se texe y se destexe’ y ‘Hai una llinia trazada’ ente los llibros n’asturianu más vendíos nel 2022

La novela ‘Onde’l caos se texe y se destexe’, de Xulio Viejo, y los ensayos ‘Hai una llinia trazada’, de Xune Elipe, y ‘¡Volved las manos al bable!’, d’Inaciu Galán, tán ente los llibros escritos orixinalmente n’asturianu más vendíos nel añu 2022.

La primera ye una novela que conecta una historia personal, centrada nel conceyu de Quirós, cola d’Asturies y del mundu occidental. Esta obra yá mereció’l premiu al meyor llibru n’asturianu del 2021 de la Tertulia Malory de L’Entregu.

Per otru llau, ‘Hai una llinia trazada’ ye un ensayu qu’algamó’l XXVI Premiu Máximo Fuertes Acevedo del Principáu y qu’analiza la historia de la música asturiana, faciendo un repasu pelos periodos, movimientos y intérpretes más importantes, resaltando los datos y fechos que foron cruciales nel devenir de la nuestra música.

Read Full Post »

Cerca de 60 llibreries participen esti vienres nel Día de les Lletres, con descuentos y regalos d’obres conmemoratives

Un total de 57 llibreríes y tiendes de discos d’Asturies collaboren anguaño cola Dirección Xeneral de Política Llingüística na promoción y celebración del Día de les Lletres Asturianes.

Nestos establecimientos, tolos llibros n’asturianu o gallego-asturianu van tener un 10% de descuentu. Amás, van ponese gratuitamente a disposición de les persones que merquen un llibru o un discu dos llibros conmemorativos.

Read Full Post »

La música asturiana enllena’l Teatru de la Llaboral nel homenaxe a Ígor Medio

La escena sonora asturiana enllenó’l Teatru de Llaboral-Ciudá de la Cultura pa homenaxar al músicu y dibuxante de cómic Ígor Medio, nel primer conciertu en gran formatu de la música asturiana depués de la pandemia.

‘El Conciertu d’Ígor Medio’, enmarcáu na 43 Selmana de les Lletres Asturianes, dedicada al músicu y dibuxante que morrió nun accidente de carretera nel 2006, cuntó con un públicu entregáu y l’asistencia de la conseyera de Cultura, Política Llingüística y Turismu, Berta Piñán.

Read Full Post »

Antón García anima a disfrutar d’una Selmana de les Lletres “pensada pa que-y prestara a Ígor”

“Creo que nunca, nes 43 ediciones, tantes persones involucraron pa llograr un homenaxe tan cálidu a una de les nueses figures más cercanes y queríes”, aseguró Antón García, direutor xeneral de Política Llingüística, na inauguración de la Selmana de les Lletres dedicada a Ígor Medio. Ruma Barbero, que representó a los coordinadores, afirmó que “tamos mui ilusionaos col conciertu” de la Llaboral.

El paraninfu del edificiu civil más grande d’Asturies y del Estáu acoyó la inauguración de la gran fiesta de la nuesa lliteratura. Un llugar, al estudiar ellí de mozos, bien conocíu por Medio y Barbero, que confesó que yera onde-yos llevaben “cuando nos sacaben del aula pa contanos una cosa un poco más estensa”, polo que lo venceyaba “a una chapa curiosa” que, bromió, “espero que nun seya’l casu”.

Read Full Post »

La 43 Selmana de les Lletres Asturianes inclúi una esposición y un conciertu homenaxe a Ígor Medio

La 43 Selmana de les Lletres Asturianes, que va celebrase ente’l 3 y el 6 de mayu, va homenaxar al músicu y dibuxante de cómic Ígor Medio, que cumpliría 50 años nesti 2022.

La programación inclúi una esposición centrada na obra gráfica del artista xixonés, la presentación d’un documental y un llibru sobre la so trayectoria, y la celebración d’un gran conciertu-homenaxe. Va ser la primer vez qu’una persona nacida na década de los setenta del sieglu pasáu reciba l’homenaxe de les Lletres Asturianes.

La presentación del llibru conmemorativu ‘Ígor Medio. El carbón y l’arena’ va abrir los actos de la programación. La publicación, editada pola Conseyería de Cultura, Política Llingüística y Turismu pa la ocasión, axunta nueve artículos qu’analicen l’heriedu d’esti creador y inclúi bien de testimonios gráficos de la so vida y obra. Amás, el Muséu Barjola va acoyer dende’l 3 de mayu la esposición ‘Xente llano de Xixón. La obra gráfica d’Ígor Medio’.

Read Full Post »

Yá a la venta ‘Seltegu’, el cómic de Ruma Barbero sobre la xira libanesa de Felpeyu

Yá ta a la venta en llibreríes y en musicasturiana.com l’esperáu cómic ‘Seltegu‘, la obra de Ruma Babero que cunta la xira que Felpeyu dio nel 2005 pel Líbanu. Una historia qu’axunta diariu de viaxe, conflictu d’Oriente Medio y faltosismu asturianu, y que ganó’l XI Premiu Alfonso Iglesias de cómic convocáu pol Gobiernu del Principáu d’Asturies.

A lo llargo de 128 páxines esta novela gráfica impresa a too color cunta la historia de cuando nel añu 2005 la embaxada española de Líbanu contrató al grupu de folk asturianu Felpeyu pa dar un conciertu dientro’l festival «Fête de la musique» que festexaba los 15 años de paz dende la fin de la guerra civil de 1975 a 1990 y, aprovechando’l viaxe, xirar una selmana per dellos festivales y centros culturales del país de los cedros.

Read Full Post »

La Selmana de les Lletres próxima va rindir homenaxe al dibuxante y músicu Ígor Medio

La conseyera de Cultura, Política Llingüística y Turismu, Berta Piñán, anunció esti sábadu en Cangas que la Selmana de les Lletres Asturianes próxima va rindir homenaxe al dibuxante y guionista de cómic, y músicu, Ígor Medio. L’artista xixonés, fináu nun accidente de carretera en 2006, cumpliría los 50 años en 2022.

Piñán realizó l’anunciu na so intervención na apertura de la Selmana de les Lletres de Cangas, na que participó xunto al alcalde del conceyu, José Víctor Rodríguez. La conseyera de Cultura adelantó tamién que’l programa de la edición de la Selmana de les Lletres próxima va xirar alredor de les actividaes artístiques nes que destacó Ígor Medio: el cómic y la música.

Read Full Post »

El circuitu «Autores nel camín 2021» entama con paraes en Nava, Candás, Llangréu, Colunga, Grau y L.lena

La Conseyería de Cultura, Política Llingüística y Turismu, al traviés de la Dirección Xeneral de Política Llingüística, anunció la puesta en marcha del circuitu lliterariu Autores nel camín 2021, un programa protagonizáu polos homes y muyeres escritores de la nómina de ganadores de los premios en llingua asturiana.

El primer actu del circuitu, onde van tar presentes el director xeneral de Política Llingüística, Antón García, y l’alcalde de Corvera, Iván Fernández, va facese esti xueves en Les Vegues, en Corvera, y va consistir nun alcuentru col escritor Gonzalo G. Barreñada, premiu Xuan María Acebal nel 2019 cola obra El llar n’orde, dientro de les actividaes del taller de llectura n’asturianu qu’entama’l Serviciu de Normalización Llingüística del conceyu.

Read Full Post »

Más cultura asturiana na RTPA

Col títulu de ‘Por una RTPA al serviciu de la cultura asturiana’ 118 persones del campu cultural y musical roblen un escritu nel que reclamen “apostar por dignificar la presencia de conteníos culturales y musicales del país (mui especialmente n’asturianu y gallego-asturianu) na programación, con un tratamientu dignu, global y permanente nella”. La fundación nel añu 2005 de Radiotelevisión del Principáu d’Asturies (RTPA) enllenó d’esperances a los y les trabayadores/ dinamizadores/creadores culturales y musicales asturianos/es. Rixida nos primeros años pola Llei 2/2003, nel so preambulu falaba de potenciar las peculiaridades y el afianzamiento de la identidad asturiana, a través de la difusión, conocimiento y desarrollo de los valores históricos y culturales en toda su variedad y riqueza recuerden los firmantes del manifiestu. “La puesta en marcha efectiva del serviciu de televisión (TPA) fixo qu’aquelles esperances primerices s’esvanecieren en viendo’l modelu pel qu’empobinó la so programación; el fracasu social y económicu al que llevó obligó a un cambiu de rumbu radical que se caltuvo nel tiempu, con una visión de lo asturiano mui restrictiva y simplista” señalen. Tamién consideren que “los primeros pasos del serviciu radiofónicu (RPA) paecíen ufiertar bonos augurios, asina la so parrilla enllenóse de programes y espacios en llingua asturiana colos más variaos conteníos y atentos al fechu cultural y musical del país, pero namás foi un espeyismu nel tiempu y darréu foron desapaeciendo dafechu de les so emisiones”.

Read Full Post »