L’Arribada fai públicu’l nome de los nominaos primeros a los Premios Timón nes sos trés estayes

PABLO R. GUARDADO

Yá se conocen los nominaos primeros a los Premios Timón, que na edición d’esti añu estrena la categoría de ‘Cultura Asturiana’. El plazu pa presentar candidatura a los gallardones añales de L’Arribada fina’l 2 de mayu al meudía.

Los aspirantes, hasta’l momentu, pa llevase’l primer Premiu Timón de Cultura Asturiana, “destináu a asociaciones, sociedaes y fundaciones con sé na nuestra comunidá autónoma que tengan como fin la conservación y promoción de la identidá cultural del país”, son la Sociedad Humanitarios de San Martín, la Fundación Belenos, l’Asociación Cultural San Tirso del Eo, la Tertulia Cultural El Garrapiellu, la Fundación Caveda y Nava y l’ Asociación Cultural Ensame Sidreru. L’Asociación Cultural L’Arribada va tener en cuenta como un méritu importante a la hora de fallar el gallardón, la difusión de la llingua asturiana y/o del gallego-asturiano nes actividaes d’estos coleutivos.

Read Full Post »

El númberu 99 de Lletres Asturianes ta yá nes llibreríes del país

L’Academia de la Llingua Asturiana vieno acabante asoleyar un númberu nuevu del so boletín “Lletres Asturianes”. A piques de facer un cientu de númberos l’Academia ufre un númberu nel que puen atopase trabayos como “El Apeo del ‘Concejo de Oviedo’ en el Libro del Prior (I)” trescripcion de Cristina García-Sampedro Clérigo sobre un testu del sieglu XV, “Vocabulariu de Cangas del Narcea, Amestadura”, de Jesús Feito Calzón, “Safo nel Surdimientu” de Ramiro González Delgado, “Una reseña de l’antoloxía de Caveda” de Xosé Lluis García Arias y “El tren de medianueche y otros cuentos de Sabel de Fausta” d’ Esperanza Marino Davila.

El númberu complétase cola reprodución d’un copia de la Fábula de Dido y Eneas d’Antón de Marirreguera, un trabayu de Xosé Lluis García Arias; el rellatu “Les fuercies de la naturaleza” d’Armando Murias Ibias; dellos de los dicursos pronunciaos pola Presidenta de l’Academia nos últimos meses, el discursu d’ingresu na ALLA de Berta Piñán y otres informaciones, como los ganadores de los premios de l’Academia en 2008, los alcuerdos roblaos con otres instituciones pola Academia, delles reseñes de llibros y un llistáu de les obres espublizaes n’asturianu nos últimos meses.

(d’Asturnews, 04-12-2008)

Read Full Post »