Todo a cien : (100 lletres de 100 cantares)

Todo a cien : (100 lletres de 100 cantares)
Tante Blanco
Saltadera
224 páx.

///

Miembru fundador, nos años ochenta del sieglu XX, del míticu grupu d’agro-rock asturianu Los Berrones, Tante Blanco ta mui vinculáu al mundu de la música, onde ye conocíu como guitarrista y compositor. Depués de dexar aquella banda en 2005 empieza l’aventura musical en solitariu, editando col nome Stroza, BerronStones y Tante Blanco y The Parabeles Conexión. Solu o acompañáu, a Tante Blanco tíra-y el llabor de lletrista, dexando na memoria colectiva d’Asturies parte del so repertoriu, frases afortunaes, estribillos o cantares enteros.

Read Full Post »

Laura Marcos, voz emerxente de la nueva lliteratura

PABLO A. MARÍN ESTRADA

Laura Marcos (Mieres, 1982) ye una de les voces emerxentes con más proyección de la nueva lliteratura n’asturianu. Llicenciada en Filoloxía Inglesa y especialista en Filoloxía Asturiana, ye autora del volume de narrativa ‘Cuentos de ser y tar’ (Trabe, 2017) y como poeta ta presente na antoloxía ‘La prueba del once’ (Saltadera, 2015). Tien nel so haber dellos premios lliterarios, l’últimu el Fernán Coronas de poesía 2019 por ‘Díes otros’, al que pertenecen los poemes del trípticu ‘Fotografía’.

La escritora defín el so trabayu lliterariu como «una forma de dar cuerpu y durabilidá a lo que ye invisible y pasaxero: una idea, un sentir. Con ello conviértese tamién nuna idea pública, que se pue compartir y debatir». En cuantes a los xéneros que cultiva entiende que: «El material inicial ye’l mesmu: una vivencia propia o ayena. Sicasí, vienen a ser opuestos. La poesía sería como la escultura, trataríase de depurar la espresión pa que rescample la idea nel interior; sicasí, la narrativa habría de furrular como l’arquitectura: poner una cadarma y dir revistiéndola pa que la idea apaeza nel conxuntu».

Presenta l’espaciu ‘La cla invisible’ na plataforma audiovisual PlayPresta.

(d’El Comercio, 14-09-2019)

Read Full Post »

La presencia del asturianu na FIDMA amplíase con más empreses y un espaciu mayor pa eventos

Iniciativa pol Asturianu cumple col oxetivu marcáu al final de la Feria Internacional de Muestres d’Asturies (FIDMA) del añu pasáu y va disponer d’un puestu más grande. D’esta forma van incorporase más empreses qu’empleguen l’idioma, hasta doblar la cifra del 2018, y va haber un espaciu mayor pa charres y presentaciones.

El pabellón 3 d’esti certame pol que pasaron 717.869 persones na edición pasada va repetir como sede del puestu que sirve d’escaparate pal llabor d’Iniciativa pol Asturianu y de les empreses a les que-yos cede espaciu. “Ye un llugar necesariu pa que se vea con total normalidá l’emplegu del asturianu por parte d’estes firmes, y un revulsivu pa les ventes de los sos productos. Pela FIDMA pasa toda Asturies y muncha xente de fuera y ye una bona oportunidá pa dase a conocer”, esplica Iván Llera, presidente escoyíu recién d’esta asociación.

Read Full Post »

Gonzalo G. Barreñada llega a les llibreríes col so segundu poemariu

Yá ta nes llibreríes el segundu llibru de poemes de Gonzalo G. Barreñada. Ediciones Saltadera edita na so colección «Patache», esti El pesu de la lluz.

N’El pesu de la lluz, el segundu llibru de poemes de Gonzalo G. Barreñada, hai un movimientu continuu que camina de dientro a fuera. Muévese dende l’espaciu íntimu de la casa (la cocina onde llee y trabaya, la llavadora, la despensa, el tendal…) a llugares abiertos pelos que rolda como un modernu poeta-flâneur: lo urbano y lo rural, el monte y les escombreres, l’estranxeru… Más qu’afán críticu, a esti autor nótase-y l’interés por llevantar acta, permitiéndonos acompañalu mientres observa y anota. Esos apuntes del natural, fechos al ritmu rápidu de la memoria, casi al pasu, conformen un intelixente retratu de lo cotidiano a través del arte poéticu.

Read Full Post »

Paquita Suárez Coalla asoleya la novela xuvenil «Paecen esguiles»

L’autora de Candamu, residente en Nueva York, Paquita Suárez Coalla, ta acabante asoleyar con Saltadera, la novela xuvenil «Paecen esguiles», dientor de la Colección «Cigoreya».

Un branu rural na Asturies del sieglu XXI. Una neña de Nueva York pasa en pueblu les vacaciones cola familia, descubriendo –y descubriéndonos– un mundu a la midida de los sos güeyos: la hermana mayor y la prima pequeña, les amigues, la familia, los vecinos, l’alcalde y los animales son los protagonistes d’esti mosaicu d’escenes cotidianes. De fondu, la pasión pola tierra y el pesu de les decisiones que van dar calce a una vida.

Paquita Suárez Coalla (Grullos, Candamu, 1965) ye escritora, traductora y profesora d’español na B.M.C.C City University de Nueva York. Ente les sos obres destaquen La mio vida ye una novela (2001), Pa nun escaeceme (2003) y El día que nos llevaron al cine (2007). En 2011 ganó’l premiu «María Josefa Canellada» de lliteratura infantil col llibru Camín de lletres: d’Asturies a Nueva York (2012).

(de Formientu, 04-07-2019)

Read Full Post »

Henrique Facuriella descúbrenos la so obra poética n’«El centinela»

Ediciones Saltadera asoleyera la so obra poética conocida hasta’l momentu na antoloxía «La prueba del once», en 2015. Agora, cuatro años más tarde, Facuriella asoleya «El centinela», que ye «la crónica d’un viaxe vital onde les estaciones márquenles non los sitios, sinon les persones, los alcuentros físicos y les distancies emocionales con esos otros que representen el suañu y la promesa».

El xueves 11 de xunetu, a les 7 la tarde, va presentase’l volume na Llibrería Trabe, na cai Fernando Alonso d’Uviéu.

Read Full Post »

Saltadera saluda al branu con cuatro novedaes editoriales

PABLO R. GUARDADO

Gonzalo G. Barreñada, Francisco Priegue y Paquita Suárez Coalla tán acabantes d’asoleyar títulos con Saltadera, qu’edita tamién la novela ‘Invisible’ d’Aique Fernandi, ganadora del XI Premiu María Xosefa Canellada de lliteratura infantil y xuvenil. Cuatro llectures n’asturianu pa disfrutar xunto cola llegada del bon tiempu.

‘El peso de la lluz’ ye’l llibru que firma Barreñada. Trátase del so segundu poemariu, nel que “hai un movimientu continuu que camina de dientro a fuera. Muévese dende l’espaciu íntimu de la casa (la cocina onde llee y trabaya, la llavadora, la despensa, el tendal…) a llugares abiertos pelos que rolda como un modernu poeta-flâneur: lo urbano y lo rural, el monte y les escombreres, l’estranxeru…”, apunten dende Saltadera.

Read Full Post »