Asturies vuelve tener una llibrería especializada en llibru n’asturianu gracies a Trabe

Tres munchos años nos qu’Asturies nun tuvo llibrería especializada en llibru n’asturianu nin llibros d’Asturies, col pieslle de les hestóriques Alborá Llibros en Xixón, Paraxuga n’Uviéu, y otres esperiencies con menos percorríu pero tamién destacables como la Llibrería Seronda n’Avilés, Llibrería Ítaca en Xixón, o la propia d’Ediciones Trabe nel barriu de Pumarín, n’Uviéu, la editorial, dirixida agora por Esther Prieto y Samuel Castro, pon otra vuelta llibrería, esta vegada na cai Fernando Alonso, 17 – baxu drecha d’Uviéu.

Dende la editorial espliquen como «depués d’años de crisis y resistencia, Ediciones Trabe reabre la so llibrería, especializada en lliteratura asturiana, d’Asturies y sobre Asturies». Una noticia que dicen que-yos presta enforma dar «como una allegría y una nota d’optimismu: ye posible vivir y trabayar n’Asturies y n’asturianu, ensin aspavientos, pasín a pasu, col llabor diariu y con esperanza, con enfotu».

Van inaugurar esti nuevu espaciu’l vienres 17 de mayu a les 20:00 hores.

(de Formientu, 15-05-2019)

Read Full Post »

‘Incorrectos’ y ‘Había ua vez’, los llibros más vendíos na 39 Selmana de les Lletres

La novela n’asturianu ‘Incorrectos’, del candasín David Artime, y ‘Había ua vez… 101 contos del conceyo del Franco’, de Martín de Villar y que recueye cuentos y lleendes en gallego-asturianu, son los dos llibros que más vendieron esta Selmana de les Lletres.

Asina lo indicaron desde les dos principales editoriales de llibros n’asturianu, Trabe y Saltadera. Nesi sentíu, el fenómenu editorial d’esta Selmana de les Lletres ye la novela ‘Incorrectos’, del periodista candasín David Artime, editáu por Saltadera y que s’escosó nos principales puntos de venta.

Read Full Post »

El programa ‘Comando Actualidad’ de TVE pon la so mirada na situación del asturianu

El miércoles próximu’l programa de reportaxes ‘Comando Actualidad’, que s’emite pela nueche en La 1 de TVE, va centrase nes llingües minoritaries del Estáu más allá de les oficiales más nomaes. Un equipu d’esti espaciu tuvo esta selmana n’Asturies pa conocer la situación del idioma.

El periodista catalán Ricard Sabaté contó pa ello con dos guíes de lluxu como Xune Elipe y Xosé María García Sánchez ‘Llábana’ nes dos xornaes de grabación que tuvieron llugar n’Asturies d’un programa que tamién va xirar sobre l’estremeñu, l’aragonés, l’aranés y la fala de Xálima. La grabación principió’l llunes de la mano d’Elipe, qu’acudía a la clase d’asturianu que pon la Xunta pola Defensa de la Llingua Asturiana pa dar una charra sobre música n’asturianu. Ehí, Sabaté pudo falar col profesor Héctor Xil y colos alumnos pa conocer les sos inquietúes, pa depués caleyar per Gascona de camín a Ediciones Trabe y pescanciase del usu del asturianu con normalidá n’establecimientos hosteleros y otros negocios.

Read Full Post »

Pasiando per Uviéu

Esther Prieto y Samuel Castro
Pasiando, 2
ISBN: 978-84-8053-758-2
21 x 29,7 cm || 52 páxs. || PVP: 10 €

Perguapa guía de Uviéu pa la xente más menudo. Con ilustraciones a tou color y escrita en 3 llingües (asturianu, castellanu y inglés) avéranos a los rincones más interesantes de la capital del Principáu. Inclúi direcciones, teléfonos, coordenaes GPS y códigos QR pa la xente que quede con ganas de saber un pocoñín más. Tapa dura.

(d’Ediciones Trabe, 11-07-2014)

Read Full Post »

L’Anguleru ayuda a deprender inglés al traviés de la llingua asturiana

Él nun va poder tar presente, pola so estancia necesaria nel mar de los Sargazos al curiáu de les angules y anguiles, pero sí los sos collacios n’Asturies. Les histories de L’Anguleru van ayudar a deprender inglés al traviés del asturianu.

La cita ta prevista pal vienres, al meudía, na Llibrería del Centru Niemeyer y nella van participar Víctor Raúl Pintado Rey ‘Vitu’, autor del llibru ‘L’Anguleru. Suaños de Navidá’ y coautor de les ilustraciones; Bradley Samore, profesor d’inglés; Tamara Saiz, direutora del Colexu Públicu de Panes; Fernando González, de l’Asociación Cultural Garabuxada; y Samuel Castro, copropietariu d’Ediciones Trabe. Estos collacios de L’Anguleru, amás de presentar la obra con histories navidiegues del máxicu personaxe, van entamar delles actividaes cola fin de que los neños y neñes presentes puedan aprender inglés y perfeicionar el castellanu al traviés de la so llingua materna, l’asturianu. “Esta propuesta didáutica va incorporar de forma natural trés de les llingües que más-y presten a L’Anguleru: l’asturianu, el castellanu y l’inglés, convirtiendo l’actividá nuna novedosa aición educativa de caráuter trillingüe”, espliquen los sos organizadores.

Read Full Post »

Antón García: «La crítica es el género en el que más inseguro me siento»

M. S. M.

Antón García, escritor y colaborador habitual de La Nueva España, se apuntó hace algunos años a la crítica cuando comenzó con las colaboraciones en el suplemento «Cultura» de este periódico. Habitual de la poesía, el ensayo y la novela, García confesó ayer que, como lector, tiene opinión, pero como crítico está más cerca de Dámaso Alonso, porque sólo tiene juicio como lector. «Es el género en el que más inseguro me siento», subrayó ayer durante la presentación de «Na cuerda floxa», un volumen que recoge sus colaboraciones en revistas y periódicos, la mayor parte de ellas en La Nueva España.

Como había hecho con anterioridad el también crítico y escritor José Ángel Gayol -encargado de presentar el libro junto a Samuel Castro, de Ediciones Trabe-, Antón García rompió una lanza en favor de la crítica en asturiano, una ausencia que Gayol también lamentó y a la que buscó explicación refiriéndose a la falta de atención en los medios escritos a la literatura en asturiano, con excepción, dijo, de las reseñas de Antón García en La Nueva España.

Read Full Post »

Venti negocios súmense a la campaña ‘La empresa asturiana muévese!’ d’Iniciativa pol Asturianu

PABLO R. GUARDADO

El coleutivu Iniciativa pol Asturianu presentó esti vienres na sede de FADE n’Uviéu la campaña ‘La empresa asturiana muévese!’. Venti negocios de diferente calter participen d’aniciu nesti proyeutu que pretende dotar al idioma d’un status.

Un actu introducíu por Inaciu Galán, presidente del coleutivu cívicu, y conducíu pol direutivu Denis Soria nun sitiu más que simbólicu, como ye la sede central de la Federación Asturiana de Empresarios (FADE), sirvió pa dar a conocer a la opinión pública los detalles d’una campaña na qu’Iniciativa pol Asturianu ta poniendo munchu enfotu. Ésta divídese en dos estayes: la primera, dedicada al usu normal del idioma dientro del furrulamientu de la firma, y, la segunda, al etiquetaxe en llingua asturiana. Y les dos, col oxetivu común de “dotar a la llingua asturiana d’un status, amás d’un usu útil y activu na sociedá asturiana, capaz de xenerar un beneficiu económicu y social al traviés de la firma de convenios con empreses y negocios que busquen introducir l’asturianu con unos criterios básicos d’usu”.

Read Full Post »

Antón García y Esther Prieto recordaron en Blimea los 21 años de trayeutoria d’Ediciones Trabe

El fundador d’Ediciones Trabe, Antón García, y la codireutora de la editorial anguaño, Esther Prieto, protagonizaron esti miércoles un actu na Casona del Bravial. Nél repasaron la trayeutoria de la empresa uviedina nos sos 21 años de vida.

El que fora direutor de Trabe hasta 2007 recordó na so intervención el primer llibru qu’espublizó, ‘Ventiún poemes’ de Pepín de Pría, y fixo referencia a otros títulos importante na historia de la editorial, como la torna al asturianu de ‘La odisea’, d’Homero, fecha por Xosé Gago, o’l diccionariu d’asturianu de Xuan Xosé Sánchez Vicente. Pela so parte, Prieto, direutora de la empresa xunto con Samuel Castro dende ochobre, centróse más nos llibros editaos nos años últimos, como la traducción al asturianu de ‘Harry Potter y la piedra filosofal’, ente otros. Amás, tanto García como Prieto recordaron anéudotes d’estos años y punxeron de manifiestu les dificultaes que tien el mercáu editorial anguaño.

Read Full Post »

Samuel Castro (Trabe): “Nestos tiempos de crisis el llibru ye un artículu de lluxu”

INACIU GALÁN

Coincidiendo cola celebración del Día del Llibru, Asturnews fala con Samuel Castro y Esther Prieto, propietarios de la editorial Trabe dende va dellos meses. Esti firma editorial fundóla en 1992 l’escritor Antón García. Años dempués tuvo un tiempu en manes d’Inaciu Iglesias, hasta que la so decisión de pesllala llevó a los trabayadores a asumir la so xestión. Una apuesta complicada en tiempos de crisis pal llibru y pa la cultura. Falamos con Samuel Castro sobre’l futuru de la editorial y la situación del sector.

Acaben de facese cargu de la editorial Trabe dempués de que’l dueñu anterior nun quixere siguir col negociu, ¿un apueste arriesgáu?
Nestos tiempos que cuerren cualquier cosa que faigas ye arriesgada, pero nosotros pensamos que yera la meyor solución. Per un llau yera triste que dempués de venti años Trabe morriera y per otru la situación llaboral d’esti país nun mos dexaba munches opciones.

Read Full Post »

La XDLA reivindica la industria cultural «énte l’asfisia al sector que-y dio normalidá al idioma»

DAMIÁN BARREIRO

Carlos Pulgar, portavoz de la Xunta pola Defensa de la Llingua Asturiana (XDLA), afirmó que la pérdiga y afogamientu de dalgunes de les más importantes actividaes mediátiques y de los espacios d’intercambiu y distribución de les producciones culturales asturianes «ta llevando a un retrocesu de la visibilidá del idioma y de les sos posibilidaes creatives». Asina, dixo que «l’asfisia progresiva de los sectores que s’encargaron, a lo llargo d’años, de dar cierta normalidá al idioma trai badagüeyos bien prietos pal futuru». Con too, Pulgar faló de la vitalidá de la creación n’asturianu, «que sigue faciendo’l llabor d’intentar llegar y calistrar na sociedá asturiana». Punxo como exemplo programes, llibros y discos que, teniendo una promoción escasa, «son a abrir camín y llegar a la xente». Amás, dixo que dende la Xunta van intentar facer de ponte ente la xente y les manifestaciones culturales del asturianu.

Pulgar encargóse de lleer el discursu anual de la organización nos XVIII Premios Andrés Solar, que s’entregaron esti 16 d’avientu nel Antiguu Institutu de Xixón. Nesta ocasión, el xuráu decidió otorgar el pegollu -el premiu positivu- de manera conxunta a la formación musical Dixebra y a Ediciones Trabe al cumplir 25 y 20 años, respectivamente, «como proyectos fundamentales pa entender el desarrollu cultural, social y económicu de la llingua asturiana nes últimes décades y demostrar que l’asturianu ye una ferramienta útil y necesaria nel rellatu de la contemporaneidá d’Asturies».

Read Full Post »