Asoléyase’l númberu 16 de la Revista de Filoloxía Asturiana

PABLO R. GUARDADO

El Seminariu de Filoloxía Asturiana ta acabante d’asoleyar un númberu nuevu de la Revista de Filoloxía Asturiana, el 16, correspondiente al 2016. Editáu por Trabe, tamién se pue consultar al traviés de la plataforma Reunido de la Universidá d’Uviéu.

Esta espublización añal recueye artículos d’investigación nuevos, notes, cróniques y otros conteníos nes so páxines. Na primer estaya, atopamos cinco estudios, sobre la ‘Caracterización funcional de la interxección: a propósitu de delles interxecciones del asturianu’, d’Alfredo Álvarez Menéndez; ‘El neutro de materia en asturiano: Un acercamiento sintáctico al fenómeno en cuanto a la especificidad, genericidad y la posición del adjetivo’, de Matthew J. Burner; ‘El paisaxe solidariu: léxicu y toponimia comuñera’, de Xulio Concepción; ‘{Tener/llevar} + participio en el castellano de los Siglos de Oro y algunas notas interlingüísticas’, de Patricia Fernández Martín; y ‘Diálogos políticos de los años trenta’, de Rafael Rodríguez Valdés.

Read Full Post »

D’Andrés: “Nel asturianu escritu hai una respetable actividá neolóxica, propia d’una llingua vidable”

PABLO R. GUARDADO

L’equipu del proyectu AsturNeo, dirixíu por Ramón d’Andrés Díaz (Madrid, 1959), investigó per trés años la xeneración de neoloxismos na nuesa llingua. L’informe, de nome ‘Palabres nueves n’asturianu’, amuesa la vitalidá del idioma.

¿Cuándo echó andar el Proyectu Observatoriu Asturianu de Neoloxía y Terminoloxía (AsturNeo)?
Formalmente entamó nel añu 2010, al firmase’l primer conveniu ente la Universidá d’Uviéu (Seminariu de Filoloxía Asturiana), la Universidá Pompeu Fabra de Barcelona (Institutu Universitariu de Llingüística Aplicada col so Observatoriu de Neoloxía) y el Principáu d’Asturies (Dirección Xeneral de Política Llingüística). Depués el conveniu foi renovándose hasta’l 2012. Antes d’esto, el Seminariu de Filoloxía Asturiana yá participara nel 2008 nel I Congresu Internacional de Neoloxía (CINEO) en Barcelona.

¿Quién conformó l’equipu?
L’equipu plenu tuvo formáu por Taresa Fernández Lorences, Fernando Álvarez-Balbuena, les llicenciaes Vanesa Díaz Fanjul y Sara Gutiérrez Rodríguez, y yo mesmu como director. El pesu mayor de los trabayos asumiémoslu les trés últimes últimes persones.

Read Full Post »

Palabres nueves n’asturianu

Ramón d’Andrés Díaz, Vanesa Díaz Fanjul y Sara Gutiérrez Rodríguez
ISBN: 978-84-8053-717-9
17 x 24 cm || 348 páxs. || PVP: 15 €

Toles llingües, nun momentu o n’otru, creen palabres nueves pa denomar situaciones tamién nueves. L’asturianu nun diba dexar de facelo. Esti llibru recueye los “neoloxismos” o palabres nueves apaecíes en tres diarios dixitales d’Asturies (Les Noticies, Europa Press y Asturies.com) ente los años 2010, 2011 y 2012. Otra manera, esta obra ye’l resultáu impresu del Proyectu Observatoriu Asturianu de Neoloxía y Terminoloxía (AsturNeo), que vien desendolcándose dende’l 2009 al traviés d’un conveniu robláu pola Universidá Pompeu Fabra de Barcelona, la Universidá d’Uviéu y el Gobiernu del Principáu d’Asturies al traviés de la Dirección Xeneral de política Llingüística.

(d’Ediciones Trabe, 20-12-2013)

Read Full Post »

Asturies va tener representación en São Paulo nun congresu sobre neoloxismos en llingües romániques

PABLO R. GUARDADO

Ramón d’Andrés, Sara Gutiérrez Rodríguez y Vanesa Díaz Fanjul, del grupu d’investigación Seminariu de Filoloxía de la Universidá, van participar nun congresu en Brasil la selmana qu’entra. Ésti ta dedicáu a los neoloxismos.

El II Congresso Internacional de Neología das Línguas Românicas (Cineo 2011) va celebrase na Universidade de São Paulo ente’l 5 y 8 d’avientu. Dirixíu a investigadores, grupos d’investigación, organismos públicos y privados, y xente interesao na creación lexical y nel desarrollu del léxicu en llingües romániques, ye una continuidá del primeru, celebráu en Barcelona nel añu 2008. Asina, nél van reunise espertos de tol mundo en neoloxía, esto ye, na creación de pallabres nueves.

Read Full Post »