Feeds:
Antradas
Comentairos

Posts Tagged ‘Selmana de les Lletres Asturianes’

La conseyera de Cultura, Política Llingüística y Turismu, Berta Piñán, anunció esti sábadu en Cangas que la Selmana de les Lletres Asturianes próxima va rindir homenaxe al dibuxante y guionista de cómic, y músicu, Ígor Medio. L’artista xixonés, fináu nun accidente de carretera en 2006, cumpliría los 50 años en 2022.

Piñán realizó l’anunciu na so intervención na apertura de la Selmana de les Lletres de Cangas, na que participó xunto al alcalde del conceyu, José Víctor Rodríguez. La conseyera de Cultura adelantó tamién que’l programa de la edición de la Selmana de les Lletres próxima va xirar alredor de les actividaes artístiques nes que destacó Ígor Medio: el cómic y la música.

(more…)

Read Full Post »

La 42 Selmana de les Lletres Asturianes zarróse un añu más cola celebración de la sesta edición del Entaína a escribir, el concursu de microrrellatos improvisaos n’asturianu pa xente mozo convocáu pola Dirección Xeneral de Política Llingüística y l’Institutu Asturianu de la Mocedá.

Tres venti minutos pa la escritura, lleéronse los testos de los ocho participantes y el xuráu aconceyó pa tomar una decisión. El ganador resultó Inaciu Galán, pol testu La llibretina., inspiráu na figura d’Esperanza, poeta xixonesa conocida por acompañase de palombes peles cais de Xixón.

(more…)

Read Full Post »

La conseyera de Cultura, Política Llingüística y Turismu, Berta Piñán, llamó esti llunes a “reivindicar” la lliteratura n’asturiana “porque ye una reivindicación hacia la igualdá”.

Piñán pronuncióse asina en declaraciones a los medios na inauguración de la 42 Selmana de les Lletres Asturianes, nun actu celebráu na Casa de Cultura Teodoro Cuesta de Mieres y nel que tamién participaron l’alcalde de Mieres, Anibal Vázquez, y el coordinador d’esta edición de la Selmana, l’escritor y profesor Xandru Fernández. Al actu tamién asistió’l director xeneral de Política Llingüística, Antón García.

(more…)

Read Full Post »

Con motivu de la Selmana de les Lletres Asturies llega a les llibreríes «Esperté ensin patria pa dormir ensin pruyimientos de conciencia», llibru qu’antologa la obra de Nel Amaro con selección, edición y prólogu de Xandru Fernández y edición de Trabe y la Conseyería de Cultura, Política Llingüística y Turismu.

Nel Amaro (Quentuserrón, 1946-Uviéu, 2011) foi, pal Surdimientu y pa la cultura asturiana, un renovador del llinguaxe y de les artes poétiques, teatrales y narratives, una pluma comprometida socialmente y anovadora na estética y no llingüístico. Más p’allá de la so vida personal, na que supo dende bien nenu lo que yera la derrota y la persecución familiar, que visitó la cárcel delles veces y foi torturáu, creó, dirixió y representó teatru dende los años setenta, escribió noveles y cuentos d’áxil llingua y fondu sentir, poesía a la manera de Blas de Otero hasta derivar na esperimental y visual y foi ún de los primeros performers d’España algamando sonadía nacional y internacional.Personaxe en sigo mesmu y autor bien característicu amás d’axitador cultural y entamador de revistes lliteraries y fancinos varios dende’l Turón nel que pasó a residir a lo último de los años ochenta, tien una montonera d’obres publicaes –munches yá de non fácil alcuentru–, unes en castellanu y otres n’asturianu: obres de teatru (Antígona, por exemplu, 1991; Les manes en caxón, 2003), dellos poemarios (Y tu, Marta B., qu’entoncies nun yeres, tampocu, l’Anna Karina de les películes de Jean-Luc Godard, 1990; Diariu de Polizón, 1990; Poemes de San Francisco, 1993; Pruebes d’autor, 1994; Cementeriu cívicu, 1999; y un inéditu, Katowice), noveles (¡Adiós, Dvorak!, 1990; Novela ensin títulu, 1991; L’últimu del pelotón, 1994; ¡¡¡Falanxista!!!, 1995; y Entós, cuando ñevaba, 2002) y dos llibros de cuentos (Prietu jazz Na borrina, 1993). Nesta antoloxía va atopar quien a ella s’allegue sesenta poemes pertenecientes a distintos poemarios, cuatro pieces dramátiques y seis narraciones.

(de Formientu, 30-04-2021)

Read Full Post »

La Conseyería de Cultura, Política Llingüística y Turismu va dedicar la próxima Selmana de les Lletres Asturianes al escritor Nel Amaro. L’homenaxe coincide col décimu aniversariu de la muerte del artista y colos 75 años de la so nacencia.

Cultura trabaya amás na programación d’un ‘Añu Nel Amaro’, nel que se-y pondría atención a la so obra y se promoveríen representaciones de los sos testos teatrales, igual que publicaciones sobre la so trayectoria personal y lliteraria y sobre’l so arte o exposiciones.

(more…)

Read Full Post »

Esti miércoles aconceyó nel llar de la FSA-PSOE’l xuráu del concursu de microrrellatos en Twitter que convoca’l partíu dende va trés años. El xuráu escoyó los 25 meyores microrellatos y decidió dar el primer premiu a María Llatores, el segundu a Fernando Prendes y el terceru a Víctor Suárez. Los trés primeros van recibir un llote de llibros y un diploma y el restu, un detalle y un diploma. María y Fernando presentaron obres n’asturianu y Víctor en gallego-asturianu o eonaviegu.

Trátase del tercer Concursu de Microrrellatos en Twitter “Selmana Lletres FSA” convocáu pola Secretaría d’Educación, Universidá y Normalización Llíngüística de la FSA-PSOE al rodiu de la celebración de la XLI edición de la Selmana de les Lletres Asturianes.

El xuráu tuvo compuestu por Antón García, Director Xeneral de Política Llingüística del Gobiernu d’Asturies, Esther Prieto, escritora y editora n’Ediciones Trabe, Esther García, presidenta de l’Asociación d’Escritores d’Asturies, Inaciu Galán, escritor y periodista y María Luz Pontón, Secretaria d’Educación, Universidá y Normalización Llingüística de la Federación Socialista Asturiana FSA-PSOE, destacó l’ésitu d’una convocatoria a la que se presentaron 72 obres de muncha calidá y que, en pallabres de Mari Luz Pontón “amuesen el compromisu y el sofitu a la llingua asturiana”

Los rellatos presentaos pueden lleese en Twitter buscando cola etiqueta #SelmanaLletresFSA.

(de Formientu, 08-10-2020)

Read Full Post »

Esti 2 d’ochobre ye’l Día del Llibru y el Discu Asturianu y toles producciones culturales n’asturianu van tener un 10% de descuentu. Ente les principales novedaes que los llectores van poder topar nes llibreríes ta la novela ganadores del Premiu Xosefa Xovellanos, ‘Los xardinos de la lluna’, de Francisco Álvarez, y ‘Nunn’, la primer novela de Xandru Martino pa públicu adultu.

La Selmana de les Lletres Asturianes ye l’eventu más importante alredor de la lliteratura n’asturianu y gallego-asturianu que se convoca n’Asturies. La cita, programada pal mes de mayu pasáu, aplazóse pola crisis provocada pola covid-19 y va celebrase la selmana del llunes 28 de setiembre al vienes 2 d’ochobre.

(more…)

Read Full Post »

Na previa d’una Selmana de les Lletres Asturianes centrada en recuperar la figura d’una muyer escritora escaecida nes antoloxíes canóniques de la época, como ye Tuxa, Vicente García Oliva (Xixón, 1944) presentó una obra nueva, dedicada a Xosefa de Xovellanos. Un llibru qu’abre un proyeutu de Pintar-pintar pa dar a conocer biografíes de muyeres que va siguir cola d’Urraca l’Asturiana.

¿Quién yera Xosefa de Xovellanos?
Xosefa de Xovellanos yera la penúltima de nueve hermanos ente los que s’alcontraba’l gran Gaspar Melchor, que-y sacaba un añu. Fue una muyer culta ya intelixente que supo destacar nun mundu de paisanos. Hai que pescanciar que tamos nel Sieglu XVIII onde les muyeres yeren un ceru a la izquierda.

Casóse col Procurador en Cortes por Asturies don Domingo González d’Argandona –d’ehí’l nomatu de “l’Argandona” col que figura nuna cai de Xixón– y vivió dellos años en Madrid. Ellí frecuentó les más importantes tertulies intelectuales de la dómina, como la del Conde Campumanes, lo cuál yera inusual tratándose d’una muyer.

Enviudó y tornó a la so patria, Asturies, onde tamién tertulió con otros ilustraos asturianos, como González de Posada, Antón Balvidares o Xuan González Villar, toos ellos mui arreyaos a la llingua asturiana. D’ehí principió a escribir poesía n’asturianu.

Tuvo un amor que s’esbayó pola oposición familiar, al ser de menor clas social qu’ella y, muertes les sos tres fíes, sos padres y el so gran amigu Balvidares, más sola que la una, decide metese a monxa. Ellí pasa los caberos años de la so vida hasta la so muerte en 1807. Faltába-y un día pa cumplir los 62 años.

(more…)

Read Full Post »

PABLO R. GUARDADO

El responsable de la edición de ‘Postrer adiós. Prosa, poesía, teatru’ al rodiu de la figura de María Teresa Villaverde, Lluis Portal, aseguró qu’esti reconocimientu na XLI Selmana de les Lletres Asturianes “ye un homenaxe a tantes persones qu’escribieron n’asturianu y de les que naide s’alcuerda”. La conseyera Piñán recordó’l silenciamientu de la obra de Tuxa nes antoloxíes del so tiempu por “ser muyer”.

La Casa de los Hevia foi’l llugar escoyíu pa inaugurar la gran fiesta de les nueses lletres. En Villaviciosa, nel conceyu onde nació Tuxa, natural de Tornón: “Ye la segunda vegada que se dedica la Selmana de les Lletres a dalguien d’equí”, recordó l’alcalde Alejandro Vega –en referencia a Xosé Caveda y Nava, reconocíu nel 1989, la primera temática que s’entamó–, que reconoció conocer recién la historia de la homenaxada “porque la prima de la mio muyer llamó a la so fía Tuxa”.

(more…)

Read Full Post »

PABLO R. GUARDADO

El llunes 28 va principiar una reducida Selmana de les Lletres Asturianes por cuenta de la crisis sanitaria pola pandemia de COVID-19. Ente los actos previstos rescampla el ‘Conciertu de les Lletres Asturianes’ que va poner nel Auditoriu d’Uviéu la Orquesta Sinfónica del Principáu d’Asturies (OSPA) con cuatro pieces.

Dedicada a la maliaya María Teresa Villaverde ‘Tuxa’ (1882-1934), escritora del Rexonalismu de la primer metá del sieglu XX que trabayó la poesía y la narrativa y firmó obres de teatru, nesa primer xornada de la XLI Selmana de les Lletres Asturianes va presentase pela mañana el llibru conmemorativu ‘Postrer adiós. Prosa, poesía, teatru’, edición a cargu de Lluis Portal. Va ser a les 12 hores en Villaviciosa, na Casa de los Hevia, y nel mesmu va proyeutase tamién el documental ‘Tuxa, tradición y sentimientu’.

(more…)

Read Full Post »

Older Posts »