Feeds:
Antradas
Comentairos

Posts Tagged ‘Sergio G. Sánchez’

Van proyeutase trés películes y una esbilla de curtios a lo llargo de tol mes de mayu.

Allargando les celebraciones de la Selmana de les Lletres, l’uviedín Llar La Llegra entama un ‘Ciclu de cine n’asturianu’ con sesiones tolos martes a partir de les 19.30 hores. La primer película en proyeutase va ser ‘Bernabé’, el primer llargumetraxe rodáu dafechu en llingua asturiana, con soníu 5.1 y con flaires de baldre, al igual que la entrada.

(more…)

Read Full Post »

Inaciu Galán y González (Xixón, 1986) ye Máster en Sociedá de la Información y el Conocimientu na Universitat Oberta de Catalunya (UOC), Diplomáu en Turismu y Especialista en Xestión Cultural pola Universidá d’Uviéu, y anguaño ta rematando los estudios de Periodismu na Universidá a Distancia de Madrid (UDIMA). Comprometíu cola defensa de la llingua asturiana, en 2012 fue reconocíu col Premiu Urogallo del Centru Asturianu de Madrid. Ente los sos munchos proyectos, destaquen, en 2004, l’impulsu dende Xareos! Xestión Cultural, y xunto a Benxa Pérez, la modernización del monólogu asturianu, organizando eventos relacionaos con esti xéneru y publicando en 2008 la primer Antoloxía de monólogu modernu ¡Pa echar unes rises!, con testos propios y d’otros autores, que preparó y prologó pa Ediciones Trabe. En 2011 asoleyó un nuevu volume tituláu Más monólogos… ¡Pa echar unes rises!, con testos de nuevos autores. Como articulista, escritor y traductor tien colaborao n’estremaes publicaciones; algamao diferentes premios en distintos xéneros, y tien feches y espublizaes en delles revistes tornes al asturianu d’obres en gallegu, castellán, catalán, inglés o francés, ente otres llingües. Y precisamente una revista, Formientu, ye ún de los sos trabayos más ambiciosos, col que lleva años dando voz a los escritores más nuevos de la lliteratura asturiana. Recién presentáu un númberu nuevu d’esta publicación, publicaba tamién per primer nel campu de la lliteratura infantil de la mano de la editorial Asturtoons. Un volume que cuenta con actividaes didáctiques y que se titula Nel, el coríu que nun sabía nalar.

1. Proponga un menú lliterariu: entrada, platu principal y postre.
P’abrir boca, unos haikus de Faraguyas, d’Esther García López, como platu principal una novela cualquiera de Dolfo Camilo Díaz y de postre, un llibru pa echar unes rises, Diálogu de la llingua o los gochos llinguateros de Milio Rodríguez Cueto. (more…)

Read Full Post »

DAMIÁN BARREIRO

El Gobiernu d’Asturies decidió eliminar pal 2013 les llinies de subvenciones en concurrencia competitiva p’asociaciones, empreses y p’actividaes cinematográfiques, proyectos que la conseyera de Cultura, Ana González, consideró de poca visibilidá social. El realizador Pablo Quiroga, autor de curtios como Bisarmes o’l documental Seliquín-Xentiquina. Una ferramienta pedagóxica al serviciu de la escuela n’Asturies, afirma que la eliminación de les subvenciones pal cine y pal audiovisual n’asturianu supón una barrera nueva pa que los creadores, «sobremanera los realizadores nuevos», empleen la llingua del país como llingua vehicular nos sos trabayos.

A lo llargo de los sos años d’historia, estes ayudes a les actividaes autiovisuales n’asturianu xeneraron trabayos como Xicu’l toperu -primer curtiometraxe rodáu n’asturianu- o 73 37, un curtiu de Sergio G. Sánchez -guionista d’El orfanato que debutó anguaño nel llargumetraxe- y que ta consideráu como’l meyor de tolos fechos n’asturianu. Les subvenciones agora eliminaes tamién permitieron la realización de Chatarrona, web-serie de Publicaciones Ámbitu qu’algamó nuna selmana más de 10.000 visites. (more…)

Read Full Post »