SIXTO CORTINA
Yá tenía yo escrito un sentimental artículu sobre l’orpín de San Xuan, el nacimientu de lo nuevo y la muerte de lo vieyo, la foguera como partera del tiempu les vacaciones, etcétera, cuando blincó otra vegada l’aristocracia universitaria, vergoñosa y en votu secretu, a defender los privilexos de sangre que-y regalen una vida folgada, intelectual y con clase, ello ye, clasista. L’Asturies esquizofrénica cabalgando nel llombu d’un asturcón, prohibiendo estudiar la llingua del país, al tiempu que la intelectualidá progresista española reclama defensa pal idioma castellanu, que ye como pidir protección pal toreru frente al toru porque, dacuando, tamién lu engancha. Los asturianos nun tenemos remediu, nin los d’una triba nin los de la otra, siempre faciendo’l ridículu pero camentando, al empar, qu’asitiamos nel cumal de la razón y la certeza. Los enguedeyos universitarios siempre son inesplicables pal mortal común, pero, nesti casu, al compangu tradicional axúntense los prexuicios, los privilexos y la política. Depués d’años de llabor paciente y eficaz, la decana y presidenta de l’Academia de la Llingua, Ana Cano, taba a piques de llograr una presencia curiosa del asturiano como ufierta académica, anque fuere una ufierta ‘minor’ y non ‘maior’, pero’l dinosauriu universitariu esconsoñó y, zorramplu, baltó la propuesta.
El profesor Félix de Castro, prubín él, a pocos díes de presentar, defender y ganar la enmienda que destierra l’asturiano de la Universidá, pero tien misericordia col rumano, esa gran llingua de cultura universal, yá va pasando de verdugu a víctima. Y ésta ye la más plasmante de les milenta cares d’esti asuntu: que los victimarios, enropiellaos esclusivamente en motivos tribales, acientíficos y clasistes, preséntense como víctimes a les qu’escuerre una pantasma d’intolerancia que naide nunca tien visto, pero que se supón porque sí. Asina, los que nun quieren que la Universidá d’Asturies estudie l’asturiano, los que nun quieren formar profesores d’asturiano pa enseñar a los asturianos que llibremente, y arreblagando perriba de sebes administratives, asina lo deciden, los que nieguen categoría al padremoñu de los que-yos paguen el sueldu y emponderen hasta l’allorie lo que nada tien que ver con nosotros, ésos marútense d’héroes heréticos nun mundu piquiñín afogáu polos ‘bablistas’. El mundu al revés, la inxusticia fecha llei, la paranoia como exemplu de conducta cuerda.
En cualquier llugar del mundu sanu, los pueblos nun se suiciden, los ciudadanos nun s’odien y los universitarios nun nieguen l’estudiu de nada, y menos d’un padremoñu del llugar tan importante como l’idioma, camiente ún lo que seya sobre l’estatus llegal que tenga que tener. La decana y otres munches persones del que se titula ‘asturianismu cultural’ fadríen bien en decatase de qué poco val contemporizar colos enemigos irreconciliables de ‘lo asturiano’ (cultural, político, folklórico, económico y hasta sentimental) que yá nun tienen cuayu pa escontrase públicamente a la evidencia, qu’abulta que son quien a permitir un asturiano ‘minor’ pero que, al cabu, conspiren y en votación secreta ponen otru ladrillu pa llevantar la muria del nuestru xenocidiu cultural, como los nazis colos innumberables decretos que dictaron nos años trenta del sieglu pasáu. Sí, asina ye, porque por muncho que nos ampare la Declaración Universal de los Drechos Humanos, la Carta Europea de les Llingües Minoritaries, la Constitución española, l’Estatutu d’Autonomía y la Llei d’Usu y Promoción del Asturianu, si nun hai Gobiernu nin Parlamentu que nos ateche, los burócratas que viven, material, intelectual y espiritualmente, de la nuestra desgracia van acabar con nós, porque eso ye acabar cola nuestra cultura.
Félix de Castro y Cía. vieron nel asturiano ‘minor’ un reblaguín pequeñu hacia la oficialidá del idioma y, asina lo confesaron, eso sí que nun lo podíen consentir. Son más llistos dos d’ellos, amás de más ufanos y meyor pagaos, que tol ‘asturianismu cultural’ xunto, que lleva décades poniéndo-y torgues al asturianismu políticu que podría dar derechos a los asturianos nel so propiu país. Esos profesores que dan clase a cinco alumnos porque nun son quien a convencer a más de la utilidá de la so enseñanza, que cobren sueldos qu’enxamás podríen suañar nel mercáu llibre de los sos saberes, que gasten perres de los nuestros impuestos que nunca enxamás sabremos qué utilidá nos van dar, ésos son los que deciden que ye inútil estudiar asturiano y una fatada formar profesores na nuestra llingua. Félix de Castro y Cía. algamarán el so obxetivu de llograr qu’otra xeneración d’apellíos que suenen por conocíos ocupe los mesmos escaños, si nun tornamos lo güeyos a la política. Pero lo que nun tendríen que llograr ye que dalguién camiente que son les víctimes, cuando son los verdugos.
(d’El Comercio, 1-07-2008)
Read Full Post »
Tierra alantre, la mesma fala 