Feeds:
Antradas
Comentairos

Posts Tagged ‘Tierra Astur’

PABLO R. GUARDADO

El coleutivu Iniciativa pol Asturianu presentó esti vienres na sede de FADE n’Uviéu la campaña ‘La empresa asturiana muévese!’. Venti negocios de diferente calter participen d’aniciu nesti proyeutu que pretende dotar al idioma d’un status.

Un actu introducíu por Inaciu Galán, presidente del coleutivu cívicu, y conducíu pol direutivu Denis Soria nun sitiu más que simbólicu, como ye la sede central de la Federación Asturiana de Empresarios (FADE), sirvió pa dar a conocer a la opinión pública los detalles d’una campaña na qu’Iniciativa pol Asturianu ta poniendo munchu enfotu. Ésta divídese en dos estayes: la primera, dedicada al usu normal del idioma dientro del furrulamientu de la firma, y, la segunda, al etiquetaxe en llingua asturiana. Y les dos, col oxetivu común de “dotar a la llingua asturiana d’un status, amás d’un usu útil y activu na sociedá asturiana, capaz de xenerar un beneficiu económicu y social al traviés de la firma de convenios con empreses y negocios que busquen introducir l’asturianu con unos criterios básicos d’usu”. (more…)

Read Full Post »

DAMIÁN BARREIRO

Depués de que la conseyera de Cultura, Ana González, anunciara que’l Gobiernu va eliminar pal 2013 les subvenciones p’asociaciones, empreses y pa la industria audiovisual pol usu del asturianu, al considerar que tienen poca visibilidá social, Carlos Pulgar, portavoz de la Xunta pola Defensa de la Llingua Asturiana, afirma que la desapaición d’estes llinies «va suponer un retrocesu evidente na visivilización de la llingua nel sector comercial y cultural». Otra manera, dende Ediciones Trabe, Esther Prieto afirma que la eliminación de les subvenciones pa empreses «pon en peligru los dos premios lliterarios que convocamos y la revista gratuita Estoyu».

Y ye que partíes como les destinaes a les empreses permitíen qu’Ediciones Trabe convocara premios como’l Montesín de narrativa xuvenil o’l Trabe de Narrativa, amás de la publicación de la revista Estoyu o entamar delles iniciatives de promoción de los sos llibros. «Quitar la llinia de subvención a empreses ye quitar perres pa la promoción del asturianu, de la so cultura y de la so lliteratura, lo que redunda de manera negativa na so visibilidá, arrequexando un pelín más tolo asturiano. Anque los tiempos son malos, la miseria también hai que la saber xestionar y eso ye lo que-y pidimos al nuestru Gobiernu: que xestione con prudencia y equidá», afirma Prieto. (more…)

Read Full Post »

PABLO R. GUARDADO

Esti llunes presentóse en Xixón la sesta edición de Vagamar, festival que va inaugurase’l vienres. Nel actu, el conceyal Carlos Rubiera anunció que L’Arribada va encargase d’organizar una actividá de llingües minoritaries nel Festival Atlánticu.

El conceyal d’Educación, Cultura, Mocedá y Festexos foi’l primeru en tomar la pallabra na presentación de Vagamar 2011, entamada pola Asociación Cultural L’Arribada, intervención na que destacó que’l presupuestu d’esti festival lliterariu que va inaugurase’l vienres de manera oficial –anque pa mañana yá tán programaes actividaes dientro de ‘Rolda’– “nun pasa de los 12.000 euros”, lo que pa Rubiera ye “dalgo relevante pa que los ciudadanos tengan oportunidá de comparar lo que cuesten aquelles actividaes nes que s’implica’l texíu asociativu de los ciudadanos y nes que, polo tanto, hai muncho amor puesto y altruísmu, en rellación a otres actividaes que s’entamen a veces con un aparatu mediáticu grande y con un aparatu presupuestariu ampliu”. D’igual forma, reseñó que’l Conceyu de Xixón da una subvención a L’Arribada de 8.000 euros pa toles actidaes qu’organiza nel 2011, pa depués destacar la intención de la conceyalía qu’encabeza de mantener una collaboración permanente “coles entidaes ciudadanes que tán dispuestes siempre a collaborar de la meyor manera posible con iniciatives nes qu’hai muncho amor y muncho sacrificiu personal puestu”. (more…)

Read Full Post »