Feeds:
Antradas
Comentairos

Posts Tagged ‘Trabe’

PACO ÁLVAREZ

Lleva ventisiete años saboriando la Gran Mazana, pero echa de menos el frutu coloráu del Festival de les Freses de Candamu, que nun visita dende qu’emigró a Nueva York. Paquita Suárez Coalla (Grullos, 1965), escritora n’asturianu y en castellanu, traductora y profesora universitaria d’español nel Borough of Manhattan Community College, ta a puntu d’acabar les sos vacaciones de branu n’Asturies, pero enantes de regresar a los Estaos Xuníos güei, xueves, a les siete de la tarde, va presentar nel Palaciu Valdés Bazán de San Román de Candamu la segunda edición de La mio vida ye una novela. Testimonios de las mujeres del campo de Asturias (Trabe, 2021), un llibru publicáu va ventiún años nel que da voz a diecisiete muyeres nacíes nes primeres décades del sieglu XX.

El llibru empieza con una dedicatoria a la so güela Lucía, que “foi tan valiente de llegar a los cien años”. ¿La llonxevidá tamién depende del valor col qu’afrontamos la vida?

Sí, yo creo que’l tiempu qu’ún pueda tar vivu depende tamién del deséu de vivir. Nel casu concretu de mio güela, aparte de cuestiones xenétiques, supongo qu’había un deséu, una voluntá de vivir.

(more…)

Read Full Post »

Ediciones Trabe publicó’l ‘Diccionariu de consultes llingüístiques del asturianu’, obra del profesor Ramón d’Andrés que vien a responder de manera cómoda y rápida duldes concretes sobre esti idioma.

Esti trabayu tien l’oxetu de facer del procesu de conocimientu y d’escritura n’asturianu una xera fácil y poco enguedeyosa. El Diccionariu pretende ser una ferramienta pa estudiantes, profesores, periodistes y, en xeneral, pa toa persona enfotada n’ameyorar el conocimientu y dominiu del asturianu a nivel prácticu tanto na fala como per escrito.

(more…)

Read Full Post »

El profesor Xulio Viejo ta acabante asoleyar «Una introducción a la fonoloxía asturiana» con Ediciones Trabe. La obra, de más de quinientes páxines atiende colos distintos niveles d’análisis a los que se da l’estudiu fonolóxicu: dende la caracterización fonética de los soníos del asturianu hasta les propiedaes de la enunciación, pasando per unidaes intermedies (fonemes, sílabes, patrones métricos, etc.), con una perspectiva teórica abierta y en parte novedosa.

La descripción del estándar y les distintes variedaes actuales compleméntase con un estudiu evolutivu que mira a dar cuenta del procesu formativu del espaciu llingüísticu asturianu, atendiendo al so aniciu nel llatín de la romanización y al marcu comparativu qu’ofrez el conxuntu de llingües romániques, revisando delles propuestes avanzaes en trabayos anteriores.

(more…)

Read Full Post »

PACO ÁLVAREZ

Profesor y historiador de la lliteratura asturiana, editor, poeta, narrador, traductor, antólogu, articulista, críticu lliterariu… Menos el de dramaturgu, tolos oficios emparentaos coles lletres asturianes conozlos de primer mano esti cuartanu, llicenciáu en Filoloxía Española pola Universidá d’Uviéu, onde exercía como profesor asociáu de Lliteratura Asturiana hasta que nel branu de 2019 asumió la Dirección Xeneral de Política Llingüística. Antón García Fernández (Tuña, 1960) fundó y dirixó tres editoriales, y ye ún de los autores más nomaos de la segunda xeneración del Surdimientu: ganó los premios de poesía Xuan María Acebal con Ferralla y Teodoro Cuesta con Venti poemes, llogró’l Xosefa Xovellanos de novela en tres ocasiones, coles obres El viaxe, Díes de muncho Crónica de la lluz y la solombra. Nesta entrevista en Nortes fai un repasu del primer añu y mediu al frente d’un departamentu que yá dirixó ente 1988 y 1991, nel Gobiernu de Pedro de Silva.

A la edá de 23 años creó la editorial Tsibros de Frou. De toles sos facetes nes lletres asturianes, la más tempranera foi la d’editor, ¿non?

Sí, cuando tenía diecisiete años di les vacaciones nes oficines d’una empresa de la construcción. Recibí por ello un sueldu pequeñín y gastélu tou en sacar una revista de les que se facíen daquella en fotocopies, un fancín que se llamaba Criterios y que llegó hasta’l númberu ocho. Dende que m’alcuerdo tengo vocación d’editor, de promotor de publicaciones. Participé nos entamos de la tertulia Óliver, onde editamos una revista. Tamién na revista Adréi. Depués tuvi les editoriales Tsibros de Frou, Trabe y Saltadera, y la revista Campo de los Patos. La d’editor ye la vocación más constante a lo llargo de la mio vida.

(more…)

Read Full Post »

Laura Marcos, que consiguió’l  Premiu «Fernán-Coronas» 2019 col poemariu Díes otros, ta acabante poner nes llibreríes el que ye’l so primer poemariu, con Ediciones Trabe.

Ángeles Carbajal, autora del prólogu de Díes otros, fala d’esti poemariu como «poesía con pensamientu». Y esa ye la impresión que queda en nós de la que lleemos dalgún de los diecisiete poemes que conformen esta primer entrega poética de Laura Marcos: versos que van del cerebru a la mano que los escribe pasando de dides per onde habiten los sentimientos. Versos conteníos, concisos, definitorios, d’una engañosa cenciellez que, por embargu, acueyen elementos surrealistes y metáfores eficientes.

Dividíu en tres partes («La lluz robada», «L’agua turbio» y «El son cambiáu»), caúna d’elles incorpora la esperiencia de la pérdida y del desarraigu: el duelu, l’aceptación y l’adaptación. Cada parte va acompañada d’una ilustración de Mónica Jiménez.

(more…)

Read Full Post »

Con motivu de la Selmana de les Lletres Asturies llega a les llibreríes «Esperté ensin patria pa dormir ensin pruyimientos de conciencia», llibru qu’antologa la obra de Nel Amaro con selección, edición y prólogu de Xandru Fernández y edición de Trabe y la Conseyería de Cultura, Política Llingüística y Turismu.

Nel Amaro (Quentuserrón, 1946-Uviéu, 2011) foi, pal Surdimientu y pa la cultura asturiana, un renovador del llinguaxe y de les artes poétiques, teatrales y narratives, una pluma comprometida socialmente y anovadora na estética y no llingüístico. Más p’allá de la so vida personal, na que supo dende bien nenu lo que yera la derrota y la persecución familiar, que visitó la cárcel delles veces y foi torturáu, creó, dirixió y representó teatru dende los años setenta, escribió noveles y cuentos d’áxil llingua y fondu sentir, poesía a la manera de Blas de Otero hasta derivar na esperimental y visual y foi ún de los primeros performers d’España algamando sonadía nacional y internacional.Personaxe en sigo mesmu y autor bien característicu amás d’axitador cultural y entamador de revistes lliteraries y fancinos varios dende’l Turón nel que pasó a residir a lo último de los años ochenta, tien una montonera d’obres publicaes –munches yá de non fácil alcuentru–, unes en castellanu y otres n’asturianu: obres de teatru (Antígona, por exemplu, 1991; Les manes en caxón, 2003), dellos poemarios (Y tu, Marta B., qu’entoncies nun yeres, tampocu, l’Anna Karina de les películes de Jean-Luc Godard, 1990; Diariu de Polizón, 1990; Poemes de San Francisco, 1993; Pruebes d’autor, 1994; Cementeriu cívicu, 1999; y un inéditu, Katowice), noveles (¡Adiós, Dvorak!, 1990; Novela ensin títulu, 1991; L’últimu del pelotón, 1994; ¡¡¡Falanxista!!!, 1995; y Entós, cuando ñevaba, 2002) y dos llibros de cuentos (Prietu jazz Na borrina, 1993). Nesta antoloxía va atopar quien a ella s’allegue sesenta poemes pertenecientes a distintos poemarios, cuatro pieces dramátiques y seis narraciones.

(de Formientu, 30-04-2021)

Read Full Post »

La Conseyería de Cultura, Política Llingüística y Turismu presentó’l programa de la 42 Selmana de les Lletres Asturianes, que se celebra ente’l 3 y 7 de mayu próximos. Baxo’l lema Nel Amaro, la voz comprometida, y cola coordinación de Xandru Fernández, la Selmana rinde homenaxe al escritor y artista mierense coincidiendo colos diez años de la so muerte y los 75 de la so nacencia.

La Dirección Xeneral de Política Llingüística ellaboró una programación alredor a l’actividá creadora tan estensa de Nel Amaro cola mira de reivindicar la figura humana y artística del escritor mierense. Asina, la obra conmemorativa de la 42 Selmana de les Lletres va ser Pruebes d’autor. Les siete vides de Nel Amaro, un llibru integráu por siete artículos sobre Nel Amaro y el contestu cultural, social y políticu de la so obra, qu’incluye amás material gráfico abondo. Esti llibru, que se va presentar nel actu inaugural de la Selmana, va repartise de baldre ente quien compre un llibru o discu n’asturianu’l día 7 de mayu, Día del Llibru Asturianu.

(more…)

Read Full Post »

La reserva protexida de Les Cuenques ye’l rellatu de cómo Eleonnor Windstone ve l’Asturies, en concreto’l Mieres de Camín, del primer añu del nuevu sieglu. Y cuéntanoslo de primer mano, yá que trescribe puntu per puntu’l díariu que la reportera foi escribiendo nel tiempu que pasó nesta tierra. Peles sos páxines cuerren Villa y Campelo, Rodríguez Vigil, Álvarez Areces o l’Asaltacunes, al llau de Gabino de Lorenzo. Lleéndola va salinos una sorrisa, pueser qu’hasta una risotada, pero bien sabemos que no fondo alluga l’amargura d’una tierra en descomposición.

Dende la editorial espliquen como «Si mires Asturies dende fuera, con una mirada bien alloñada de la nuestra idiosincracia, el resultáu ye esta novela: candial y cruel, coñona y dolorosa, esperpéntica y surrealista y al empar fondamente realista. Y ye que bien de veces el desconocimientu ye’l meyor de los conocimientos».

(more…)

Read Full Post »

Diccionario castellanu-asturianu

Xuan Xosé Sánchez Vicente

Trabe

615 páxs.

///

Esti Diccionariu castellanu-asturianu va constituise, de xuru, en pieza fundamental tanto pa la meyora del conocimientu de la llingua asturiana y pa la so escritura, mesmo pa la creativa que pa la alministrativa o escolar.

Esti diccionariu meyora enforma la ferramienta que pon a disposición del públicu, ya que s’enfota en señalar en qué acepciones encaxen les palabres que van a la derecha de la entrada castellana. Y esto, que paez tan simple, nun yera modeda corriente nos diccionarios al usu: hasta agora los diccionarios inversos constaben d’una entrada en castellanu y un númberu mayor o menor de salíes de la mesma násturianu, ensin dar precisión significativa denguna. Esa ye la gran novedá d’esti nuevu Diccionariu castellanu-asturianu de Xuan Xosé Sánchez Vicente, que lleva a les llibreríes Ediciones Trabe.

(de Biblioasturias, 12-04-2021)

Read Full Post »

L’escritor maliayu Lluis Portal Hevia ta acabante poner nel mercáu, «Xurde amante y el Club de los Valientes», una novela xuvenil qu’Ediciones Trabe saca al mercáu na so colección Pesllera.

Na obra, Xurde Amante, el protagonista que nos cuenta la historia, y los collacios Pablo Sierra y Andrés Collado, estudiantes d’un colexu de prestixu qu’esfruten cola lliteratura d’aventures y de xéneru, formen el Club de los Valientes col oxetivu de «desfacer entuertos». Nun van tener qu’esperar muncho pa que-yos salgan desa­­paiciones y otros misterios pa resolver.

(more…)

Read Full Post »

Older Posts »