L’Academia afirma que l’anulación de les ordenances de Mieres dexa en “papel moyao” la Llei d’Usu del Asturianu

El presidente de l’Academia de la Llingua Asturiana, Xosé Antón González Riaño, afirmó esti miércoles que la decisión d’anular la Ordenanza del usu de la llingua asturiana del Conceyu de Mieres dexa en “papel moyao” la Llei d’Usu de 1998. “Ye una prueba clara de qu’hai que tirar hacia la oficialidá”, dixo.

En declaraciones a Europa Press, Riaño posicionóse sobre la decisión del Tribunal Superior de Xusticia d’Asturies (TSXA) d’anular la ordenanza aprobada pol Plenu de Mieres el 22 de marzu de 2018 y que nel so primer artículu establez que “la llingua asturiana ye, col castellanu, la llingua empleada pol Conceyu de Mieres, l’Alministración Local y les corporaciones públiques que d’ella dependen”.

Read Full Post »

Los servicios xurídicos del Conceyu d’Avilés afirmen que nun se puen aprobar unes ordenances d’asturianu

Los servicios xurídicos del Conceyu d’Avilés afirmaron que, al nun recoyer l’Estatutu d’Autonomía la oficialidá del asturianu, el Plenu municipal nun pue aprobar unes ordenances pa regular l’usu y la promoción d’esta llingua nel conceyu.

Asina se recueye nun informe técnicu de los servicios xurídicos municipales al que tuvo accesu Europa Press y que señala que nestos momentos l’Estatutu d’Autonomía nun dispón que’l “bable” tenga’l calter de llingua oficial n’Asturies xunto col castellanu.

Read Full Post »

El TSXA anula la ordenanza d’usu del asturianu de Noreña

La Sala de lo Contencioso Alministrativu del Tribunal Superior de Xusticia d’Asturies (TSXA), decidió anular por nun ser «conforme a derechu» la Ordenanza d’Usu del Asturianu de Noreña qu’aprobara’l Conceyu n’ochobre del 2016. La sentencia da la razón al PP, que pidió la so nulidá al entender que la ordenanza suponía una declaración d’oficialidá.

Na sentencia, unviada a los medios pol mesmu PP y contra la que se pue interponer recursu de casación, el recurrente -el conceyal popular en Noreña Luis Miguel Suárez González- alegó que ye un fechu incuestionable que’l «bable» nun ye una llingua cooficial nel Principáu d’Asturies, amás de la incompetencia del Conceyu demandáu p’aprobar dicha Ordenanza.

Read Full Post »

La visibilidá del conflictu llingüísticu n’Asturies

INACIU GALÁN

Nos años ochenta y primeros noventa, aquellos que queríen atacar al asturianu negaben la so esistencia. El trabayu contináu del que ye’l movimientu social más importante del periodu democráticu n’Asturies, el movimientu de reivindicación llingüística, consiguió que güei, nin siquiera los máximos enemigos de que la llingua asturiana tenga futuru, puedan negar la so esistencia ensin cayer nel ridículu. La sociedá asumió con normalidá la so propia realidá llingüística de forma mayoritaria. La ciencia ganó sobre los prexuicios llingüísticos y l’argumentariu falsu creáu polos enemigos de la diversidá llingüística.

Una vegada asumida esta esistencia y nun pudiendo negala, l’argumentu camudó y lo que se niega agora ye la esistencia d’un conflictu llingüísticu, la esistencia d’una falta de drechos pa una parte de la ciudadanía. Esti mesmu mes y como ye vezu cada comienzu del cursu, son dellos los neños y neñes a los que, contra lo que diz la llei, se-yos niega la posibilidá de recibir clases d’asturianu nes escueles ya institutos d’Asturies.

Read Full Post »

Iniciativa pol Asturianu collabora con una familia pa reclamar al Gobiernu que’l so fíu tenga profesor d’asturianu

Gemma Pulgar y Pedro Vigil son los padres d’Illán, un neñu del Colexu Auseva d’Uviéu nel que lleva tola educación primaria estudiando llingua asturiana. Agora, cuando ta en sestu cursu de primaria, la Conseyería d’Educación incumple la llexislación, y el so neñu lleva dende l’entamu del cursu ensin profesor d’asturianu.

Iniciativa pol Asturianu apoya a esta familia y a les munches otres qu’a lo llargo d’Asturies viven situaciones asemeyaes pola negación de drechos reconocíos pola llei y por sentencia del Tribunal Superior de Xusticia d’Asturies, que declaró illegales los cupos d’alumnos pa l’asignatura d’asturianu. El propiu centru educativu reclamó a la Conseyería que-y unviaran un profesor d’asturianu, pero Illán sigue ensin recibir clases de la so propia llingua.

Read Full Post »

La XDLA pide al Gobiernu estatal y asturianu que cumpla les recomendaciones del Conseyu d’Europa

Depués de que’l Comité d’Espertos del Conseyu d’Europa aprobara les recomendaciones al Estáu español del tercer informe sobre’l cumplimientu de la Carta Europea de les Llingües Minoritaries, onde se fala del asturianu y se recuerda qu’a pesar de les recomendaciones de los informes anteriores tovía nun se declaró como llingua oficial, la Xunta pola Defensa de la Llingua Asturiana (XDLA) pide al Gobiernu d’Asturies y a la Xunta Xeneral que tomen nota y que faigan dalgún pronunciamientu sobre les recomendaciones que-yos faen les instituciones europees. Asina, la organización entiende que nestos cuatro años que pasaron desque se publicara’l segundu informe nun se dieron pasos alantre, porque güei, como nel 2008, el Conseyu d’Europa recomienda avanzar nel reconocimientu llegal del nuestru idioma. La XDLA compara l’actitú del Conseyu d’Europa hacia la política llingüística del País Vascu cola d’Asturies: mentes qu’al Executivu socialista de Patxi López lu emponderen dende Estrasburgu y lu ponen como modelu a siguir nel ámbitu español, el Gobiernu d’Asturies, tamién en manes del PSOE, recibe un tirón d’oreyes por nun dar pasos alantre col reconocimientu de los derechos llingüísticos de los falantes. Mesmamente, al lleer l’infome pue vese cómo en política llingüística tamos dando pasos atrás cola sida de la crisis económica.

Read Full Post »

La Xunta pola Defensa de la Llingua pide que s’informe a los centros de la supresión de la ratio pa clases d’asturianu

La Xunta pola Defensa de la Llingua Asturiana exixó esti llunes al Gobierno asturianu, per mediu d’una nota prensa, que s’informe a los centros d’enseñanza de la supresión de la ratio mínima pa formar clases d’asturianu. Asina afirma que tán empezando a llegar quexes de maniobres de determinaos centros que siguen inorando les disposiciones llegales qu’anulen la ratio mínima d’estudiantes pa poner clase d’asturianu. Por eso, la XDLA quier que se remarque esti aspectu na Circular de principiu del cursu y que se monitorice tol procesu de matriculación.

Según la Xunta, la Conseyería d’Educación, Cultura y Deporte lleva unes selmanes anunciando en BOPA modificaciones en delles resoluciones p’adaptales al cumplimientu de la sentencia del 17 de setiembre de 2010 del Tribunal Superior de Xusticia d’Asturies, ratificada en sentencia del Tribunal Supremu n’abril de 2012.

Read Full Post »

Suatea reclama que l’asturianu sía llingua vehicular na educación

DAMIÁN BARREIRO

Por cuenta de la celebración del Día d’Asturies, el sindicatu educativu Suatea acaba de facer públicu un comunicáu onde solicita que’l currículu d’Educación Infantil recueya la llingua asturiana, que s’eliminen les ratios mínimes d’alumnáu pa recibir clases, el reconocimientu de la especialidá pa los maestros, que nos centros s’axeiten planes llingüísticos pa que l’idioma sía vehicular en delles árees y que s’atienda a la demanda en FP, Escueles d’Adultos y d’Idiomes y Universidá.

El sindicatu diz qu’esti añu’l Día d’Asturies tien la novedá del cambiu de Gobiernu, «Gobiernu que parez mostrar intenciones bones na promoción y desarrollu de les nuestres señes d’identidá y cultura», indiquen dende Suatea, recordando qu’Emilio Marcos Vallaure, conseyeru de Cultura, contestó n’asturianu a una demanda de Xuristes pol Asturianu, «dalgo histórico y d’un cambiu d’actitú que toos y toes esperábemos». Tamién recuerden la promesa electoral fecha por Álvarez-Cascos de desarrollar reglamentariamente la Llei d’Usu.

Read Full Post »

El TSXA sentencia pola normalización llingüística na Universidá

XICU ARIZA

El TSXA, a petición del Aconceyamientu de Xuristes pol Asturianu (AXA), baltió un alcuerdu del Conseyu de Gobiernu de la Universidá d’Uviéu que torgaba la presentación y recepción d’escritos n’asturianu nel so rexistru.

La sentencia del TSXA del pasáu 30 de payares anuló dellos párrafos de los artículos 2, 3 y 4 del Alcuerdu del Conseyu de Gobiernu de la Universidá d’Uviéu nel que refugaben la presentación y recepción d’escritos n’asturianu na Universidá.

Read Full Post »

Anulada la resolución d’Educación qu’establecía un númberu mínimu d’alumnos pa estudiar asturianu

La Sala de lo Contencioso Alministrativu del Tribunal Superior de Xusticia d’Asturies, con fecha 17 de setiembre de 2010, falló a favor de la demanda interpuesta polos servicios xurídicos de CC.OO contra la resolución del 16 de mayu del 2008, de la Conseyería d’Educación y Ciencia, pola que s’establecía la ufierta y les condiciones pa la elección de materies optatives y materies opcionales pa la Educación Secundaria Obligatoria.

El Tribunal estima’l recursu interpuestu por CC.OO y “declara nulu y sin efectos por ser contraria a Derechu, l’artículu 5.1 de la mesma, qu’establecía un númberu mínimu d’ocho alumnos pa formar un grupu na asignatura de Llingua Asturiana na Educación Secundaria.

Read Full Post »