Oslin-Ast: un flexonador interactivu qu’amuesa les variaciones gramaticales y formales d’una palabra n’asturianu

Oslin-Ast ye’l nome d’una nueva ferramienta llingüística d’usu llibre n’Internet que vieno acabante de ponese estos díes a disposición de los falantes ya investigadores por mor del trabayu que desendolcaren dos instituciones: la Universidá d’Uviéu (al traviés del Seminariu de Filoloxía Asturiana) y l’Institut Universitari de Lingüística Aplicada (IULA) de la Universitat Pompeu Fabra de Barcelona. Trátase d’un flexonador de palabres, esto ye, una base de datos interactiva que muestra toles variaciones gramaticales y formales que caúna de les palabres de la llingua asturiana pue tener, d’acordies cola normativa del estándar académicu.

La dirección d’OSLIN-AST ye: http://ast.oslin.org/ y nella puen facese dende yá consultes de toa mena y atopar información complementaria sobre’l proyeutu y le diverses fontes lexicográfiques asturianes, amás del Diccionariu de la Llingua Asturiana (DALLA) qu’emplega.

Read Full Post »

D’Andrés: “Nel asturianu escritu hai una respetable actividá neolóxica, propia d’una llingua vidable”

PABLO R. GUARDADO

L’equipu del proyectu AsturNeo, dirixíu por Ramón d’Andrés Díaz (Madrid, 1959), investigó per trés años la xeneración de neoloxismos na nuesa llingua. L’informe, de nome ‘Palabres nueves n’asturianu’, amuesa la vitalidá del idioma.

¿Cuándo echó andar el Proyectu Observatoriu Asturianu de Neoloxía y Terminoloxía (AsturNeo)?
Formalmente entamó nel añu 2010, al firmase’l primer conveniu ente la Universidá d’Uviéu (Seminariu de Filoloxía Asturiana), la Universidá Pompeu Fabra de Barcelona (Institutu Universitariu de Llingüística Aplicada col so Observatoriu de Neoloxía) y el Principáu d’Asturies (Dirección Xeneral de Política Llingüística). Depués el conveniu foi renovándose hasta’l 2012. Antes d’esto, el Seminariu de Filoloxía Asturiana yá participara nel 2008 nel I Congresu Internacional de Neoloxía (CINEO) en Barcelona.

¿Quién conformó l’equipu?
L’equipu plenu tuvo formáu por Taresa Fernández Lorences, Fernando Álvarez-Balbuena, les llicenciaes Vanesa Díaz Fanjul y Sara Gutiérrez Rodríguez, y yo mesmu como director. El pesu mayor de los trabayos asumiémoslu les trés últimes últimes persones.

Read Full Post »

Palabres nueves

ANTÓN GARCÍA

A primeros de los ochenta asistí a una discusión reveladora. Con un paisanu como testigu, falante d’asturianu, un profesor d’institutu contrariu al bable enredóse a discutir con un bablista. Como nun papel apareciera la palabra “llibrería”, el profesor aseguraba que yera un inventu, que n’Asturies siempre se dixera “librería”; l’estudiante aneciaba con que yera palabra de tola vida. La discusión nun avanzaba, con que los dos acudieron al criteriu d’autoridá del paisanu, buscando la razón. “Yo digo librería, pero la palabra llibrería ye más asturiana”. Naquella mesa taben les posiciones que se podíen alcontrar sobre l’asturianu: la de los falantes, cola diglosia y un sentíu arraigáu y xuiciosu de la llingua; la de los antiblabistes, qu’entendíen l’español como la llingua qu’enllenaba los furacos del asturianu hasta la so sustitución definitiva; y la de los bablistes, intentando tornar el procesu con propuestes a veces creatives, acertaes o non como s’encargaben de determinar los homes y muyeres falantes tradicionales.

Read Full Post »

Palabres nueves n’asturianu

Ramón d’Andrés Díaz, Vanesa Díaz Fanjul y Sara Gutiérrez Rodríguez
ISBN: 978-84-8053-717-9
17 x 24 cm || 348 páxs. || PVP: 15 €

Toles llingües, nun momentu o n’otru, creen palabres nueves pa denomar situaciones tamién nueves. L’asturianu nun diba dexar de facelo. Esti llibru recueye los “neoloxismos” o palabres nueves apaecíes en tres diarios dixitales d’Asturies (Les Noticies, Europa Press y Asturies.com) ente los años 2010, 2011 y 2012. Otra manera, esta obra ye’l resultáu impresu del Proyectu Observatoriu Asturianu de Neoloxía y Terminoloxía (AsturNeo), que vien desendolcándose dende’l 2009 al traviés d’un conveniu robláu pola Universidá Pompeu Fabra de Barcelona, la Universidá d’Uviéu y el Gobiernu del Principáu d’Asturies al traviés de la Dirección Xeneral de política Llingüística.

(d’Ediciones Trabe, 20-12-2013)

Read Full Post »