La ministra Celáa yá conoz la reivindicación de la especialidá d’asturianu

El conseyeru d’Educación, Genaro Alonso, tresmitió a la ministra d’Educación, Isabel Celáa, la reivindicación de la especialidá docente de Llingua Asturiana y Lliteratura, dalgo qu’esixe un cambiu nos reales decretos d’especialidaes, que son competencia del Ministeriu.

Nellos, tendría qu’establecese que se pue aprobar la especialidá docente pa llingües qu’anque nun son oficiales tienen protección llegal y una política llingüística desarrollada pola comunidá autónoma, como ye’l casu de la llingua asturiana.

Read Full Post »

UXT, SUATEA, CSI y CC OO sofiten la oficialidá nun comunicáu conxuntu

Confirmaron la so presencia na manifestación del sábadu n’Uviéu y denunciaron la marxinación que sufre’l profesoráu de Llingua Asturiana y Gallego-asturiano.

Maxi Fernández Otero, responsable d’Educación d’UXT; Xosé Lluis Colodrón, de la estaya de Llingua Asturiana de SUATEA; Xosé Daniel Rodríguez, voceru de CSI; y Marta Mori, secretaria de Llingua Asturiana de CC OO, encargáronse de presentar esti comunicáu conxuntu de los cuatros sindicatos nel que demanden la oficialidá del asturianu y sofiten la convocatoria del sábadu de la Xunta pola Defensa de la Llingua Asturiana (XDLA), al igual que’l ‘Proyectu 2018 pola Oficialidá’. La marcha lleva’l lema ‘L’asturianu llingua oficial ¡agora!’ y va salir al meudía de la Estación del Norte (RENFE).

Read Full Post »

Los principales líderes sindicales sofiten la manifestación pola oficialidá del sábadu

PABLO R. GUARDADO

La Xunta pola Defensa de la Llingua Asturiana (XDLA) sigue recibiendo sofitos pa la manifestación ‘L’asturianu llingua oficial ¡agora!’ del sábadu, destacando’l de los principales líderes sindicales del país. “Esta situación ye exemplu del cambiu xeneracional y de la llegada d’una fornada nueva de dirixentes que nun lleven al llombu los prexuicios de la xeneración anterior”, afirma la organización.

José Manuel Zapico, secretariu xeneral de Comisiones Obreres (CC OO), foi’l primeru del que se difundió una semeya xunto con dellos compañeros na que suxetaba una cartelu de la convocatoria del sábadu, al que siguieron Begoña Díaz-Penedo, secretaria d’Organización de la Unión Sindical Obrera (USO) y Javier Fernández Lanero y Maximina Fernández, cabezaleros de la Unión Xeneral de Trabayadores (UXT) y de la so federación d’enseñanza FETE-UXT, al igual que los del Sindicatu Unitariu Autónomu de Trabayadores de la Enseñanza d’Asturies (SUATEA), de la Confederación Intersindical y de la executiva de la Corriente Sindical d’Izquierda (CSI). L’últimu líder sindical que se suma a esta llista ye José Luis Alperi, secretariu xeneral del SOMA.

Read Full Post »

La XDLA asegura que l’anulación del Plan de Carreño amuesa que “la Llei d’Usu ye insuficiente”

“La oficialidá ye l’únicu camín” pa la Xunta pola Defensa de la Llingua Asturiana (XDLA) pa evitar situaciones como l’anulación del Plan de Normalización Llingüística de Carreño. Entiende que la sentencia de recién d’un xulgáu de Xixón “vuelve a demostranos que’l marcu xurídicu actual, la Llei d’Usu, ye insuficiente”.

El coleutivu cívicu entiende qu’esta anulación, que se suma a una previa del Tribunal Superior de Xusticia, “amás d’una clara intromisión na autonomía municipal, ye una muestra más de que la oficialidá ye l’únicu camín posible p’asegurar la plena validez xurídica de la política llingüística llevada alantre polos conceyos”. La mesma establez l’anulación del Plan de Normalización porque “se proyeuta hacia la totalidá de l’actividá municipal y amás en rellación cola xeneralidá de los ciudadanos que se relacionen cola mesma”, lo que pa la XDLA ye venir a dicir “que l’asturianu nun val pa falar de too, que namás se pue usar pa determinaes coses y que la xente que quiera nun pue rellacionase col so conceyu na so llingua materna”.

Read Full Post »

Suatea, UXT y CCOO apoyen el programa d’asturianu vehicular, pero piden la oficialidá

Los sindicatos Suatea, UXT y Comisiones Obreres mostraron la so conformidá col proyectu pilotu pa impartir asignatures utilizando l’asturianu como llingua vehicular en dellos centros de la rede educativa, anque reclamaron la reconocencia de la especialidá docente pal profesoráu.

Nuna rueda de prensa pa presentar la convocatoria de güelga, representantes de los trés sindicatos refiriéronse al anunciu realizáu agora poco pol conseyeru d’Educación, Genaro Alonso.

“Paeznos positivo”, señaló Enrique Fernández (CCOO), “Pero’l verdaderu oxetivu ye la cooficialidá d’asturianu, y ési ye’l fin últimu”, añadió, “y ello pasa pela escolarización”.

Read Full Post »

La II Xornada de “Llingua Asturiana y Educación” va averar les TICS a la clas d’asturianu esti xueves 13 Payares

La II Xornada de “Llingua Asturiana y Educación” va averar les TICS a la clas d’asturianu esti xueves 13 de Payares na Sala de Graos, Facultá de Formación del Profesoráu y Educación de la Universidá d’Uviéu, con un programa nel que les nueves tecnoloxíes y la so presencia na clas de primaria y secundaria van protagonizar una bona parte de les ponencies.

La xornada va entamar a les 10,00 de la mañana cola presencia de Julio Antonio González García, Vicerreutor de Profesoráu y Ordenación Académica (Universidá d’Uviéu), Inmaculada González Gómez, Primer teniente d’alcalde del Conceyu d’Uviéu, y Ana María Fueyo, direutora xeneral de Política Llingüística del Principáu d’Asturies, amás de Juan Carlos San Pedro Veledo, Decanu de la Facultá de Formación del Profesoráu y Educación y Raúl Carbajal López, Coordinador académicu de la xornada.

Read Full Post »

Partidarios de la oficialidá del asturianu percuerren el centru d’Uviéu reclamando la reconocencia de la llingua

Partidarios de la oficialidá de la llingua asturiana percorrieron esti vienres les cais del centru d’Uviéu pa reclamar esta reconocencia, como tolos años nel Día de Les Lletres. La marcha, liderada por un grupu de gaiteros y percusionistes, empezó ante la Estación de Renfe d’Uviéu y percorrió tola cai Uría hasta acabar frente al Teatru Campoamor, onde ta previsto l’actu institucional de l’Academia de la Llingua.

Sindicatos Suatea, CCOO, UXT y CSI, organizaciones polítiques como Compromisu, Conceyu Abiertu, Andecha Ástur, Izquierda Unida, y delles asociaciones sociales y culturales diéronse cita y aportaron les sos pancartes a la reivindación.

Read Full Post »

Ana Cano recalca que la oficialidá de la llingua nun supondría “nengún problema económicu”

La presidenta de l’Academia de la Llingua Asturiana, Ana Cano, calcó en que la oficialidá de la llingua asturiana nun supondría nengún problema económicu, y poro refugó l’argumentu de la crisis pa nun facilitar esta reconocencia dende les instancies polítiques.

Asina lo espresó mientres el so discursu nel actu institucional del Día de Les Lletres, que como tolos años l’Academia celebra nel Teatru Campoamor d’Uviéu.

Read Full Post »

Partidarios de la oficialidá del asturianu piden un añu más la so reconocencia peles cais d’Uviéu

Partidarios de la oficialidá de la llingua asturiana percorrieron esti vienres, Día de Les Lletres Asturianes, como tolos años dende 1987, el centru d’Uviéu reclamando esta reconocencia pal idioma autonómicu.

La convocatoria de la Xunta Pola Defensa de la Llingua contó cola participación d’organizaciones polítiques (presencia de pancartes d’Izquierda Unida -asistieron el diputáu nel Congresu Gaspar Llamazares, la diputada autonómica Noemí Martín, y el coordinador xeneral n’Asturies Manuel Orviz, ente otros-, Compromisu por Asturies y Andecha Ástur), amás d’organizaciones sindicales (CCOO, UXT, CSI y el sindicatu educativu Suatea), y de dellos colectivos y organizaciones sociales y llingüístiques, ente elles tamién algunes del occidente, que plantegaron la mesma reivindicación pa la ‘fala’ y el gallego-asturianu.

Read Full Post »

El Conseyu Asesor de la Llingua de Xixón abriráse a les organizaciones que trabayen pol asturianu

PABLO R. GUARDADO

La propuesta de la XDLA de modificar los estatutos del Conseyu Asesor de la Llingua de Xixón saldrá alantre. Tolos presentes nun punxeron torgues a que les organizaciones que trabayen pol asturianu pasen a formar parte de la entidá.

Xulio Casado y Susana Fernández González foron los representantes de la Xunta pola Defensa de la Llingua Asturiana (XDLA) na reunión celebrada’l martes nel Centru de Cultura Antiguu Institutu que treslladaron a los miembros del Conseyu Asesor de la Llingua la necesidá de que les organizaciones que trabayen pol asturianu formaren parte de la entidá xunto colos qu’establez dende’l 2008 los sos estatutos: l’alcalde/alcaldesa o la persona na que delegue, que preside’l Conseyu; Oficina Municipal de la Llingua; tolos grupos municipales; Conseyería d’Educación, Cultura y Deporte; Conseyu de la Mocedá de Xixón; Academia de la Llingua Asturiana; Federación de Asociaciones de Vecinos de Gijón (FAV); Federación de Asociaciones de Vecinos Rurales de Gijón ‘Les Caseríes’; Comisiones Obreres; UXT; USO; SUATEA; Asociación Empresarial de Hostelería de Gijón, Carreño y Villaviciosa; y dos persones “de reconocíu prestixu y dedicación a los llabores rellacionaos coles funciones del Conseyu”. Amás, nesta ocasión, convidóse tamién a L’Asociación Cultural L’Arribada, l’Asociación Cultural N’Ast, Iniciativa pol Asturianu y la Tertulia Cultural El Garrapiellu –que nun unvió representante–, coleutivos que la XDLA considera qu’han de tar de manera permanente nel Conseyu Asesor.

Read Full Post »