Feeds:
Antradas
Comentairos

Posts Tagged ‘Vicente García Oliva’

Gonzalo G. Barreñada (Sotrondio 1973) tardó muncho n’entamar a asoleyar obra (de 2016 ye’l so poemariu “Biografíes”), pero lo cierto ye que nestos últimos 4 años consiguió afitase como una de les voces más importantes de la lliteratura asturiana: Los Poemarios Biografíes y El Pesu de la Lluz, amás del volume de rellatos Hestories de Burgundu, y la novela La Casa de Xuan Buelga preceden nel tiempu a esti el Llar n’Orde, que non solo ye’l so tercer poemariu, sinón que tamién-y valió’l premiu Xuan María Acebal del Principáu d’Asturies. Recordámosvos, como siempre, qu’El Llar n’orde, amás de na vuesa llibrería asturiana de confianza, vais poder atopalu equí.

En 4 años fuisti a sacar trés poemarios, un volume de rellatos y una novela y, amás, a ganar el premiu más prestixosu de poesía d’Asturies, el Xuan María Acebal. Una de les carreres más meteóriques nes nueses lletres. ¿Tardasti n’escribir o en querer publicar? ¿Por qué? ¿Qué te fixo decidite?

Escribo cuentos dende neñu; daquella la mio mayor influyencia yera un llibru que tenía en casa de los hermanos Grimm. Con 12 ó 13 años escribí una novela d’esploradores ingleses en Canadá y una imitación mala d’El señor de los aniellos que llevaba de títulu Les seis espades de los elfos, obres dambes que tán na carbonera de casa xunto a otres munches; pero na carbonera tán bien; sicasí, nun olvido que nun hai nada de lo qu’escribí daquella que llueu nun sirviera d’aprendizaxe.

(more…)

Read Full Post »

L’Academia de la Llingua Asturiana vien d’asoleyar el númberu 36 de la revista Lliteratura. Revista lliteraria asturiana correspondiente al añu 2020. Nesti númberu, de 173 páxines, baxo la direición de la escritora y académica Marta Mori, atópense dos estayes de la revista claramente definíes y que bien podríen iguar dos númberos perfectamente dixebraos: una primer estaya especial dedicada a la Lliteratura Infantil y Xuvenil (LLIX) y una segunda estaya que coincide colos conteníos habituales de la revista.

A lo llargo de les sos páxines combínase la creación lliteraria, l’ensayu y la crítica, y les voces nueves apaecen xunto a voces yá consagraes. «Esti exemplar pue valir al empar d’amuesa del llabor lliterariu de güei y como material pal aula no que cinca a la Lliteratura Infantil y Xuvenil», espliquen na academia. 

(more…)

Read Full Post »

Esti 2 d’ochobre ye’l Día del Llibru y el Discu Asturianu y toles producciones culturales n’asturianu van tener un 10% de descuentu. Ente les principales novedaes que los llectores van poder topar nes llibreríes ta la novela ganadores del Premiu Xosefa Xovellanos, ‘Los xardinos de la lluna’, de Francisco Álvarez, y ‘Nunn’, la primer novela de Xandru Martino pa públicu adultu.

La Selmana de les Lletres Asturianes ye l’eventu más importante alredor de la lliteratura n’asturianu y gallego-asturianu que se convoca n’Asturies. La cita, programada pal mes de mayu pasáu, aplazóse pola crisis provocada pola covid-19 y va celebrase la selmana del llunes 28 de setiembre al vienes 2 d’ochobre.

(more…)

Read Full Post »

Más cultura asturiana na RTPA

Col títulu de ‘Por una RTPA al serviciu de la cultura asturiana’ 118 persones del campu cultural y musical roblen un escritu nel que reclamen “apostar por dignificar la presencia de conteníos culturales y musicales del país (mui especialmente n’asturianu y gallego-asturianu) na programación, con un tratamientu dignu, global y permanente nella”. La fundación nel añu 2005 de Radiotelevisión del Principáu d’Asturies (RTPA) enllenó d’esperances a los y les trabayadores/ dinamizadores/creadores culturales y musicales asturianos/es. Rixida nos primeros años pola Llei 2/2003, nel so preambulu falaba de potenciar las peculiaridades y el afianzamiento de la identidad asturiana, a través de la difusión, conocimiento y desarrollo de los valores históricos y culturales en toda su variedad y riqueza recuerden los firmantes del manifiestu. “La puesta en marcha efectiva del serviciu de televisión (TPA) fixo qu’aquelles esperances primerices s’esvanecieren en viendo’l modelu pel qu’empobinó la so programación; el fracasu social y económicu al que llevó obligó a un cambiu de rumbu radical que se caltuvo nel tiempu, con una visión de lo asturiano mui restrictiva y simplista” señalen. Tamién consideren que “los primeros pasos del serviciu radiofónicu (RPA) paecíen ufiertar bonos augurios, asina la so parrilla enllenóse de programes y espacios en llingua asturiana colos más variaos conteníos y atentos al fechu cultural y musical del país, pero namás foi un espeyismu nel tiempu y darréu foron desapaeciendo dafechu de les so emisiones”.

(more…)

Read Full Post »

Na previa d’una Selmana de les Lletres Asturianes centrada en recuperar la figura d’una muyer escritora escaecida nes antoloxíes canóniques de la época, como ye Tuxa, Vicente García Oliva (Xixón, 1944) presentó una obra nueva, dedicada a Xosefa de Xovellanos. Un llibru qu’abre un proyeutu de Pintar-pintar pa dar a conocer biografíes de muyeres que va siguir cola d’Urraca l’Asturiana.

¿Quién yera Xosefa de Xovellanos?
Xosefa de Xovellanos yera la penúltima de nueve hermanos ente los que s’alcontraba’l gran Gaspar Melchor, que-y sacaba un añu. Fue una muyer culta ya intelixente que supo destacar nun mundu de paisanos. Hai que pescanciar que tamos nel Sieglu XVIII onde les muyeres yeren un ceru a la izquierda.

Casóse col Procurador en Cortes por Asturies don Domingo González d’Argandona –d’ehí’l nomatu de “l’Argandona” col que figura nuna cai de Xixón– y vivió dellos años en Madrid. Ellí frecuentó les más importantes tertulies intelectuales de la dómina, como la del Conde Campumanes, lo cuál yera inusual tratándose d’una muyer.

Enviudó y tornó a la so patria, Asturies, onde tamién tertulió con otros ilustraos asturianos, como González de Posada, Antón Balvidares o Xuan González Villar, toos ellos mui arreyaos a la llingua asturiana. D’ehí principió a escribir poesía n’asturianu.

Tuvo un amor que s’esbayó pola oposición familiar, al ser de menor clas social qu’ella y, muertes les sos tres fíes, sos padres y el so gran amigu Balvidares, más sola que la una, decide metese a monxa. Ellí pasa los caberos años de la so vida hasta la so muerte en 1807. Faltába-y un día pa cumplir los 62 años.

(more…)

Read Full Post »

P. A. M. E.

Antes de que lleguen los frutos naturales de la seronda, se adelantan en las librerías las novedades editoriales en llingua asturiana que este año del virus trasvasan su epicentro de les Lletres de mayo a octubre. Para todos los géneros y todos los públicos, con especial atención al infantil.

A punto de ver la luz en la editorial Trabe está la novela ‘Los xardinos de la lluna’ de Paco Álvarez, la obra con la que el autor de la exitosa y traducida ‘Lluvia d’agostu’ consiguió en 2019 el Premiu Xosefa de Xovellanos. Otra novela trae Delallama, en este caso ‘Nunn’ de Xandru Martino

(more…)

Read Full Post »

PABLO ANTÓN MARÍN ESTRADA

Dalguién definió el xéneru negru como les noveles de caballeríes de la nuestra dómina. La lliteratura n’asturianu nun ye ayena a esi cultivu de la novela policiaca y basta una güeyada a los títulos publicaos dende mediaos de los 80 hasta güei pa decatase de que pocos son los autores qu’alcuando bebieron de les fontes del thriller. Metanes la Selmana Negra que cada branu celebra en Xixón la vitalidá del xéneru prúyenos ufrir una recordanza de la contribución a él na nuestra llingua.

Ye un escritor de la hora más temprana, Xuan Xosé Sánchez Vicente el que da estampa en 1984 a la primera narración de tastu policial: ‘La muerte amiya de nueche’. Ganadora del IV Premiu Xosefa Xovellanos, l’autor válese d’una trama de suspense pa llamar l’atención a cuenta del abandonu qu’una tierra a la so identidá cultural. Nun paez casual qu’al añu viniente algamare’l mesmu premiu la obra d’un autor debutante, Adolfo Camilo Díaz: ‘Añada pa un güeyu muertu’, un títulu qu’inda nun seya en sentíu estrictu negru, asoma un enclín poles formes del thriller modernu que van empobinar al escritor de Caborana a una obra como ‘Miénteme dime la verdá’ (1989), dafechu somorguiada nel xéneru, con un argumentu que paña la complexa heteronimia del portugués Fernando Pessoa como xuegu lliterariu. La fidelidá de Díaz al xéneru perdura hasta ‘Espankin’ (Suburbia, 2010), un descensu a la violencia cotidiana.

(more…)

Read Full Post »

PABLO ANTÓN MARÍN ESTRADA

El pasáu 23 de mayu cumplíense los venticinco años de la muerte d’una escritora esencial de la lliteratura moderna en llingua asturiana, la xixonesa María Teresa González. Autora d’una obra poética d’una singular intensidá espresiva y emocional, foi una de les primeres voces de muyer na xeneración del Surdimientu y tamién de les que más ceo empobinaron nel cultivu de la narrativa. Güei, sigue siendo una poeta viva a la que vuelven con gustu llectores y autores de toles andanaes xeneracionales, mesmo los que nin siquier nacieran de la que fueran escritos los sos testos. En 2008, la Conseyería de Cultura del Principaú dedicaba-y a la so figura la 29 Selmana de les Lletres y la so obra volvía a acoyer un nuevu interés. Agora, un cuartu de sieglu después de que nos dexara, la so familia remémbrala con una páxina web na que se puede acceder a la integridá del so llabor lliterariu n’asturianu, amás d’ufrir la so biografía, bibliografía y una completa amuesa de trabayos críticos alrodiu d’ella. Un homenaxe que val non namás pa da-y alcordanza sinón sobre too pa lleela con anováu interés.

Nacida en somantu d’una familia trabayadora nel barriu de Tremañes en 1950, cursó les sos primeres lletres nel colexu Les Maravilles y con 17 años entro a trabayar na empresa AEA Crady, na que diba tocá-y vivir y participar activamente nos conflictos llaborales que finaron col pieslle de la factoría. El desempléu encarrilóla a facese auxiliar de clínica, una profesión qu’había desempeñar hasta el so pasamentu en 1995. Casada col tamièn escritor Vicente García Oliva, tuvo al so llau una fonda implicación nel desenvolvimientu del asturianismu cultural al traviés de l’asociación Conceyu Bable. Los sos primeros poemes daten de 1984, pero diba ser tres años después cuando publique el so primer llibru: ‘Collaciu de la nueche’. En 1988 va dar a estampa un nuevu poemariu: ‘Ochobre’ y en 1993 asoleya ‘Heliocentru’, la so última entrega poética, a la que diba siguir un añu más tarde el volume de narrativa ‘La casa y otros cuentos’.

(more…)

Read Full Post »

La primer edición del Concursu de Rellatos Curtios «Bilioteca Universidá d’Uviéu», convocáu pa conmemorar los 250 años de l’apertura al públicu de la mesma, yá tien ganadores.

Aconceyáu ayeri’l xuráu, formáu por Ana María Cano González, Caderalga de Filoloxía Románica, Aurelio Antonio González Ovies, Profesor Titular de Filoloxía Llatina y María Soledad Díaz Carril, Bibliotecaria de la Universidá d’Uviéu, apautaron da-y el primer premiu a José Manuel Recio Muñiz pol rellatu “Cronograma” y el segundu premiu a Vicente García Oliva pol testu “Un personaxe misteriosu”.

Los premios consisten en llotes de llibros y visites guiaes al Edificiu Hestóricu de la Biblioteca.

(de Formientu, 18-02-2020)

Read Full Post »

PABLO R. GUARDADO

“Ye un percorríu pelos 15 años de la normalización llingüística en Xixón”, esplicó María Xosé Rodríguez López, responsable del serviciu, sobre la esposición qu’esti miércoles abrió les sos puertes nel Centru de Cultura Antiguu Institutu. Ésta acompáñase d’un videu de 15 minutos de llargor y va poder visitase hasta’l 17 de xineru.

La Oficina de Normalización Llingüística cumple 15 años y el SNL xixonés celébralo col entamu d’una amuesa que repasa’l llabor normalizador fechu pol Conceyu de Xixón dende que n’ochobre del 2003, nun despachu de la Conceyalía d’Educación y Cultura de l’Antigua Pescadería con Carmen Rúa como edil, ellaboróse’l primer presupuestu y el primer programa. Trés meses depués, el 21 de xineru del 2004, presentóse de manera oficial la Oficina Municipal de de la Llingua de Xixón, nome col que nació, na sala de receiciones de la Casa Conceyu.

(more…)

Read Full Post »

Older Posts »