Les traducciones de ‘1984’ y ‘Drácula’ y el poemariu nuevu de Xuan Bello, principales novedaes lliteraries pa la seronda

A lo llargo de la seronda van llegar a les llibreríes la traducción al asturianu del clásicu de George Orwell ‘1984’ y de Bram Stoker ‘Drácula’ , amás de ‘Les isles inciertes’, el poemariu nuevu del escritor Xuan Bello, Premiu Nacional de Lliteratura Asturiana.

‘1984’ ye una novela de ficción política y distópica, escrita pol inglés George Orwell y publicada en 1949. Con versión n’asturianu de Xesús González Rato, el llibru centra la historia nuna sociedá vixilada por un hermanu mayor, na que se regula’l pensamientu al traviés de la llingua y na que la premisa ye lo que nun tien nome nun pue pensase.

Trátase d’una crítica al totalitarismu que ye una de les obres emblemátiques del sieglu XX. Con esta novela, yá considerada un clásicu, Ediciones Trabe principia la Colección Calume (‘munchu fondu’), dirixida pol historiador y ensayista Rafael Rodríguez Valdés.

Read Full Post »

Un llibru infantil recupera la tradición asturiana del ‘Nataliegu’

Ediciones Trabe ta acabantes de publicar ‘Un nataliegu perbullindiegu’, del escritor Víctor Raúl Pintado Rey y con ilustraciones d’Alberto Álvarez Peña. Trátase del primer llibru infantil centráu nuna tradición qu’hai décades yera un vezu na Navidá asturiana.

La costume consistía en quemar nel llar el Nataliegu -un tueru de carbayu- la nueche de Navidá y esparder les cenices pela casa y la corte pa que traxeren bona nación y bones colleches a la familia. Malapenes queda yá’l recuerdu d’esta tradición de la que namás queden testimonios en conceyos como Grau, Casu, Llaviana, L.lena o Tinéu. Agora, esti llibru quier tresmitir a les xeneraciones más moces esta tradición.

Read Full Post »

Samalandrán. Islla de lleendes

Víctor Raúl Pintado Rey, Vitu
Ilustraciones de Niña Rata
Tapa dura
ISBN: 978-84-8053-835-0
21,5 x 30,5 cm || 58 páxs. || PVP: 10 €

En Samalandrán, una isllina a la vera d’Abiyés, viven Salia y Asur, una pareya de rucherinos que van vivir una aventura con corsarios maldadosos, tesoros escondíos, islles misterioses y pergaminos con pallabres sagraes…

Samalandrán ye la islla misteriosa rellacionada colos viaxes del llexendariu monxu irlandés, que nesta ocasión visita la mariña cantábrica asturiana.

Read Full Post »

L’Anguleru ayuda a deprender inglés al traviés de la llingua asturiana

Él nun va poder tar presente, pola so estancia necesaria nel mar de los Sargazos al curiáu de les angules y anguiles, pero sí los sos collacios n’Asturies. Les histories de L’Anguleru van ayudar a deprender inglés al traviés del asturianu.

La cita ta prevista pal vienres, al meudía, na Llibrería del Centru Niemeyer y nella van participar Víctor Raúl Pintado Rey ‘Vitu’, autor del llibru ‘L’Anguleru. Suaños de Navidá’ y coautor de les ilustraciones; Bradley Samore, profesor d’inglés; Tamara Saiz, direutora del Colexu Públicu de Panes; Fernando González, de l’Asociación Cultural Garabuxada; y Samuel Castro, copropietariu d’Ediciones Trabe. Estos collacios de L’Anguleru, amás de presentar la obra con histories navidiegues del máxicu personaxe, van entamar delles actividaes cola fin de que los neños y neñes presentes puedan aprender inglés y perfeicionar el castellanu al traviés de la so llingua materna, l’asturianu. “Esta propuesta didáutica va incorporar de forma natural trés de les llingües que más-y presten a L’Anguleru: l’asturianu, el castellanu y l’inglés, convirtiendo l’actividá nuna novedosa aición educativa de caráuter trillingüe”, espliquen los sos organizadores.

Read Full Post »

Vitu: “L’Anguleru ye un cuentu de Navidá averáu a la cultura asturiana”

PABLO R. GUARDADO

A les 18.30 hores d’esti martes ta prevista la llegada de L’Anguleru a L’Arena, el so puntu d’entrada a Asturies, onde va repartir regalos a los neños. El maestru Víctor Raúl Pintado Rey ‘Vitu’(Avilés, 1973) ye bon conocedor d’esti personaxe.

¿Quién ye L’Anguleru?
Un personaxe navidiegu asturianu; un personaxe de la lliteratura infantil n’asturianu. Trátase d’un cuentu de Navidá como’l de Pá Noel o los Reis Magos.

¿Tien orixe mitolóxicu?
Non. L’etnógrafu asturianu Alberto Álvarez Peña caltién que nun esistiría nengún personaxe mitolóxicu, nin na nuesa comunidá autónoma nin fuera d’ella, que reparta regalos per Navidá.

Read Full Post »