Feeds:
Antradas
Comentairos

Posts Tagged ‘Xera’

PABLO R. GUARDADO

Fiel a la so cita dende l’añu 2000, l’Anuariu de la Música Asturiana yá ta disponible nos puntos de venta habituales de la mano de Goxe Producciones. Esti númberu presenta un diseñu renováu dafechu y recupera’l CD que solía incorporar.

La edición del 2012, que dedica a Dixebra la portada por mor del so 25 aniversariu, presenta 94 páxines con una variedá grande de conteníos. Nel ‘Entamu’, los responsables de la espublización manifiesten el so enfotu de volver al orixe d’ella y recuperar los oxetivos colos que nació, amás d’afirmar que siguen “creyendo firmemente na necesidá d’un proyectu como ésti, no imprescindible de que la música del país tenga un órganu d’espresión, un escaparate onde amosar los sos llogros y esmoliciones, que dea una visión de conxuntu, que la refuerce interna y esternamente”. Darréu, los llectores van atopar entrevistes a la banda astur-chilena de folk Ta Fechu y a La Tarrancha, asina como al músicu Pablo Canalís, amás de reportaxes fotográficos del conciertu conmemorativu del venticinco aniversariu de Dixebra y de la sesta edición del Premiu al Meyor Cantar n’Asturianu, un informe sobre la baxada de conciertos y la so repercusión ente los grupos del país, comentarios sobre los discos nuevos de Mariluz Cristóbal Caunedo, Toli Morilla o Soncai System, y un diariu sobre’l procesu de creación, grabación y presentación del trabayu ‘Llume’ de Xera. (more…)

Read Full Post »

El próximu día 28 de setiembre va tener llugar na ciudá frisia de Leeuwarden/Ljouwert un acontecimientu bien significativu dientro’l calendariu añal européu rellacionáu coles llingües minoritaries: la celebración del décimu aniversariu del Festival Liet International. Amás, va celebrase una xunta preparatoria del Liet 2012. Tolos actos van cuntar con presencia asturiana.

Pa celebrar el décimu aniversariu del Festival Liet International entamáronse dellos eventos na ciudá que lu vio nacer en 2002 y onde tien la so see la Fundación Liet que ye la so organizadora. (more…)

Read Full Post »

HENRIQUE G. FACURIELLA

Jan Gaastra ye’l responsable últimu de tol montaxe que supón organizar el Festival Liet International, el certame européu de la canción en llingües minoritaries que, dende l’añu 2002, axunta ente once y doce grupos qu’interpreten música n’idiomes minoritarios de tol continente. Anguaño, Xixón va ser la ciudá qu’acueya esti festival y Gaastra tuvo n’Asturies por cuenta de la celebración del Premiu al Meyor Cantar, del que, dende’l 2009 sal el representante asturianu nel Liet International. Participó activamente nes reuniones de socios de la Fundación y ente ésta y el Gobiernu d’Asturies pa ultimar los preparativos de la organización del concursu européu nel país.

¿Qué-y parecieron los cinco finalistes del Premiu al Meyor Cantar?
El nivel del Premiu al Meyor Cantar foi mui bonu esti añu. Ye evidente que la organización del certame trabaya p’atrayer a dalgunes de les meyores bandes asturianes. Esto ye dalgo qu’envidiamos porque n’otres zones –como Frisia–, los grupos de sonadía ponen munchos reparos a participar nun concursu de la canción. (more…)

Read Full Post »

Asturiana Mining Company llevóse’l Premiu al Meyor Cantar col tema ‘Si nun conoces Vaḷḷouta’. D’esta forma, la banda lliderada por Michael Lee Wolfe va representar a Asturies nel Liet International 2012, que va celebrase en Xixón.

Cientos de persones acudieron al Teatru de La Laboral pa presenciar la gala del Premiu al Meyor Cantar, na que los cinco artistes seleicionaos interpretaron el tema col qu’aspiraben a llevase’l gallardón d’esti añu. Les canciones yeren ‘Si nun conoces Vaḷḷouta’, de l’Asturiana Mining Company; ‘L’altanera’, de Macadamia; ‘Campos de meiz’, de Bacotexo; ‘Yo quixera’, de Xera; y ‘Felina Bipolar’, d’Alfredo González. Tres les actuaciones, y mentes el xuráu presidíu por Alfredo Ignacio Álvarez Menéndez, direutor xeneral de Política Llingüística, y formáu por Lisardo Lombardía Yenes, direutor del Festival Intercélticu de Lorient; Ana Vanesa Gutiérrez González, escritora y presentadora de ‘Pieces’; Aurelio Argel, críticu musical; Alberto Toyos, periodista y direutor de 40 Principales Asturies; Onno Falkena, representante de Liet International; y Rebeca Velasco, cantante y profesora de Música, deliberaba qué formación merecía’l premiu, Skama La Rede, ganador de la edición pasada, ufrió un conciertu de cinco canciones. Nél, el so vocalista y llocutor de la RPA, Miguel Fernandi, aprovechó pa mostrar una camiseta d’apoyu al ente públicu de comunicación. (more…)

Read Full Post »

IVÁN G. FERNÁNDEZ

La Conseyería de Cultura acaba de dar a conocer los grupos finalistes de la VI edición del Premiu al Meyor Cantar en llingua asturiana o gallego-asturianu. Un xuráu formáu por espertos en música y llingua escoyó a los cinco finalistes, que van actuar en directo esti sábadu 25 de febreru, por cuenta del Día Internacional de la Llingua Materna, na Gala d’Entrega del Premiu, que, amás, va retresmitise en directo pela TPA. L’actu va empezar a les 19 hores nel Teatru de la Llaboral, en Xixón. (more…)

Read Full Post »

Por iniciativa de la Conseyería de Cultura del Gobiernu d’Asturies edítase’l discu tituláu 13 X Mánfer, que tien como oxetivu recuperar parte de la obra poética del escritor llangreanu Manuel d’Andrés Fernández, que firmaba col nomatu de Mánfer de la Llera. Nél, trece intérpretes y grupos musicales del país adapten y faen suyos poemes que convierten en lletres de canciones. El resultáu final ye un álbum representativu de los distintos sones que pueden sentise na escena musical n’asturianu, y tamién fai rescamplar la musicalidá que guardaben estos testos.

(more…)

Read Full Post »

L’Academia de la Llingua Asturiana (ALLA) acaba de dar anuncia de los actos preparaos pal XXXII Día de les Lletres Asturianes, que va celebrase nel Teatru Campoamor d’Uviéu, el vienres 6 de mayu, de magar les ocho y media la tarde. Ente les actividaes previstes na Xunta Estraordinaria de l’ALLA, el nomamientu del filólogu José Ramón Morala Rodríguez como Académicu d’Honor, amás del homenaxe al ciclista, recién retiráu, Chechu Rubiera, qu’amosó’l so compromisu pa cola llingua asturiana a lo llargo de tola so carrera, participando en campañes a favor de la oficialidá.

L’actu del Día de les Lletres va entamar cola tonada de José Manuel Collado, acompañáu a la gaita por Oscar Fernández González. Darréu va nomase al nuevu académicu y va poder sentise’l discursu de la presidenta Ana Cano. Darréu va facese la reconocencia a Chechu Rubiera, rematando l’actu una esbilla de poemes de Lletres Lliterariu y l’actuación del grupu Xera.

(more…)

Read Full Post »

L’Anuariu de la Música Asturiana 2010 va llegar a los quioscos del país el vienres 17 d’avientu a un preciu de 5 euros, y tamién pue adquirise na páxina web http://www.ambitu.com (entrando na tienda). Ésta publicación cumple once años de vida y yá ye tou un clásicu d’estes feches pa toos aquellos aficionaos a la música asturiana.

L’editorial d’esti númberu nuevu del Anuariu de la Musica Asturiana ta dedicáu a les infraestructures culturales que s’asitien nel país y a los sos conteníos que, según la publicación, «bien de veces dexen de llau o desdexen la presencia de los grupos y intérpretes asturianos».

(more…)

Read Full Post »

El sábadu 27 de payares celebróse en Lorient (Francia) una nueva edición del prestixosu Festival Liet International, creáu nel añu 2002 col envís d’amosar y apoyar la gran diversidá llingüística esistente nel continente européu, y esparder les distintes propuestes musicales qu’usen estos idiomes.

El Festival Liet International 2010 contó cola participación d’once grupos de toa Europa qu’usen la so llingua tradicional como vehículu d’espresión musical. Toos ellos actuaron na enllena Sala Cosmao Dumanoir de Lorient, nuna gala retresmitida n’Asturies pela canal A8 de la TPA y pela RTPA.

(more…)

Read Full Post »

El próximu día 27 de payares van desarrollase na ciudá bretona d’An Oriant/Lorient dos acontecimientos importantes dientro del calendariu añal européu rellacionáu coles llingües minoritaries: el congresu añal Partnership for Diversity y el Festival Liet International. Previamente, el día 26 va facese una reunión de socios de la Fundación Liet. Toos estos eventos van contar con presencia asturiana.

(more…)

Read Full Post »

« Newer Posts - Older Posts »