Les comparecencies pa reformar el Reglamentu de la Xunta Xeneral nel so artículu 11 –el que regula l’usu del asturianu nel hemiciclu– van empezar el 6 de febreru cola comparecencia del presidente de l’Academia de la Llingua Asturiana, Xosé Antón González Riañu.
El presidente de la institución va comparecer a pidimientu d’IX, grupu que tamién solicitó la intervención del catedráticu de Derechu Constitucional Francisco Bastida Freijedo; l’escritor y políticu Xuan Xosé Sánchez Vicente; y l’historiador Faustino Zapico. Per otru llau, a propuesta del PP, va comparecer el catedráticu de Derechu Alministrativu Alejandro Huergo Lora.
La propuesta de cambiu rexistróla’l grupu parllamentariu d’IX y busca “que, nel marcu de lo dispuestu pol Estatutu d’Autonomía y, nel so casu, pola llexislación que lo desarrolle, tanto los diputaos nel exerciciu de les sos funciones parllamentaries como cualesquier otra persona que compareza énte la Cámara pueda usar l’asturianu.
La iniciativa surde depués de les torgues a la conseyera de Cultura, Política Llinguística y Turismu, Berta Piñán, d’intervenir n’asturianu pa presentar el so proyectu de gobiernu en comisión parllamentaria, argumentando que’l so derechu d’usu nun taba amparáu pol reglamentu, porque namás facía referencia esplícita a los diputaos.
En concreto, el vixente reglamentu de la Xunta indica que “nel marcu de lo dispuestu pol Estatutu d’Autonomía y, nel so casu, pola llexislación que lo desarrolla, los Diputaos van poder utilizar el bable nel exerciciu de les sos funciones parllamentaries”.
(d’Europa Press, 25-12-2019)
Read Full Post »
