Menéndez Caravia: “La divulgación científica n’asturianu representa una oportunidá única p’allegar la llingua a la xente que güei ye ayena a la mesma”

PABLO R. GUARDADO

‘Terminoloxía de bioquímica y bioloxía molecular’ convirtióse recién na decimosétima propuesta de TermAst nos casi diez años de vida d’esta iniciativa de l’Academia de la Llingua Asturiana. El biólogu Xurde Menéndez Caravia (Quintes, 1990) ye l’autor d’esti pallabreru que resulta afayadizu “pa escolinos y profesores de Bioloxía” n’institutos.

La posibilidá d’ellaborar esta propuesta terminolóxica tuvo’l so xerme na Universidá Asturiana de Branu (UABRA).
La UABRA ye una de les actividades más prestoses qu’entama l’Academia de la Llingua Asturiana. Personalmente voi siempres que pueo a facer dalgún de los cursos que s’ufierten en Cangas del Narcea. Amás, recomiendo a tol mundu que vaya polo menos una vegada, especialmente a la mocedá. Paezme una vivencia mui tresformante qu’ayuda a entender la realidá social y cultural d’Asturies dende una perspeutiva amplia. Foi precisamente na UABRA del añu pasáu cuando surdió la idea de facer el TermAst de Bioquímica y Bioloxía Molecular. Falando cola xente de l’Academia, y especialmente con Héctor García Gil, vimos claramente la necesidá de poner enriba la mesa una propuesta terminolóxica nesta estaya de les Ciencies Biolóxiques.

Read Full Post »

L’ésitu del Día de les Lletres Asturianes en Madrid asegura la so continuidá

El sábadu pasáu celebróse nel Centru Asturianu de Madrid el Día de les Lletres Asturianes, actu que contó con munchu públicu y collaboraciones de xente emigrao. Tres años ensin celebrase, Iniciativa pol Asturianu recuperó l’eventu, que tendrá continuidá.

L’actu entamó coles pallabres de Valentín Martínez-Otero, presidente del centru, que recordó’l sofitu de la entidá asturiana en Madrid a la cultura y la llingua asturiana y qu’agradeció a Iniciativa pol Asturianu la convocatoria de la celebración. Darréu, Marissa Bordallo, miembru d’esta organización, presentó l’actu y emponderó la disposición de Martínez-Otero pa entamar actividaes alredor de la llingua asturiana.

Read Full Post »

La situación del asturianu tratóse en Bucarest na xunta xeneral d’ELEN

PABLO R. GUARDADO

Iniciativa pol Asturianu treslladó a los sos socios los pilancos qu’atopó l’idioma nos meses últimos. Esti conceyu añal de la ONG tien como oxetivu aldericar sobre la situación de caúna de les llingües miembru y establecer la estratexa pal añu próximu.

“Nel nuesu casu, falamos de les caberes complicaciones del asturianu no tocante a los recortes nes ayudes a los medios, la reducción de Llingua Asturiana en Bachiller o la tercer negativa del Gobiernu estatal a incluyir a l’ALLA nos sos presupuestos, amás de resaltar l’ésitu de les nueses campañes de Twitter y de la iniciativa pa que los conceyales y alcaldes tomaren posesión n’asturianu, o l’entamu de rellaciones ente l’ALLA y l’Academia Mirandesa”, esplica Xose B. Álvarez, responsable de Rellaciones Internacionales d’Iniciativa pol asturianu, que se treslladó a la capital rumana dende Cymru, onde reside. La xunta celebróse’l sábadu y nella participaron 12 de les 44 organizaciones que formen la European Language Equality Network (ELEN).

Read Full Post »

Iniciativa pol Asturianu participa na xunta de la Rede Europea d’Igualdá en Llingües

La Rede Europea d’Igualdá de Llingües (ELEN) celebrará la so Xunta Xeneral en Bucarest, Rumanía, esti sábadu 10 d’ochobre, organizada pol Conseyu d’Aromunes. Xosé B. Álvarez, responsable de Rellaciones Internacionales d’Iniciativa pol Asturianu tará representando a la organización y presentará los caberos problemes que vien careciendo la llingua asturiana y la so comunidá falante, asina como la repercusión de la nuesa presencia nes Naciones Xuníes.

Los delegaos que representen a los falantes de llingües minoritaries d’Europa aconceyarán esta fin de selmana na capital rumana p’aldericar munchos de los temes vitales qu’afecte a les sos llingües y cómo ELEN trabayará xunto coles sos organizaciones miembru nos ámbitos llocal, nacional y internacional.

Read Full Post »

“Ye la llexislatura con más diputaos a favor de la oficialidá, 17 de 45”

PABLO R. GUARDADO

Segunda y cabera parte de la entrevista a Inaciu Galán y González (Xixón, 1986), presidente d’Iniciativa pol Asturianu, que va viaxar esta selmana a Suiza pa intervenir na ONX.

Nestos trés años, dende que nació Iniciativa pol Asturianu, ¿la situación del idioma vivió avances o retrocesos?
La situación ye mala y va peor, no que cinca a la vitalidá de la llingua y a que les autoridaes siguen ensin garantizar la llibertá de los ciudadanos pa qu’al terminar el sistema educativu puedan escoyer qué llingua falen, porque salgan bien formaos n’asturianu y castellán, y porque esista una oficialidá que garantice’l drechu a usala en tolos ámbitos.

Por embargu, el sofitu de cada vegada más partíos de tol espectru políticu y l’enorme consensu social a favor del asturianu, más d’un 60% de partidarios de la oficialidá según les encuestes, faenmos ser positivos al respective del futuru. Tamos a tiempu de cambiar la tendencia que lleva l’asturianu hacia la desapaición en poques décades y tamos enfotaos en que vamos consiguilo.

Nel ámbitu de la reivindicación ta faciéndose cada vegada un meyor trabayu. L’importante llabor reivindicativu de la Xunta pola Defensa de la Llingua Asturiana impulsando la manifestación cada añu; el llabor sectorial de Softastur, nel campu de la informática; de Reciella, families pol asturianu, cola tresmisión del idioma a los neños; y otres organizaciones d’otru tipu como El Ronchel, Ástura, El Teixu, N’Ast, Faceira y Furmientu en Lleón, grupos de trabayu dientro de los partíos, asociaciones, llocales sociales…

Hai un movimientu plural, ampliu y que ye exemplu de convivencia. Tovía mos queda, sí me paez, un pasu más, una mayor coordinación de tol movimientu.

Read Full Post »

Iniciativa pol Asturianu espondrá ante la ONU la situación de la llingua

Una delegación d’Iniciativa pol Asturianu va participar esti xueves 25 de xunu na misión internacional que va tar presente nel 29 Conseyu de Drechos Humanos celebráu pol Altu Comisionáu de la Organización de les Naciones Xuníes (ONX).

Esta visita surde frutu del trabayu entamáu nel ámbitu internacional por esta organización y pola pertenencia de la mesma, como representante d’Asturies, a la entidá internacional European Language Equality Network (ELEN) formada por organizaciones en defensa de llingües en peligru de toa Europa.

Va unos meses Iniciativa pol Asturianu fizo públicu l’informe que s’apurriera a esti Altu Comisionáu de Drechos Humanos, preparáu pola Vocalía de Rellaciones Internacionales de la organización, dirixida por Xosé B. Álvarez. Agora ye’l momentu de la so defensa na sesión que dientro d’esti Conseyu va dedicase al cumplimientu de los Drechos Humanos n’España.

Read Full Post »

Galán: “Ye necesario implicar a la sociedá si queremos que l’idioma tenga futuru” (I)

PABLO R. GUARDADO

Inaciu Galán y González (Xixón, 1986) entama con ilusión un mandatu nuevu de trés años al frente d’Iniciativa pol Asturianu. Asturies.com ufre la primer parte de la entrevista col escritor, que va tener continuidá’l llunes.

¿Cómo afronta esta etapa nueva na presidencia d’Iniciativa pol Asturianu?
Con ganes, sabiendo que ye pa min la segunda y última parte d’un camín qu’entamaba en 2011 cola fundación d’Iniciativa pol Asturianu. Entós tuvimos que construyir una organización de cero, dala a conocer, crear un estilu propiu y caltener esi llabor a lo llargo de trés años. Agora l’oxetivu ye dir afitando la organización, creciendo y sobre manera faciendo medrar la nuesa implantación social y capacidá d’influencia. Siguimos teniendo nidio que ye necesario implicar a la sociedá na reivindicación llingüística si queremos que l’idioma tenga futuru.

Read Full Post »

El II Congresu d’Iniciativa pol Asturianu escueye una direutiva renovada con nueves vocalíes

Iniciativa pol Asturianu celebró na tarde de güei, sábadu 30 de mayu, el so segundu Congresu. La votación de los socios renovó como presidente al periodista y escritor Inaciu Galán, como secretariu al periodista Rubén Martín-Llames como secretariu y a Teno Prau como ayalgueru.

Renueven otros vocales, como Xosé B. Álvarez, en Rellaciones Internacionales o Alex Ordiales, como Vocal d’Imaxe, abriendo tamién nueves estayes de trabayu, tales como Medios de Comunicación, dirixida por Iván Llera Huerta; Enseñu, que van llevar Fonsu Martín, Alba Llaneza Carrio y Claudia Elena Menéndez, David Valdés Llozanu en cuestiones venceyaes al deporte o Samuel Gradín que coordina la radio y televisión d’Iniciativa pol Asturianu.

Read Full Post »

L’editorial de setiembre: mirandes, lleoneses y asturianos (y II)

INICIATIVA POL ASTURIANU

Dempués de la participación d’Iniciativa pol Asturianu nun alcuentru en Miranda de l Douro, xunto a entidaes de tol territoriu llingüísticu común, siguimos reflexonando alredor del llabor conxuntu qu’entendemos que pue llevase alantre.

Rellaciones colos estaos

Nel ámbitu estatal, y anque teamos falando de dos estaos estremaos, l’español y el portugués, bien ye cierto que pue trabayase de forma conxunta pa la puesta en marcha de midíes que caminen p’hacia l’establecimientu de pontes ente los territorios, al traviés de la nuesa llingua.

Les estratexes de trabayu conxuntes, sobre manera, de cara al gobiernu español, yá qu’embaxo esti mandatu ta la mayor parte del dominiu llingüísticu ástur, tienen que se potenciar abondo más. El reconocimientu de la llingua en munchos ámbitos del estáu central: concursos lliterarios, presupuestos xenerales del estáu, presencia n’ámbitos internacionales, cursos nos centros del Institutu Cervantes y otres munches midíes, pueden consiguise con más eficacia si’l trabayu ye conxuntu ya implica a más colectivos y territorios.

Read Full Post »

Los problemes del asturianu lleguen al Altu Comisionáu de los Drechos Humanos de la ONX

Un informe presentáu pola organización internacional European Language Equality Network (ELEN), de la que forma parte Iniciativa pol Asturianu como entidá representante de la llingua asturiana, lleva a la Oficina del Altu Comisionáu de los Drechos Humanos de la Organización de les Naciones Xuníes (ONX) la situación de violación de drechos humanos llingüísticos que viven n’Asturies los asturfalantes.

L’informe recueye los principales casos de discriminación y esplica l’estatus llegal del idioma asturianu, que nun tien reconocida la oficialidá magar les recomendaciones feches dende instituciones europees ya internacionales.

Read Full Post »