Feeds:
Antradas
Comentairos

Posts Tagged ‘Xosé Lluís Campal Fernández’

José Luis Rendueles Antón foi el ganador del Concursu de Cuentos pola Oficialidá del Asturianu, que convoca’l Conceyu Bimenes y qu’esti añu llegó a la so duodécima edición. El primer premiu, dotáu con 800 euros, foi pa la so obra “Atadures”.

L’autor yá ganare esti mesmu concursu nel añu 1999. El segundu premiu, dotáu con 500 euros, foi pal cuentu “La viesca de la nieve gris”, de Pablo Rodríguez Alonso, y Xosé Lluís Campal Fernández algamó’l tercer premiu, al que se-y apurren 350 euros, con “La pantasma’l pasáu”. La entrega de premios va tener llugar na Casa la Cultura de Santuyano, de magar les 19’45 hores, el prósimu vienres, día 3. L’actu, nel que se fadrá llectura pública del cuentu ganador y que cuntará cola presencia de José Emilio González Aller, Alcalde de Bimenes, finará cola actuación del monologuista Carlos Alba, que representará la so obra “La matazuga”.

(d’El Solanu, 29-06-2009)

Read Full Post »

XOSÉ LLUIS CAMPAL FERNÁNDEZ

La copiosa produición, en versu y prosa, en castellán y asturianu, del cronista oficial d’Avilés Xulio García F.-Quevedo, que firmaba cásique siempres como Y***, nunca nun l’atropó’l so autor en vida -morrió na Villa l’Adelantáu un miércoles 30 de xineru de 1957-, y güei namái cuntamos con dos entregues publicaes nos caberos años: el cartafueyu ‘Poemes (1918-1919)’ (1998) y el llibru antolóxicu ‘Poesía (1911-1952)’ (2002).

(more…)

Read Full Post »

XOSÉ LLUÍS CAMPAL FERNÁNDEZ

El resclavu amorosiegu domina la mayor parte de les composiciones de los nuesos poetes bables. Pachu’l Péritu failo nun fargatáu d’ocasiones, como na pieza entitulada ‘La verbena de San Xuan’, qu’enxerta’l selmanariu llaniscu ‘El Pueblo’ nel so númberu del primer día de xunu de 1929. Depués de presentamos a los protagonistes, l’autor pasa, ensin que rinche, al megollu argumental: l’acoricamientu d’un amor aldeganu añáu dende la neñez y un involuntariu enquívocu que tará nun tris d’abrir la puerte de los celos y les prebes d’amor. L’aciertu del vate xixonés afítase en desarmar el desengañu que la moza maxina col arranque sinceru del galán nun contestu enforma favoratible pal bonal resultáu de la pidida como ye’l de la foguera de San Xuan, purificadora de pensamientos foínos. A la cenciellez espositiva amesta’l versificador una carga etnográfica que s’evidencia de muncha utilidá pa los siguidores de les costumes tradicionales, agora perdíes pero en víes de recuperación a poco que lo deseyemos.

(more…)

Read Full Post »

XOSÉ LLUÍS CAMPAL FERNÁNDEZ

Rulaba l’añu 1881 cuando entamó’l so camín l’Atenéu-Casinu Obreru de Xixón. Nel multitudinariu actu d’estrenu, verificáu’l vienres 12 de agostu con 600 asistentes, realizóse una velada con discursos y recitaos na que falaron dende Clarín a Apolinar Menéndez Acebal, Ramos Carrión o Eladio Carreño. Y tamién el famosu comediógrafu y vate humorísticu Vital Aza y Álvarez-Buylla (La Pola L.lena, 28 d’abril de 1851- Madrid, 12 d’avientu de 1912), saludáu nes páxines d’El Comercio como «fecundo poeta que con la misma facilidad y maestría maneja la punzante sátira que el género tierno y sentimental». Nesi diariu, el martes 16 d’agostu, asoleyaráse’l romance dialogáu d’Aza entituláu ‘Antón y Pachín’, que s’anicia (presentación de los personaxes) y tranca (una quintilla que fai de broche) en castellán, pero qu’emplega’l bable pa desendolcar la charra que «en Begoña sostuvieron / Antón el de los Llagares / y Pachín el carpintero». Retrata Aza a Antón como borrachín que desatiende la so familia pos mentantu «haya sidra en los lagares / y tabernas en el pueblo, / (…) lo demás para Antón / son cosas de poco peso»; Pachín ye’l so contrapuntu: «De corazón sano y puro / y de claro entendimiento, / busca en el noble trabajo / esa paz, ese sosiego / que sólo encuentra en el mundo / el que es honrado y es bueno».

(more…)

Read Full Post »

XOSÉ LLUÍS CAMPAL FERNÁNDEZ

Hai un sieglu, corría’l branu de 1909, el direutor del rotativu cubanu ‘Diario de la Marina’, Colás Rivero y Muñiz, tuvo n’Asturies tomando les agües en Caldas, circunstancia de la que charon mano un piñu d’avilesinos (formaben la comisión José María González, Antonio Pumariega, Eugenio Sánchez, Adolfo González, Agapito Miranda, Ramón López, Celestino García y José Antonio Suárez) pa festeyar al periodista maliayu con un banquete nel Casinu de la Villa l’Adelantáu, una iniciativa pa la que se recibieren adhesiones a mamplén.

(more…)

Read Full Post »

XOSÉ LLUIS CAMPAL FERNÁNDEZ

Tamién los pas de la poesía festiva en bable tovieron sollertes a los inventos que la cencia apurriere nel pasu del sieglu XIX al XX, a los avances que diben aportando a España. Daben preba de nun tar atascaos nunes concretes temátiques de costumismu rural. Asina, Francisco González Prieto fálamos en 1902, nuna composición dialogada de 57 versos d’arte menor, del fonógrafu que fabricare’l físicu norteamericanu Thomas Alva Edison. Nun ye asuntu raru pa un poeta que, ente otres coses, diría a polemizar depués, nel so particular estilu, cola teoría de la relatividá d’Einstein.

(more…)

Read Full Post »

XOSÉ LLUIS CAMPAL FERNÁNDEZ

Aficionáu al romance asonante de llargu recorríu, l’escritor xixonés Francisco González Prieto remembró na poesía entitulada ‘La fiesta de Sant’Ana’ (espublizada’l 6 de xunetu de 1929 en ‘El Pueblo’, de Llanes) los intríngulis d’una romería tradicional, nesti casu la de Granda. L’esquema ye asemeyáu al d’otres composiciones del autor: un personaxe pon a otru al corriente d’un casu que-y asocediera, polo qu’el diálogu que s’establez ente ambos ye namái’l pretestu pa qu’un de los intervinientes facilite que l’auténticu protagonista -equí Pachín, acompañáu de dos collacios- cunte la hestoria y faiga una descripción ocurrente de les cellebraciones lúdiques que se daben nel mediu rural (baille, xinta y bebida) y de les táutiques de cortexu (con enclín nel significáu floral), pero ensin dexar de tocar, de pasada, asuntos graves como la murnia que produz el directoriu o dictadura de Primo de Rivera.

(more…)

Read Full Post »

Older Posts »