Convóquense tolos Premios Lliterarios y los dos artísticos y queda a la espera’l Pachín de Melás

Los autores asturianos yá disponen de fecha tope pa presentar les sos creaciones a los siete Premios Lliterarios y los dos artísticos que convoca la Conseyería de Cultura, Política Llingüística y Turismu. Namái queda por anunciase’l gallardón de creación nueva, el Pachín de Melás de testos teatrales, que ta n’información pública hasta esti vienres.

El 17 d’abril ye’l día últimu pa la receición de trabayos n’asturianu en toles categoríes. Éstes son novela (XLIV Premiu Xosefa Xovellanos), poesía (XXIX Premiu Xuan María Acebal), ensayu (XXIX Premiu Máximo Fuertes Acevedo), lliteratura infantil y xuvenil (XVI Premiu María Josefa Canellada), cómic (XV Premiu Alfonso Iglesias) y traducción (III Premiu Florina Elías), completándose los Premios Lliteraros col destináu a menores de 31 años, el de narrativa moza (III Premiu Enriqueta González Rubin).

Read Full Post »

‘Onde’l caos se texe y se destexe’ y ‘Hai una llinia trazada’ ente los llibros n’asturianu más vendíos nel 2022

La novela ‘Onde’l caos se texe y se destexe’, de Xulio Viejo, y los ensayos ‘Hai una llinia trazada’, de Xune Elipe, y ‘¡Volved las manos al bable!’, d’Inaciu Galán, tán ente los llibros escritos orixinalmente n’asturianu más vendíos nel añu 2022.

La primera ye una novela que conecta una historia personal, centrada nel conceyu de Quirós, cola d’Asturies y del mundu occidental. Esta obra yá mereció’l premiu al meyor llibru n’asturianu del 2021 de la Tertulia Malory de L’Entregu.

Per otru llau, ‘Hai una llinia trazada’ ye un ensayu qu’algamó’l XXVI Premiu Máximo Fuertes Acevedo del Principáu y qu’analiza la historia de la música asturiana, faciendo un repasu pelos periodos, movimientos y intérpretes más importantes, resaltando los datos y fechos que foron cruciales nel devenir de la nuestra música.

Read Full Post »

Yá ta a la venta Notes de lliteratura asturiana, el llibru nuevu de Marta Mori

Notes de lliteratura asturiana nun quier ser una historia de la lliteratura, pero sí que tenta d’ayudar a comprender una parte grande de la so producción, de la so sencia y de la so problemática. Estos estudios, yá publicaos por Marta Mori equí y alló o cuntaos nuna conferencia, son a desplicanos mesmo’l carlismu na época del poeta Acebal (carlista él mesmu) como los modelos narrativos de los que se mandaba la narrativa nueva de la primer década del sieglu XXI o’l reflexu na lliteratura de la desindustrialización d’Asturies que nunca nun termina. Estudiosa de la lliteratura asturiana, con perseverancia y visión trescaladora de xéneru, l’autora de Notes de lliteratura asturiana nun ye la primer muyer que s’avera a les nuestres lletres col pruyimientu d’estudiales, pero sí cola consciencia de la necesidá d’axuntar tolo escrito y imprentao perende y axuntalo y ponelo negro sobre blanco nun llibru pa que podamos lleelo en conxunto y, del sieglu XVIII hasta’l presente de les nuestres lletres, siamos quien a ver lo que fuimos, lo que somos y lo qu’habremos ser pa siguir siendo.

Read Full Post »

Pablo Texón publica ‘Cantar de ti mesma’, poemariu ganador del Xuan María Acebal

Ediciones Trabe acaba de publicar el poemariu ‘Cantar de ti mesma’, de Pablo Texón, obra ganadora del Premiu de Poesía Xuan María Acebal del Principáu.

Nesta obra, l’autor fala de la muerte de la madre y “superando los tópicos y llugares comunes esperaos no melancólico de la elexía, topamos a un autor capaz de construyir con madurez una celebración d’esa vida que muda cola muerte de los qu’amamos pero sigue siendo un movimientu al futuru”, indiquen dende la editorial.

Read Full Post »

El poemariu ‘Los carreros del tiempu’ da a Marta Mori el so segundu Premiu Xuan María Acebal

El XXVIII Premiu Xuan María Acebal de poesía, la categoría a la que se presentaron más trabayos de tolos Premios Lliterarios, foi pa ‘Los carreros del tiempu’ de Marta Mori. L’autora xixonesa yá llevara esti prestixosu gallardón nel añu 2010 col poemariu ‘La mio voz’.

“La claridá, la elegancia, l’equilibriu ente lo clásico y la contemporaneidá, la sensibilidá social nada impostada y la naturalidá llingüística” foi lo que convenció al xuráu, que rescampló’l nivel de les 13 creaciones que tuvo que valorar nesta edición, que cuenta con una recompensa de 6.000 euros. Antón García, direutor xeneral de Política Llingüística, presidiólu, con Laura Marcos, filóloga de la direición xeneral, como secretaria, y les tamién filólogues Marina Pangua y Iris Quintana, la poeta Elvira Laruelo y los poetes Rodrigo Olay y Pablo Texón –ganador l’añu pasáu con ‘Cantar de ti mesma’– como miembros del mesmu.

Read Full Post »

Un total de 67 obres preséntense a los premios lliterarios del Principáu

Un total de 67 obres presentáronse a los ocho gallardones que’l Gobiernu d’Asturies convoca pa reconocer los meyores trabayos de la producción lliteraria y escénica escritos en llingua asturiana. La conseyería de Cultura, Política Llingüística y Turismu destina 45.000 euros a la dotación de los ocho gallardones.

Read Full Post »

Convocaos los premios lliterarios en llingua asturiana y el Camareta al Meyor Cantar

El Boletín Oficial del Principáu d’Asturies (BOPA) del 17 de mayu del 2022 publica la convocatoria de 7 premios lliterarios en llingua asturiana, amás del Camaretá al Meyor Cantar. El plazu de presentación d’orixinales o candidatures finaliza’l 16 de xunu.

Estos gallardones correspuenden a les categoríes de Novela (Xosefa Xovellanos), Poesía (Xuan María Acebal), Ensayu (Máximu Fuertes Acevedo), Lliteratura Infantil y Xuvenil (María Xosefa Canellada), Cómic (Alfonso Iglesias), Traducción (Florina Alias) y Narrativa moza (Enriqueta González Rubín).

Per otru llau, al Camaretá al Meyor Cantar pa canciones con lletra en llingua asturiana o en gallego-asturianu van premiu van poder presentase cantares de cualquier xéneru con lletra y música orixinal y cantares de cualquier xéneru con lletra orixinal sobre melodíes yá existentes.

ANEXU 1: Resolución de convocatoria de los premios lliterarios en llingua asturiana.
ANEXU 2: Resolución de convocatoria del 14 Premiu «Camaretá al Meyor Cantar».

(d’Europa Press, 17-05-2022)

Read Full Post »

Pablo Texón Castañón gana per segunda vez el Premiu Xuan María Acebal de Poesía n’asturianu

La ventésima séptima edición del Premiu Xuan María Acebal de Poesía n’asturianu recayó nel escritor Pablo Texón Castañón. El premiu, que concede la Conseyería de Cultura, Política Llingüística y Turismu ta dotaú con 6.000 euros.

El xuráu encargáu de valorar les doce obres finalistes tuvo presidíu pol Director Xeneral de Política Llingüística, Antón García Fernández, ya integráu polos escritores Marina Pangua Cuesta, Esther Prieto Alonso, Alba González Sanz, Rodrigo Olay Valdés y Alejandro Fernández-Osorio García, ganador de la edición pasada.

A esti galardón podíen presentase poemarios de tema y estructura llibres escritos en llingua asturiana con una estensión mínima de quinientos versos, siempre que fueren inéditos y non premiaos n’otros concursos.

Read Full Post »

La Conseyería de Cultura aumenta la dotación de los Premios Lliterarios en Llingua Asturiana

La Conseyería de Cultura, Política Llingüística y Turismu del Gobiernu asturianu fizo públiques güei, a traviés del Boletín Oficial del Principáu d’Asturies (BOPA), les bases de la convocatoria de los Premios Lliterarios en Llingua Asturiana, qu’esti añu tienen como novedaes un cambiu nes feches de presentación y l’aumentu de la dotación económica. Les obres, que na edición anterior podíen ser rexistraes hasta’l 31 de xunetu, nesta ocasión han de ser entregaes el 21 de mayu como fecha tope, al empar que la cuantía de caún de los premios sube de 5.000 a 6.000 euros.

El decanu d’estos gallardones que convoca la Dirección Xeneral de Política Llingüística ye’l Premiu Xosefa Xovellanos de Novela, qu’algama la 42 edición. Síguenlu n’antigüedá’l Premiu Xuan María Acebal de Poesía y el Premiu Máximo Fuertes Acevedo (dambos lleguen a la edición 27), el Premiu María Josefa Canellada (la de 2021 ye la decimocuarta edición) y el Premiu Alfonso Iglesias de Cómic (cumple trece años). Les persones ganadores d’estos premios l’añu anterior fueron Sidoro Villa cola novela El fervinchu, Alejandro Fernández Osorio pol poemariu Tayu, Xune Elipe col ensayu Hai una llinia trazada. Historia de la música asturiana, Vero Suari y Inaciu Galán cola obra de lliteratura moza La curuxa Catuxa y Alberto Vázquez como autor del cómic El sol na escombrera.

Read Full Post »

Gonzalo G. Barreñada: “A veces tengo la impresión de que la xente fala yá como’l Salvatore d’El nome de la rosa, que falaba toles llingües y nenguna.”

Gonzalo G. Barreñada (Sotrondio 1973) tardó muncho n’entamar a asoleyar obra (de 2016 ye’l so poemariu “Biografíes”), pero lo cierto ye que nestos últimos 4 años consiguió afitase como una de les voces más importantes de la lliteratura asturiana: Los Poemarios Biografíes y El Pesu de la Lluz, amás del volume de rellatos Hestories de Burgundu, y la novela La Casa de Xuan Buelga preceden nel tiempu a esti el Llar n’Orde, que non solo ye’l so tercer poemariu, sinón que tamién-y valió’l premiu Xuan María Acebal del Principáu d’Asturies. Recordámosvos, como siempre, qu’El Llar n’orde, amás de na vuesa llibrería asturiana de confianza, vais poder atopalu equí.

En 4 años fuisti a sacar trés poemarios, un volume de rellatos y una novela y, amás, a ganar el premiu más prestixosu de poesía d’Asturies, el Xuan María Acebal. Una de les carreres más meteóriques nes nueses lletres. ¿Tardasti n’escribir o en querer publicar? ¿Por qué? ¿Qué te fixo decidite?

Escribo cuentos dende neñu; daquella la mio mayor influyencia yera un llibru que tenía en casa de los hermanos Grimm. Con 12 ó 13 años escribí una novela d’esploradores ingleses en Canadá y una imitación mala d’El señor de los aniellos que llevaba de títulu Les seis espades de los elfos, obres dambes que tán na carbonera de casa xunto a otres munches; pero na carbonera tán bien; sicasí, nun olvido que nun hai nada de lo qu’escribí daquella que llueu nun sirviera d’aprendizaxe.

Read Full Post »