Si na xornada del 6 de mayu yera la Xunta Xeneral la que falaba n’asturianu cola llectura de poemes por dellos diputaos y políticos asturianos, el día 7 foi’l turnu de la ciudadanía, que s’espresó na llingua del país pa esixir la oficialidá del asturianu na manifestación del Día de les Lletres Asturianes n’Uviéu.
A la cita nun faltó nin l’agua –dalgo que yá ye vezu-, fechu que nun quitó pa que miles de persones aconceyaren na Estación del Norte d’Uviéu. La manifestación abríala una banderona d’Asturies y, de siguío, un grupu d’unes 50 pandereteres que diben tocando y cantando’l «Ramu de la oficialidá», una pieza que compunxeren l’añu pasáu pa la ocasión y qu’esti añu repitieron. Detrás, les pancartes de la Xunta pola Defensa de la Llingua Asturiana (XDLA) y les de partíos políticos, sindicatos, asociaciones y xente a títulu individual. L’actu reivindicativu acabó delantre del Teatru Campoamor, onde l’escritor de Bual Miguel Monteavaro lleó’l discursu de la Xunta pola Defensa de la Llingua que ponía fin a la marcha.
La XDLA esixó «un futuru pal idioma, con igualdá de derechos y oportunidaes; un futuru llibre de prexuicios, d’arbitrariedá, de negociaciones, de silencios y de renuncies». Amás, recordó que nesti añu «volvimos a asisitir a la marxinación de persones y colectivos de trabayadores. Dende les autoridaes educatives a l’Alministración, dende la Xusticia a los medios de comunicación».
P’acabar, nel comunicáu esplicábase que, mentanto pasen estes coses, «la conciencia y el trabayu del movimientu de reivindicación llingüística va siguir vivu y sollerte, porque tenemos la razón, les ganes y l’amor pola llingua nes cabeces y nos corazones. Vamos siguir pidiendo la oficialidá. L’asturianu llingua oficial». Otra manera, al acabar l’actu reivindicativu, Carlos Pulgar, portavoz de la Xunta pola Defensa de la Llingua Asturiana, valoró positivamente pa esti mediu la convocatoria de la manifestación y «la respuesta de la xente, independientemente de les condiciones climatolóxiques». Amás, aseguró que’l discursu «pon los puntos enriba de les íes. Esperamos que la manifestación sía la última y qu’esti sía un bon añu pa la reivindicación del asturianu».
Les Noticies.com tuvo la oportunidá de falar tamién con José Luis Arias Cachero, Felechosa, conceyal de Cultura del Conceyu d’Uviéu, que destacó que la manifestación «ye la constatación de que tovía queden coses por facer y qu’hai una reivindicación social». Tamién tuvo palabres pal actu qu’entama l’Academia de la Llingua Asturiana pol Día de les Lletres nel Teatru Campoamor. El conceyal de Cultura destacó que «ye una cita sorprendente porque s’axunten cuasi tolos representantes de toles instituciones del Principáu, les fuerces polítiques y dan una sensación de normalidá onde inda nun hai la normalidá que tien qu’haber».
(de Les Noticies, 07-05-2010)
Tierra alantre, la mesma fala 
Deixar ua Respuosta