González Espina: “Esti llibru yera una deuda que teníamos con Bolado y colos llectores”

Los poemarios de Xosé Bolado –escritor que nos dexó nel 2021– ‘Conxura contra la decadencia’, ‘Na estación de los relevos’ y ‘La bona intención’ axúntense, con otres creaciones, en ‘Cola suavidá del aire’ (Impronta). L’editor Carlos González Espina (Belonciu, 1959) faló con Asturies.com d’esti llibru llueu de la presentación celebrada esti miércoles en Xixón en collaboración col Atenéu Obreru.

¿Qué ye ‘Cola suavidá del aire?

Ye la obra poética completa n’asturianu de Bolado. Publicamos xuntos los trés llibros que se publicaren nel 2002, 2006 y 2012, en Llibros del Pexe –los dos primeros– y n’Impronta, más unos cuantos poemes sueltos qu’asoleyara en ‘Lliteratura’ y otres revistes, y dalgunos qu’apaecieron na antoloxía ‘Toma de tierra’ de José Luis Argüelles y nel llibru póstumu que publicó Esther Muntañola. Poro, colo que yo sé, ta tola obra poética publicada por Bolado n’asturianu.

Read Full Post »

Lourdes Álvarez: » El Premiu Nacional de Lliteratura Asturiana supón un estímulu grande pa siguir creando»

Lourdes Álvarez foi reconocida col Premiu Nacional de Lliteratura Asturiana el 31 de xineru d’esti añu y que convoca l’Academia de la Llingua Asturiana cada dos años. Güei, en Formientu, falamos con ella del reconocimientu, la so xera lliteraria y la situación de la lliteratura.

Norabona pol Premiu Nacional de Lliteratura Asturiana. ¿Qué sentisti cuando s’anunció y qué supón pa ti recibir esta reconocencia?

Munches gracies. Al recibir la noticia sentí a lo primero incredulidá y depués una emoción  intensa. Esta reconocencia  amás d’afalagar la vanidá supón un estímulu grande pa siguir  creando.

Read Full Post »

Nicolás Bardio: «En Radagast apostamos por facer llibros que llea la xente»

Nicolás Bardio (Uviéu, 1987) ye escritor y narrador asturianu. Autor de les noveles Sol Reló (Trabe, 2008), Onde ensamen les abeyes (Suburbia, 2011), La Colomina 36 (Trabe, 2020) cola que ganó’l Premiu Asturias Joven de Narrativa, y Del llau del nigromante (Radagast, 2021).

Ye tamién el promotor Depués d’Ochobre, el xuegu de rol n’asturianu, ucronía ambientada na República Obrera y Campesina d’Asturies llueu de que triunfare la Revolución d’Ochobre de 1934 y Asturies pasare a formar parte de la Unión Soviética.

Dende l’añu 2018 dirixe Ediciones Radagast, onde edita obres lliteraries de fantasía y ciencia ficción. Con él falamos de la trayectoria d’esta editorial que va garrando puxu nel panorama lliterariu asturianu.

¿En qué momentu surde la idea de fundar una editorial especializada en fantasía y ciencia ficción n’Asturies y principalmente n’asturianu?

Pos la verdá ye que dalgo que surde a últimos de 2019 col éxitu que tuvimos con Depués d’Ochobre. Eso fixo posible disponer de perres coles que poder montar la editorial, apostar polos primeros llibros que sacamos y facer frente a tolos trámites necesarios, que nun son pocos.

Read Full Post »

Rafa R. Valdés: «La traducción nun ye ferramienta d’aisllamientu sinón de diálogu con otros pueblos»

Rafael Rodríguez Valdes (Uviéu, 1978) ye historiador y director de la colección de torna «Calume», d’Ediciones Trabe. Tien publicao «Discursos llingüísticos y movimientu obreru na Asturies decimonónica» (Trabe, 2009) y «Llingua asturiana y movimientu obreru (1899-1937)» (Atenéu Obreru de Xixón).

Güei en Formientu falamos con él de la so trayectoria dirixiendo un llabor importante pa la lliteratura n’asturianu, la colección Calume.

¿Por qué se dio’l títulu de Calume a la colección de tornes?

El calume ye’l caláu de la mar y esi significáu y conteníu de fondura quier treslladase a esta colección dedicada a la traducción que publica Ediciones Trabe. Fondura estética y lliteraria, fondura pa lo que fai a la diversidá y a la pluralidá de los títulos, de los xéneros, de les temátiques y de los y les traductores que faigan parte de la colección, fondura pa lo que fai al trabayu de traducción, corrección y edición de les obres, fondura porque’l camín que tenemos per delantre ye lentu y llargu.

Read Full Post »

Casimiro Fernández: “Yo almiro a Xuan Bello. Llamar a Fort Paniceiros, Paniceiros, ye un homenaxe a él”

Facemos esta entrevista na casina que tien Casimiro a les afueres de Mieres. Ye una casina modesta, pequeña pero qu’enseguida amuesa esa herencia mexicana que Casimiro traxo del otru llau del charcu. N’antoxana, diminuta, tien cactus y magueyes (col que se fai’l mezcal) que mos enseña arguyosu. Llueu, yá dientro la vivienda, una semeya de la Virxe de Guadalupe preside la entradera y paisaxes de estampes mexicanes norteñes, con vaques y vaqueros, repártense peles parees de forma desigual. Sentámonos a la mesa con él y, mientres sacamos papel y llapiceru, Casimiro saca una botella d’oruxu caseru y una d’Herradura, un tequila reposado añejo que diz que ye lo meyor del mundu. Ye la hora del vermú.

¿Qué va atopar el llector en Fort Paniceiros: Una hestoria de la de mi’madre?

Un western. Ún de los de verdá. Con tiros, con hosties y con munches rises. El western ye un xéneru cómicu de lo más prestoso. La novela ambiéntase en California, na parte sur, ehí pegando casi con Arizona, nel pueblu de Fort Paniceiros que controla’l xérif John Oldman con mano de fierro.

Read Full Post »

Gonzalo G. Barreñada: ” La cultura ye fundamental para formar una memoria coleutica y pa facenos conscientes de la nuesa realidá”

Gonzalo G. Barreñada nun asoleyó nada hasta los 42 años; pero de magar que lo fixo, nun aparó de ganar premios y reconocimientos. Ganador del Xuan María Acebal, del Premiu de la Crítica y, agora, recientemente, del Premiu Xovellanos; fálanos de “El Viaxe del Cacique”, la so nueva novela cola qu’algamó esti últimu premiu. Falamos con él non namás d’esta novela pola que tamos yá naguando, sinón del procesu creativu del escritor y, tamién, del panorama cultural d’Asturies y de l’estáu de salú de la lliteratura astusiana.

¿Quién ye esi cacique y a ónde viaxa?

El cacique al que fai referencia la novela ye Caonabo. Vien de vuelta a La Española (Quisqueya pa los taínos), onde él yera cacique de Maguana. En realidá, sabemos que Caonabo muerre en 1496, pero nesti casu lo qu’imaxino ye que siguió vivu en Sevilla y que torna en 1502 cola espedición de Nicolás de Ovando. Nesa nao na que torna hai amás dalgunos personaxes de la época qu’animen un poco la hestoria. ¿Por qué 1502? Ye una dómina que siempre me prestó muncho. 1502 ye un añu interesante, entovía nun esiste la Casa de Contratación, ye l’añu del cuartu viaxe de Colón… Yá ta too ehí y al mesmu tiempu ta too por facer.

Read Full Post »

Diego Solís: «Volvemos en 6 minutos ye una reivindicación de lo pop, de lo efímero»

Diego Solís (Xixón 1991) ye ún de los poetes más destacaos de la última xeneración d’escritores asturianos. Ganador del Asturias Joven de Poesía en 2018, tien escrito tanto n’asturianu como en castellán y asoleyaos bien de poemarios como Hágase abril (Ruleta rusa), Cállanos con esa música (Impronta) o Y el mundu marcha (Saltadera). Amás,dirixe’l programa La cla invisible de Play Presta. Xunto a ello, co-dirixe Formientu y fundó Fame Poétika, grupu col qu’organizó bien de timbes poétiques en dellos puntos d’Asturies.

Güei, el poeta xixonés siéntase con nós pa charrar del so proyectu nuevu, Volvemos en 6 minutos, onde axunta poesía, imaxe y soníu nun solu llibru.

Codirixes Formientu y tuvisti presente en les timbes poétiques de Fame mientres bien d’años. Ello ye, tas pronto de la poesía siempres. ¿Cómo foi cambiando nestos últimos años esti xéneru?

Va unos años hebo un “boom” de poesía en directu que, magar de que sigue teniendo ciertu tirón, yá nun ye lo que yera. Esto pudo afectar na poesía que se fixo, anque yo reconozo que poca de la poesía pensada pal directu espublicé en papel posteriormente; igual el poema “Manques” precisamente asoleyáu nesta revista y poco más. Agora creo qu’hai una vuelta al llibru físicu como talu. Puede que tamién eso influya y cada vez haya menos poesía prosificada y pensada pal recitáu públicu. Creo que sigue asentáu l’usu del versu llibre y que’l llector busca ediciones guapes y cuidaes. En “Volvemos en 6 minutos” al menos aposté por esa llínia d’una manera mui radical, anque en directu les veces que recité dalgún funcionó mui bien pol tonu autoparódicu que tien el llibru. Seya como fuere, too sirve y de toos se puede deprender, yo siempre respeté a toles propuestes que son a llegar a la xente.

Read Full Post »

De referentes, mitos y fósiles: comentando ‘Tayu’ con Alejandro Fernández-Osorio

RAMÓN LLUIS BANDE

BANDE: Tamos énte un llibru que naz del colapsu d’una revolución: el llibru d’un burgués, fíu d’un mineru que, mui consciente de la so situación, rebélase a dexase llevar polos cantos de serena del esclasamientu. Escribes dende la consciencia de la imposibilidá del autorretratu ensin comunidá.

FERNÁNDEZ-OSORIO: Nun entiendo al individuu ensin comunidá. La comunidá constitúi al individuu. Byung-Chul Han escribe nun de los sos últimos llibros que’l ser humanu ye un ser locativu y ser locativu quier dicir que ta nun sitiu llocalizáu y tar nun quier dicir otro que l’individuu construise en diálogu con esi sitiu. Nun podemos ser ensin comunidá. Citando ún de los poemes del llibru: «llevántome nes manes calloses d’una comunidá». Ensin les beques mineres o los esfuercios de mio padre por sacar la categoría de picador, nun podría tar onde toi. Esi saltu que se da al individualismu ensin concencia de comunidá al que toi tentáu constantemente —porque’l procesu de narcisización ataca siempre al que se fai a sí mesmu—. Cuando ves que te tás faciendo a ti mesmu, porque tás tomando un camín que paez diferente del que vienes, ye cuando acabes votando a Albert Rivera (rises). Y, ¿cuála ye nel mio casu esa comunidá? Yo nun podría esistir ensin la cuenca minera y ensin les lluches qu’elli se dieron y lo que se consiguió con elles. Tampoco ensin la traición a esa cuenca minera, la traición mía y la d’una sociedá que yá nun sabe pa ónde mira.

Read Full Post »

Gonzalo Llamedo: «Na lliteratura asturiana ganóse en producción lliteraria y na diversificación temática»

Gonzalo Llamedo, autor que publicó con Formientu, ta acabante de ganar la XXVIII edición del Premiu de Poesía Fernán Coronas, que convoca la Sociedá Popular La Regalina, de Cadavéu. Agora, l’autor mozo cédenos parte del so tiempu pa falar con él de la obra ganadora, los sos proyectos y la situación de la lliteratura asturiana.

Norabona pol Premiu de Poesía Fernán Coronas. ¿Qué sentisti cuando s’anunció
y qué supón pa ti?

Lo primero de too, quiero dar les gracies. Munches gracies a la Sociedá Popular de la Regalina por siguir convocando esti concursu dempués de 28 ediciones, dando sofitu a la escritura en llingua asturiana. Quiero agradecer tamién al xuráu tol llabor de valoración (nada cenciellu) y la seriedá cola que lo fixeron, dándome esta oportunidá tan especial, que de xuru, merecen tamién otres obres presentaes. En tercer llugar, toi mui agradecíu a Formientu pola anuncia del Premiu y pola entrevista. Y, pa finar, nun quiero dexar de da-yos les gracies a les persones que me dedicaron un mensaxe con cariñu.

Recibir esti premiu ye un regalu mui especial, amás de polo que representa pa la lliteratura asturiana (esa que lleemos y estudiamos col alma), porque me llega nun momentu personal mui particular, de revisión y d’asentamientu na vida adulta. La verdá, nun contaba con él: soi consciente de les limitaciones que tengo como escritor novel «neofalante», fíu de la diglosia, anque también ye cierto que llevo cuatro años trabayando pa superar esta carencia de los 27 anteriores y devolve-yos a la llingua y a la lliteratura asturiana l’espaciu na mio vida que-yos debía. La escritura foi siempre especial pa min, pero poder facelo n’asturianu y tener esta acoyida ye un doble regalu. Estupendu.

Read Full Post »

Aymara González: “Si mandaran agora una novela del estilu de Louisa May Alcott o Joanna Russ al Xosefa Xovellanos, ¿sedríamos p’apreciala polo que val?”

Como anunciemos nel so momentu, consagramos esti mes d’agostu a facer una serie d’entrevistes posaes con muyeres asturianes de menos de 40 años que tán actives nel campu de la lliteratura y la cultura asturianes pa entruga-yos por qué entá nun hai igualdá nesi campu y les muyeres siguen siendo una minoría ente les persones que publiquen obra.

Güei entrevistamos a Aymara González Montoto, traductora profesional, ganadora del Pepe Campo de Monólogu n’asturianu y que ta traduciendo anguaño la obra d’autores como C.S. Lewis o Stephen King.

Hay una desigualdá nel númberu de muyeres y homes con obra publicada n’asturianu. ¿Por qué pienses que pasa eso?

Pasa lo mesmo equí, na lliteratura, que nel restu l’ámbitu cultural. Hai desigualdá porque vivimos nun sistema desigual nel que se premia perpetuar la desigualdá. Si pa qu’un escritor pueda escribir necesita que la so muyer atienda la casa y la familia, o necesita contratar a una persona pa que s’encargue de llimpiar (seutor, por ciertu, perfeminizáu) y nun vemos un problema, ¿cómo vamos reflexonar lo más mínimo en que gran parte de les novedaes editoriales n’asturianu tán escrites por homes?

Read Full Post »